Преподобный Иосиф Волоцкий
Послание иконописцу и три «Слова» о почитании икон
Из сборника «Философия русского религиозного искусства XVI-XX вв. Антология».
Подобает ти ведати, возлюбленный и духовный мой брате, яко сказание от божественных писаний, еже послах иже по Бозе твоей любви того ради, понеже множицею глагола ми о сем, и от многа времени требуеши от мене худого слышати слово, в душевную тебе поспевающее ползу, и памяти ради моего недостоинства, яко да и по смерти моей поминаеши мое окаанство. Но не яко же ты мниши, възлюбленне, мы силни есмы в делех и словесех; веси убо немощь мою, и удобна тебе худость моа; но яко не просиши от мене успокоевающее плоть, но к спасению душевного устроенна, сего ради забых свою худость и неразумие, поминая твою веру и усръдие и еже о блазем тъщание, и повеленнаа тобою съверших. Дръзнух написати и послати твоему боголюбию твоего чаяниа недостойно, нашея же крепости не хужьдши.
Но обаче, яко же мню, нынешнему времени подобно, яко ныне паче мнози лестьци изыдоша в мир, новгородскых глаголю еретиков, глаголющих, яко не подобает покланятися иже от рук человеческых сътворенным вещем, сиречь всечестным иконам, и честному и животворящему кресту, и прочим божественым и освященным вещем, их же Господь наш освяти и прослави в новей благодати и в ветхом законе. И тебе же ключимо сие написание того ради, яко самому ти начало художнику сущу божественных и честных икон живописанию.
На три же слова того ради положих, яко первое слово потребно есть, еже с еретикы претися, глаголющими, яко не подобает покланятися рукотворению. В том бо изъявится божественными писаньми в ветхом законе от пророк же и от праведных, яко и тогда поклоняахуся рукотворению, сиречь, церкви, яже тогда нарицаашеся скинией, еще же и Соломонове церкви, и иже в них честейшем вещем, их же сам Бог повеле в славу свою сътворити. Второе же слово всякому христианину потребно есть, паче же не имеющим многых книг, или не ведущим божественных писаний, в том бо изъявится божественными писанми нового закона, от апостол же и святитель и преподобных и богоносных отец наших, како и которые ради вины подобаеть покланятися святым иконам и честному и животворящему кресту, и святому евангелию и пречистым и божественым тайнам и освященным съсудом; в них же божествена таинъства съвръшаются, и святым мощем и божественым церквам. Потом же вкратце написах, како и которые ради вины подобаеть поклонятися друг другу и какой которые ради вины подобает царем, и князем покланятися, и како подобаеть ныне в новем законе Господу Богу поклонятися и тому единому послужити. Третие слово на еретиков, глаголющих, яко не подобаеть писати на святых иконах Святую и Единосущную Троицу: Авраам, рече, видел есть Бога со двема аггелома, а не Троицу. Зде же имать сказание от божественных писаний, яко Авраам виде Святую Троицу, и яко подобаеть християном писати на всечестных иконах Святую и Животворящую Троицу. Обаче да весть твое боголюбие, яко не моея мысли суть сиа, но от многых божественых писания избрах, и в малех многаа съвокупив, тебе послах. Вем бо, яко не имаши ты у себе многых книг.
