Преподобный Александр Свирский
Духовная грамота

135. – 1533 Августа 30. Духовная грамота Преподобнаго Александра Свирскаго

Во имя Отца и Сына и Святаго Духа. Се аз раб Божий пишу сию духовную грамоту, своим целым умом, государю преосвященному Архиепископу Великаго Новагорода и Пскова Владыке Макарью. Нынеча, государь, Божиим посещением в болезнь впадох, и чаях к Богу своего отшествия; и старцы, государь, святыя Живоначалныя Троици обители видя меня приспевша к кънцу, и начаша ми докучати о игумене: «кого де ты нам прикажешь на свое место игумена»; и аз, государь, положу ли упованье на Бога да на тобя; а есть, государь, у Живоначалные Троици во обители, в нашей пустынке, 4 священники, и аз приказываю, государь, Богу да тобе, которого, государь, ты благословишь в тех 4 священникех, то им игумен. Да тебе же государю приказываю преосвященному Архиепископу Владыке Макарью обители Живоначалные Троици священноиноки и всю свою братью: Бога ради, государь, и Пречистей Его Матери, побереги и оборони от силных людей, после моего живота. А братье своей приказываю жити в любви о Христе, да пития бы пиянственаго в нашей пустынке отнюдь не держали; а вражды бы не имели и не розчитали бы ся ни о чем, занеже Бог дал посяместа розчитатися не о чем, казны манастырьские нет, а что Бог послал при моем животе, христолюбец которой что дал или вклад в манастырь, ино то все пошло в дом Живоначалной Троице и Боголепному Преображению на храм да в теплую церковь, да на иной манастырьской росход. А вкладчики которые прийдут в манастырь к своим вкладом, и аз тех братье приимати приказываю, как прежних вкладчиков, да и беречи; а всем нашим делом Бог сердцевидец. Мир тобе государю преосвященому Архиепископу Великаго Новаграда и Пскова Владыке Макарью о Христе; а меня, государь, грешнаго прости и благослови, а тебе государя, правителя истинному слову Отца и Сына и Святаго Духа и наставника заблужьдшим еже к спасению, Бог прощает.