Преподобный Феодосий Печерский
Послание великому князю Изяславу о вере варяжской или латинской

Слово ми есть к тобе, княже Боголюбивый!

Аз Федос, худый раб Пресвятыя Троицы, Отца и Сына и Святаго Духа, в чистей и правоверней вере рожден, и воспитан в добрей наказанья правоверным отцем и матерью, наказываюче мя добру закону, вере же Латыньстей не прелучайтеся, ни обычая их держати, и компанья их бегати, и всякаго ученья их бегати, и норова их гнушатися, и блюсти своих дочерей не давати за них, ни у них поимати, ни брататися, ни поклонитися, ни целовати его, ни с ним из единаго судна ясти, ни пити, ни брашна их приймати.

Темже паки у нас просящим Бога ради ясти и пити – дати им, но в их судех; Аще ли не будет у них судна, в своем дати; потом измывши, дати молитву: занеже не право веруют, и не чисто живут: ядят со псы и с кошками, и пьют бо свой сец; ядят лвы и дикие кони, и ослы, и удавленину, и мертвечину, и медведину, и бобровину, и хвост бобров, и в говенье ядят мяса, пущаюче в воду; а 5 неделю поста во вторник чернеци их ядят лой и в суботу постятся, и постившеся вечер ядят молока и яйца.

А согрешают, – не от Бога просят прощенья; но прощают попове их на дару. А попове их не женяться законною женитвою; но с робами дети добывают, и служат невозбранно; а епископи их наложници держят, и на войну ходят, и оплатком служат.

Икон не целуют, ни мощей святых; а крест целуют написавше на земли, и вставше попирают его ногами, мертвеца кладут на запад ногами, а руце подон подложивше; женяще же ся у них, поймают 2 сестре; а крещаются во едино погруженье, а мы в 3; мы крещающеся мажемся миром и маслом, а они соль сыплют крещаемому в рот; имя же не нарицают святаго, но кого прозовут родители, в то имя крестят. А глаголют Духа Святаго исходяща от Отца и от Сына.

Ина многа злая дела суть у них; развращенная погибель полная вера их. Его же ни жидове творят, то они творят. Много же и в Савьску ересь вступлют. Мне же рече отец мой: ты же, чадо, блюдися кривоверных, и всех их словес; занеже исполнилася и наша земля злыя тоя веры; да кто спасая спасет душю свою, в правоверней вере живучи. Несть бо иноя веры лучше нашей, яко же наша чиста и свята вера правоверная. Сею бо верою живущи грехов избыти и муки вечныя гознути, но жизни вечныя причастнику быти и бес конца со святыми радоватися; а сущему в иной вере или в Латыньстей, или в Арменьстей, несть видети им жизни вечныя.

Не подобает же, чадо, хвалити чужее веры. Аще хвалит хто чужю веру, то обретается свою веру хуля. Аще ли начнет непрестанно хвалити и свою, и чужу, то обретается таковый двоеверец: близ есть ереси. Ты же, чадо, блюдися их, и свою веру непрестанно хвали. Ни свойся к ним; но бегай их, и подвизайся в своей вере добырыми делы; милостынею милуй не токмо своея веры, но и чужыя. Аще ли видиши нага, или голодна, или зимою или бедою одержима: Аще ли ти будет жидовин, или сарацин, или болгарин, или еретик, или латинянин, или ото всех поганых, – всякого помилуй, и от беды избави я, яже можеши: и мзды от Бога не лишен будеши.

Бог бо и сам ныне поганыя набдит, яко же и крестьяны. Поганым же иноверцем в сем веце попеченье от Бога, а в будущем же чужи будут добрыя детели; мы же, живуще в правоверней вере, зде есмы набдими Богом, а в будущем веце спасаеми Господом нашим Исус Христом. Рече же ми отец мой: чадо, Аще ти ся случить умрети по святей сей вере и Господа ради, то умри с дерзновеньем за веру Христову: святии бо по вере умроша, да живи суть о Христе. Ты же, чадо, Аще узриши некия иноверныя сверным прю деющи, лестью хотяща отвести от правыя веры, ты же ведая не скрый в себе, но помози правоверным; Аще им поможеши, то яко овча избавиши от уст львовых; Аще ли умолчиши, то, яко отъем у Христа, предаеши их сатане.

Аще ти речет прец: сию веру и о́ну Бог дал есть, ты же, чадо, рцы: то ты кривоверен, мниши Бога двоевера, то не слышиши ли, окаянне, развращене злыя веры? Писанье глаголет: "един Бог, едина вера, едино крещенье» (Еф.4:5), – рече Господь: тако бо лепо есть нам искончати всю правду (Мф.3:15); да ее все исполнив, толи вознесеся, и ученики посла на проповеданье. Ты же по проповеданью Апостольскому толико лет держав правую веру, совратился еси на зловерье по наученью сотонину. Не слышите ли Апостола Павла глаголюща: Аще ангел пришед с небесе благовестить вам, а не яко же мы благовестихом, да буди проклят?

Вы же отринувше проповеданье Апостольское и святых отец исправленье, и приясте неправду и веру развращену, полну многия погибели; того ради от нас бысте отвержени; того ради им с вами недостойно сужитья приймати, ни к Божественным тайнам обще приступати, – ни им к нашей, ни нам к их: зане мертвым телом служите, мертва Бога призывающа.

А мы служим живым телом, самого Господа жива видящи, одесную Отца сидяща: и паки придет судити живым и мертвым. Вы же есте мертвии, мертву жертву здеваете: а мы живу Богу живу жертву приносим, чисту, непорочну, и живот вечный обрести. Тако бо писано: воздастся комуждо по делом его, о Христе Исусе, о Господе нашем, Емуже слава.

Аминь.