Ты же сиа благоразумие прочитай и о моей худости владыце Христу помолися, и яко же обещася, и по смерти моей не забуди, яко лета уже к старости приближишася и смертная чаша былиа растворена уготовляется. Пити же ее с извещением сладко, без извещениа же горчайши пелыня есть. Сего бо ради и святой пророк Давид молится, глаголя: «услыши молитву мою, Господи, и моление мое внуши, слез моих не премолчиши, яко преселник... от тебе, пришлець, яко же вси отци мои. Ослаби ми извещением, да почию" (Пс.38,13–14). Извещение же без очищения душевного не бываеть, очищение же без слез не бываеть, слезы же в мятежи не бывають, понеже мятежь помрачаеть ум и не оставляеть его зрети своя съгрешениа. От сего приходить человек в обычай небрежения и невниманиа; небрежению же и невниманию вся страсти последують. Сии путь в лености живших; сие съкровище во мне съкровенно. Сего ради боюся и трепещу, еже пити смертная чаша; приидет бо на мя, приидеть, и убегнути не могу. И Аще въздушный и мирскый князь темный и помраченый обрящеть безакониа моя и обличить, истинно въсплакатися имам неполезно. Раб бо, уведев волю господина своего, и не уготовав, ни сътворив по воли его, биен будет много. А иже Христа ради по вся дни пиють смертную чашу слезами и злостраданием, сим чаша смертнаа небеснаа врачебница бывает, и пиють ее сладчайши меда и сота. Понеже былие смертъное здравие душевное предуготовляеть в нетленнем веце. Якоже он благоговейный инок, иже въсхоте врачевати своя грехы в тленнем семь веце, прииде к некоему и велику и духовному врачю: «Имаши ли, – рече, – у себя былие, иже можеть грехы исцелити?» И рече врачь: «Ей, честный отче!» Отвеща же инок: «И какова суть былиа она?» И рече к нему врачь: «Възыди на гору, сиречь, в пустыню, възми корень духовный, еже есть Христа ради нищета и худость, и събери си листвие, еже есть алчьба и жажда, и приими миро ливаново, еже есть смирение и страх божий, и другое миро индийское валан, еже есть целомудрие и чистота, и миро халван, еже есть болящим служение, и еже от них бываемые о тебе теплые молитвы. И истолъци все вкупе в ступе послушаниа, подсей их ситом – твоим чистым и благым житием, и вложи их в чистый горнець в себе, и влей в него воду духовной любве, и вжигай пламень божественого желанна под горнецемь сердца твоего, и егда свариши их добре, вычерпи их лжицею, твоею тихостию и безмолвием, и вкуси их духовными обычаи и не възвратися въспять в вся дни живота своего».1
Такова суть былия, еже грехы исцеляют! Помолим же ся и мы, еже и нашим душам напитатися такового врачеваниа молитвами Пречистая Богородица и всех святых. Аминь.
Слово на новоявльшуюся ересь новогородскых еретиков, глаголющих, яко не подобаеть кланятися иже от рук человечьскых сътвореным вещем. Зде же имать сведетельство от божественых писаний, яко и в ветхом законе покланяхуся иже от рук человечьскых сътвореным вещем, их же Господь Бог повелел есть в славу свою сътворити: ныне же паче подобаеть покланятися иже от рук человечьскых сътвореным вещем, сиречь святым иконам и честному и животворящему кресту и прочим божественымь и освященым вещем, их же повеле Господь Бог нашь Иисус Христос в славу свою творити
Мнози убо от еретичьствующих, паче же иже ныне в роде нашем, прельстившимся новогородцкых еретиков, иже безумие и неистовне немало божественую и апостольскую церковь смутиша, и многа вносяща жидовьскаа учениа. Ныне же о едином речем, иже они обносими лютою ересию глаголють, яко не подобаеть покланятися плотьскому смотрению, иже нас ради въчеловечшася Бога Слова, ради иконного въображениа образу Господа нашего Иисуса Христа, и пречистая Богородица и всех святых, и честному и животворящему кресту, и божественому евангелию, и святым и животворящим Христовым тайнам, и освященным съсудом, в них же божественаа таинства съвръшаются, и честным святых мощем, и божественым церквам.
Прежде убо подобает разумети, что есть икона, и что есть идол, многа убо и неизреченна разделениа и различениа имуть святые иконы, их же мы христиане почитаем, от скверных идол, их же еллини почитаху: божественых бо икон и пръвообразное свято есть и честно, идольскае же пръвообразное сквернейша суть и нечиста и бесовскаа изъбретениа. Аще ли же иконы подобна суть идолом, то и скиниа, юже сътвори Моиси, и церков, юже създа Соломон, подобии суть идольскым церквам, и жрътвы, иже в них бываху, подобии суть еллиньским жрътвам, иже идолом приношаху, и ковчег, в нем же скрижали завета и прочаа подобна есть твоему ковчегу, в нем же имаши домовные потребы, и жезл Ааронов прозябший подобен твоему жезлу, им же подъпираешися, и свещник златый и седмосветлый подобен есть твоему светилнику, иже в дому твоем вжигаеши. Аще убо сиа подобна суть, подобии суть и святые иконы. Но никако же нимало! Но почитаеши сиа того ради, яко благодать Божиа изволи теми приходити. Тем же образом и ныне благоизволи благодать Божиа святых ради икон, и честного и животворящего креста, и прочих божественых и освященных вещей к нам приходити. И яко же при Нои можаше Бог и без ковчега спасти Ноя, вся бо тому възможна. Но яко же Ною бездушьною и рукотвореною вещию устрой спасение, тако и нам бездушными сими божествеными вещми сътвори спасение. Тако же и еврея можаше Бог и без медная змиа спасти от змиина угрызения, но изволи своими неизреченными судьбами медною змиею от смерти избавити, тако и нам ныне Господь Бог нашь видимых сих ради святых икон и прочих божественых вещей мыслено спасение сътвори. Аще и бездушии суть и рукотворени, тако потопа греховного и умного угрызениа змиина избавльшеся въчеловечениа ради Божиа слова.
И Аще убо в Ветхом законе покланяхуся иже от рук человечьскых сътвореной церкви, и прочим божественым вещем, иже сам Бог повеле в славу свою сътворити, то колико паче ныне подобаеть в новей благодати почитати и покланятися иже от рук человеческых написаному на иконе образу Господа нашего Иисуса Христа. Тако бо и сам повеле и на плащаници въобрази, яко же Исайа пророк глаголеть: «В дни оны станеть в Египте олтарь Господеви, и образ его на олтари станеть» (Ис.19,19). Потом же святии апостоли повелеша святому апостолу и евангелисту Луце написати на иконе пречистый Его образ и покланятися обожественному Его человечеству и на небеса възнесшуся. Тако ж и пречистая Его Матере, иже въистинну Богородица сущи, написа святый апостол и евангелист Лука. Тако же и честному и животворящему кресту и святому евангелию, и пречистым божиим тайнам, и освященным съсудом, в них же божественаа таинъства съвършаются, и честным святым мощем, и божественым церквам покланятися и почитати подобаеть. Тако же подобаеть писати на святых иконах и образы святых пророкь же и апостол, мученик же и святитель и всех святых почитати же и покланятися.
Сказание от божественых писаний, како и которыа ради вины подобаеть христианом покланятися и почитати божестъвеныа иконы и честный и животворящий крест Христов, и святое еуангелие, и пречистая божиа тайны, и освященная съсуды, в них же божественыа таиньства съвръшаються, и честныа святых мощи, и божестъвеныа церкви, еще же и како подобает покланятися друг другу, и како подобает покланятися и служити царю или князю, и како подобаеть Господу Богу ныне покланяти и тому единому послужити
Подобает ведати, яко всякому христианину достоить писати на всечестных и божестъвных иконах и на стенах и на священных съсудех Святую Троицю единосущную и неразделную и неслианную, и покланятися с страхом и трепетом верою же и любовию, божественому и пречистому оному подобию, желанием бесчисленым и рачением любезным целовати. Того ради, яже бо невъзможна есть нам зрети телесныма очима, сих съзерцаем духовне ради иконного въображениа. Аще бо и неописаиа есть божеством Святая и Всемогущаа и Животворящаа Троица, но обаче многыми образы богогласнии и всечестьнии пророци же и праведницы о той прорекоша; Аврааму же чювствено и в человечьстемь подобии явися. И яко же явитися благоизволи, сице и описоватися повеле. И от вещного сего зрака възлетаеть ум наш и мысль к божестъвеному желанию и любви, не вещь чтуще, но вид и зрак красоты божестъвеного оного изъображениа. И такового ради изображениа трисвятая песнь Трисвятей и Единосущней и Животворящей Троици на земли приносится, понеже почесть иконная на первообразное преходит. И не тъкмо ныне освещаемся и просвещаемся Духом Святым сего ради, но и в будущем веце мзду велию же неизреченную приимем, егда телеса святых паче солнечныа светлости просветятся, иже ради иконного въображениа любовне почитають и целують едино существо божества в триех образных съставех и молятся пречистому оному и божественому подобргю Святыа и Животворящиа Троица.
Тако же и подобно тому достоить писати же и въображати пречистый и богочеловечьный образ Господа нашего Иисуса Христа, поклонятися и облобызати того ради, понеже убо безначалный и присносущный и невещественый и неосязаемый, царьствуяй, живый Сын и Слово Божие и Бог нашь, иже небо измеривый пядию, землю съдръжа дланию, прьст взем от земля и създа человека рукою по образу своему и по подобию, и своего разума сподобив, неизреченными райскыми добротами наслажатися подаст, и сущим всем царя постави, таже прехищрена бывша змиемь, низпадша в грех и греха ради в смерть, не презре; видев род человечь погибающь, сниде с небес благоволениемь Отца присносущна и съдейством Духа Святого, и вниде в чрево девици Марии, и въсиа свет истинный в утробе её. И той свет за семя плоть бысть и родися, и Бог сый человек бысть, знаменми и чюдесы и различными силами величьство своеа силы и божества показуя нам. Та же апостолы посла на отгнание злобы и научение добродетели, и устремление греха прещенми пресече, и благых усръдие обетованми въздвиже, немощи наша въсприат и недуги понесе, и о нас уязвен быть, безчестнейшую подъят смеръть, въскресе же и на небеса възнесеся, остави нам незабытныа памяти знамение имети житиа своего на земли, уповающимь на нь, да не ветхостию времене и забвениа глубинами добраа помрачатся. Сего ради боговидного и пречистого образа его начрътаем собьства, на божество его невещественое ум того ради възносяще, иже сый сиание славы отчя и образ състава его, нося же всяческаа глаголом силы своеа, сам благоизволи сему всечестному и достохвалному делу быти, егда на плащаници въобрази пречестый свои образ единемь точию прикосновением, и сего посла к Авгару, на одре в недузе многа лета слежащу, иже точию прикоснуся ему, здрав быть2. И се видевше самовидци божествении ученици и апостоли его, написаша пречистый его образ, яко же видеша, и в древняя роды предаша писати и покланятися и почитати. И многа неизреченна быша чюдеса и знамениа, и болящим исцелениа от пречистого его подобна, и даже до ныне бывают. И яко же плоть въсприат от пречистыа его Матере, Аще и тленна и мертвена бысть преж въскресениа, но божество от нея неразлучно бысть никогда же ни в утробе, ни на кресте, ни в гробе, тако и пречистый его образ, Аще и от тленных вещей устрояется, но отнелиже въбразится от каковы вещи, оттоле божество его неразлучно пребываеть от него.
Сего ради подобает нам образ его, еже на иконе, почитати и поклонятися яко самому оному, а не иному; не мнети же, яко в божестъвеное его существо прелагается пречистый его образ: божиого бо существа невъзможно видети ни ангелом, ни человекомь; ниже мнети, яко се есть Христос в плоти: Христос бо неописан по божеству, и немощно есть ныне того зрети, разве егда приидет второе его пришествие; но яко се есть образ его по человечьству. И сего ради им же нравом образу честного и животворящего креста и святому еуангелию и святым божиим тайнам кажения и свещи и поклонение приносим, и почесть сим творяще; тако и пречистому и всечестному его образу почесть въздати и любовию покланятися, и честным целованиемь, страхом и трепетом, всечестне же и верне, ибо Бог быв неописан, человекь быти описан нас ради сподобися, въспоминающе же пръвообразное его. Се бо почесть иконная на пръвообразное въсходит, и в иконах и иконами почитается и поклоняется истинна.
Тако же и пречистыа владычица нашеа Богородица пречистый образ повелеша святии апостоли и божествении отци на святых иконах писати и покланятися того ради, яко и от пророк и апостол и от всех праведных духов сведетельствуема, яко въистинну Богородица сущи, и яко чиста душею и телом Еммануила породи нетленна, и яко Аще не бы чистое се и всенепорочное обрелося приателище божества, не бы спаслася всяка плоть, и яко всяка слава и честь и святыни, от самого того первого Адама даже до скончания века, пророком и апостолом, и мучеником и праведником, и преподобным и смереным сердцем, тоя ради единоя Богородица Мариа бысть, и бывает, и будет. Икону же её почитати и поклонятися, яко же самой оной, а не иной: егда бо божественный апостол Лука написа на дъсце начрътание пречистыа владычица и Богородица, принесе же госпожи и всех царици, она же очи свои възложившу на ту и глагола благоговейне и с властию: благодать моя с тою. И бысть слово дело, и чюдеса и знамениа и тмы чюдотворениа быша от пречистыа иконы от того часа и до ныне, идеже Аще въобразиться пречистый её образ, тамо и благодать её приходить пречестно сдействующи иконе Божиа Матере. Прибегающи же присно к пречистей сея иконе, тою бо обретаем вся благая ныне, и живота конець добре и непостыден, и иже по въздуху бесов рук и зрак тоя ради не узрим, и избежим дръжащих наша рукописаниа съгрешениа. И яко же въздушного дыханиа, призываниа её требуемь, яко же бо Сын её и Бог везде есть и вся исполняет, сице и сиа непреоделного Бога Мати, всем призывающим имя её, борзейши, нежели скорость молниа приходящи. И яко убо божество Сына её Иисуса Христа от естества отча, плоть же его от естества приснодевыа того Матере, яко же быти ему Сыну Божию, и Сыну Мариину и единосущну Отцю, и единосущну Матери, за самое то спасение мира, её же ради бысть с нами Бог.
Слово на ересь новоградскых еретиков, глаголющих, яко не подобает писати на иконахь Святую и Единосущную Троицю: Авраам бо, рече, видел есть Бога с двема аггелома, а не Троицу. Зде же имать сказание от божественых писаний, яко Авраам виде Святую Троицу, и яко подобаеть христианом писати на всечестных иконах Святую и Животворящую Троицу
Подобает ведати, яко вся убо заповеди Господа нашего Иисуса Христа дивна суть и полезна, понеже спасениа ради нашего речена суть; не хощет бо смерти грешнику, но всех хощеть спасти и в разум истинный привести, овех убо собою, овех же святыми пророкы и апостолы, и святыми и преподобными отци и учители вселеные. Враг же нашь дьявол не престаеть всегда искый кого поглотити и от правого пути отвести. Начен убо от Адама даже доселе, и многы прельсти, овех научи идолом покланятися, овех же убийству и прелюбодеянию и прочим грехом, овех же еретичеству, иже есть всех грехов злейше, и всякого безакониа сквернейше. Яко же и ныне се мнози пострадаша, и многа развращенна и буесловиа изглаголаша, и в многы ереси впадоша, ибо развращенно протлъковаша многа от божествных писаний, того ради от непорочной християнской веры в жидовъство отступиша: Алексея глаголю протопопа и иже единомудръствующих с ним, иже прежде в Велицем Новегороде, потом же в многие грады и места разсеевше жидовъское учение, и божественаа писания развратиша к своей погыбели. От них же ныне о едином речем, еже они зле мудръствують, яко не подобаеть, глаголють, живописати на честных иконах Святую и Животворящую Троицу: Авраам бо, глаголють, прият и учреди Бога с двема аггелома, а не Троицу. Обычай бо им есть вся божественнаа писания развратити и по своей ереси глаголати, тех бо дьявол на помощь себе обрете, яко ж Июду на распятии Господни.
Мы же обаче и не от себе умысливше, но от древних и божественых и пророческых писаний речем к ним, и увемы, яко Авраам виде Бога в триех лицех, сиречь Отца и Сына и Святаго Духа, глаголеть бо великый Моисей: "Яви же ся Аврааму Бог у дуба мамврийского» (Быт. 18, 1). Зри, что глаголеть: "Яви же ся Аврааму Бог", и како не рекл есть: «Яви же ся Аврааму Бог с двема аггелома», но о Бозе сказа, о аггелех же умолча. Явствено же есть всем прочитающим божественаа писаниа, яко многа убо суть божественнаа явленна к святым, но егда является един Бог, тогда и писание глаголеть тако, егда же с аггелы, тогда и писание глаголеть тако. Явися убо Ноеви Бог един; явися и Аврааму многажды един; яви же ся и Моисею многажды един; тако и писание сведетельствуеть. Егда же явися Иакову на лествици с аггелы, и Исаи на престоле седя и серафимы предстояще ему, и Даниилу яко Ветхый Деньми, и тмы тмами предстояху ему; се тако и писание глаголеть. Зде же писание не сведетельствуеть, яко явися Аврааму Бог с двема аггелома, но что глаголеть? «Явися же ему Бог у дуба Мамврíйска..., и възрев очима своима виде... три мужи стояща верху его, и притече к ним, и поклонися до земля и рече: Господи, Аще обрел есмь благодать пред Тобою, и не мини раба своего, да принесется вода, да омыются ногы ваша, и... да принесутся хлебы, да ясте... И рече жене своей Сарре: подвижися, смеси три спуды мукы чисты. А сам поим отрока, тече в стадо и взя телець избран, приведе и уготова. И взя масло и мед и млеко... и постави пред ними , и ядоша, сам же стояше пред ними» (Быт. 18, 1–8). Они же седяще вси три в едином месте, равни славою, равни честию, и ни един вящши, ниже менши, равно и послужение, равно и поклоняние от Авраама прияша. И Аще бы Бог был с двема аггелома, то како бы дръзнули аггели съпрестолни быти Богу? Нигде же бо во писаниих обрящеши, яко аггели съпрестолници быша Богу когда, но спрестолен есть Отцу Сын и Святый Дух, яко же сведетельствують божественаа писаниа, ветхаа же и новаа.
Но да видим убо и таинъство последующее сим. Яко же убо неизреченна и непостижима Святаа Троица, тако и Аврааму явися неизреченно и непостижимо и несказанно. И како убо Авраам, яко к единем и к тем же, овогда яко к трема, овогда же яко к единому глаголеть, еже бо рещи: «Господи, Аще обрел есмь благодать пред Тобою», к единому глаголеть, а еже: «Да омыются нози ваши» к трема глаголеть. И се убо речеся не просто от Авраама, но еже убо триех видети, а единем Господем нарицати, се единъство божества являеть, а еже к трем глаголеть, се являет, яко трисъставно и три лично есть божество. Но виждь ми таиньство велие и преславно, еже благоизволи Бог в дому Авраамли тогда сътворити. Прежде бо яви ему Святая Троица таиньство. Та ж и яде у него, хотя ему дати обеты благы, Исаково рождение в старости, еже проявляеть Спасово бессменное рождение. Вся бо сиа неизреченна и выше естества, и еже Богу в человечьском подобии быти, и бесплотному ясти, и еже неплодней в старости родити, и девей без мужа зачати и без истлениа родити: иде же бо прииде, иже выше естества, Бог, тамо вся выше естества, еже от вещей бывають. Пакы же глаголеть писание: «Рече же к нему Господь: где есть Сарра жена твоя? Авраам же рече: в сени. Рече же к нему Господь, по времени сем в чясе родить сын Сарра жена твоя» (Быт. 18, 9–10). Ведяще же убо Авраам, яко прежде сего Бог обещася ему, глаголя: «Сара жена твоя, не наречется имя ей Сара, но Сарра будет имя ей, ...и дамь тебе от нее чадо» (Быт. 17, 15–16). И како бы убо не познал Авраам, яко Бог есть явлейся, иже тогда обещася дати ему чадо, ныне же съвръши, еже обеща, Аще бо и благоволи Святаа и Единосущнаа Троица в образе человечи явитися Аврааму, но въскоре подасть ему разумети свое божество и силу. Пакы же глаголеть: «И въставши три мужи прямо лици к Содому и доста; Авраам же идяше с ними, проводя их. И глагола к нему Господь: не потаю аз от Авраама, раба своего, еже творю» (Быт. 18,16 – 17). И который странник, иже в худе образе, ниже въинства, ниже слугы предстояща имея, могл бы Авраама рабом нарещи, имущего многы рабы и многа богатства? И пакы глаголеть писание: «Авраам же... будет в язык велик и мног, и благословятся о нем вси языци земстии» (Быт. 18, 18). Се зде явися Аврааму известно, яко Бог есть явлейся, иже прежде к нему глаголавый: «Благословятся о тебе вси языци земнии». И ныне той же Бог такоже глаголя: «Благословятся о тебе вси языци земнии». Како убо Авраам уже известно уведе, яко се не человеци, но Бог есть явлейся, и равно трем послужи, и равно трех почте, и равно трем нозе омы. Не известно ли се есть и истинно, яко Святаа и Единосущнаа и Животворящаа Троица яви свое таиньство своему угоднику Аврааму, яко едина та есть и три, едина убо божеством и едина существом, три ж имать лица и три съставы. Глаголеть же писание по сем: «И... приидоша в Содом, ...отидеже Господь, яко преста глаголя к Аврааму, и два ангела отидоша в Содом" (Быт. 18:22, 33, 19:1). Виждь, яко един Бог Отец отиде, а два в Содом посылаеть, сиречь Сына и Святаго Духа 3. Бога бо Отца послана никогда же никим же. Сын же сам глаголеть о себе: «пославый мя Отец, той мне заповедь даде» (Ин. 12, 49). И о Святем Дусе Сын глаголеть: «Аще аз иду, иного утешителя послю вам от Отца» (Ин. 16, 7). Понеже и в начале, егда человека въсхоте сътворити Отець, тогда Сына и Святаго Духа к създанию убеди, глаголя: «Сотворим человека» (Быт. 1, 26). Егда же пакы восхоте раздрушити богоборный он събор, егда съгласишася създати столпь4, не без совета сего раздруши, но рекь Сыну и Святому Духу: «Приидите, съшедше, языкы их» размесим (Быт. 11, 7). Тако и зде творить. Егда убо въсхоте потребити скверный он и нечистый и дръзосный и сверепый род и праведника от смерти избавити, и тогда Сына и Святого Духа посылает, яко да покажеть в всем Святая Троица едину волю и едину власть и едино хотение. Яко убо о сих до зде.
Подобает же и о семь рещи ныне, яко мнози недоумеють о сем и глаголють: «Како святии и божествении отци и учителие наши пишють овогда, яко Святую Троицу приат Авраам, овогда же, яко Бога приат с двема аггелома, овогда же, три аггелы приат?» Сиа убо глаголы мнятся, яко съпротивны себе. Но не суть съпротивны, но и зело съгласны явятся и сведетельство имуще от божественых писаний, ветъхых же и новых. Глаголет убо великый Максим, яко всяко божествное писание, ветхое же и новое, о себе раздрешение не имат, Аще не отци святии, божественым исплънени духомь, яко же легю есть, скажут тако, яко же пишет: многаа бо в писаниих видятся, яко съпротивляющеся друг другу, и овогда убо сице глаголють, овогда же инако. Се же бываеть от нашего нерассужеииа, или от преобидениа, или от презорьства, словеса же святых мужей не изменяются.
Тако же, еже святии божествении отци наши рекоша о Святей и Животворящей Троици, съгласна обрящут, еже овогда глаголють, яко Авраам Святую Троицю приат, овогда же яко три аггелы приат, овогда же, яко Бога с двема аггелома приат. Глаголеть убо Иоанн Златаустый, яко Авраам изрядную любовь имяше к всем, сподобися приати Святую Троицу в кущу свою, и умы нозе Ея, и закла телець, и сътвори обед. И пакы той же глаголеть, яко убо Авраам страннолюбьствуя, Бога приат с аггелы. И пакы той же глаголеть: «Патриарх Авраам пред дверми седя, уловляше мимоходящаа, яко же бо рыболовь мрежю вверг в море извлачити рыбу, и извлечет злато или бисер, тако и сей ловя человекы, улови аггелы». Виждь что глаголет великый сей и равноапостольный муж: овогда глаголеть, яко Авраам Святую Троицю приат, овогда же, яко Бога приат з двема аггилома, овогда же глаголеть: аггелы приат. Подобие же тому и святый Иоан Дамаскын глаголеть: «Святаа и Единосущнаа Троица телесныма очима незрима, и како благоизволи в сени Авраамове учреждена быти», и пакы той же глаголеть: «Авраам, милуя нищих, съподобися Бога приати с двема аггелома». И святый Андрее Критьскый глаголеть: «У дуба Мамьврийского учреди патриарх аггелы». И святый Иосифь Песнописець глаголеть: «Видел еси, яко же мощно видети Святую Троицу и ту угостил еси, яко друг присный, преблаженне Аврааме!» И ина многа суть такова в божественых писаниих о сем, иже овогда убо глаголють, яко Авраам Бога приат с двема аггелома, овогда же глаголють: Святую Троицу приат, овогда же, яко три аггелы приат. И неразумеюще убо съкровенный разум в божественых писаниих, глаголють, яко не единогласуют в всем, но съпротивно себе глаголють. Но несть сего, ниже будеть! Но в всем зело едину мысль и един разум имуть. Но егда убо глаголють, яко Авраам Святую Троицу приат, се убо истинно и зело праведно, якоже и прежде речеся о сем в начале многажды в сем слове. Егда же глаголють, яко Бога с двема аггелома приат, или аггелы приат, и се зело истинно и праведно рекоша. Но сей глагол по премудрости речей бысть, и таиньство некое имат в себе, якоже глаголеть писание: «Тайна моя мне и моим» (Лк. 8, 10). Свои же суть Богу святии. Сего ради святии божествении отци не от себе, но от божественых писаний въземше, тако бо писаниа глаголють, и нарицають Бога овогда аггела, овогда человека. Исайа убо пророк пророк глаголеть: «Отроча родися нам, и Сын дастся нам, масло и мед снесть» (Ис.9:6, 7:15), се нарицает его человека. Егда же глаголет: «Нарицается имя Его Велика Совета Ангел» (Ис. 9, 6), се наречет его ангела.
Примечания редактора
Послание традиционно приписывается преподобному Иосифу Волоцкому (1440–1516), хотя в нем есть прямые совпадения с текстом письма преподобного Нила Сорского († 1508). При известных расхождениях по проблемам внутрицерковной жизни оба подвижника были единомысленны в иных вероучительных вопросах и, согласно средневековым понятиям о «литературной собственности», свободно пользовались заимствованиями. Не исключено и соединение их текстов позднейшим редактором. По мнению Л. А. Успенского, разным авторам принадлежат и тексты 2-го и 3-го «слов».
Текст «Послания» и трех «слов» печатается по книге: Казакова Н.А., Лурье Я. С. Антифеодальные еретические движения на Руси XIV – начала XVI в. Л., 1955, с. 323–370. Введены прописные буквы в написания собственных имен Божиих и Богоматери, разночтения опущены. Текст «слов» представлен в извлечениях.