Святитель Димитрий Ростовский. Творения.
Молитвенные стихословия
Первое Стихословие любезного к Богу взывания
1. Возлюблю Тя, Господи, крепосте моя! Господь утверждение мое, и прибежище мое, и Избавитель мой, Бог мой, Помощник мой и уповаю на Него, Защититель мой, и рог спасения моего, и Заступник мой, хваля призову Господа, и от враг моих спасуся (Псал. 17).
2. Коль возлюбленна селения Твоя, Господи сил! Желает и скончавается душа моя во дворы Господни. Сердце мое и плоть моя возрадовастася о Бозе живе. Блажени живущий в дому Твоем, в веки веков восхвалят Тя. Лучше день един во дворех Твоих, Господи, паче тысящ. Изволих приметатися в дому Бога моего паче, неже жити ми в селениих грешничих (Псал. 83).
3. Коль возлюбих закон Твой, Господи! Весь день поучение мое есть. Коль сладка гортани моему словеса Твоя! Паче меда устам моим. Сего ради возненавидех всяк путь неправды. Светильник ногама моима закон Твой и свет стезям моим. Оправдания Твоя вожделенна суть, Господи, паче злата и камене честна многа, и слаждша паче меда и сота (Пс. 118).
4. Коль благ Бог Израилев правым сердцем! Коль многое множество Благости Твоея, Господи, юже скрыл еси боящимся Тебе, соделал еси уповающим на Тя, пред сыны человеческими! Скрывши их в тайне лица Твоего от мятежа человеческа. Обаче Богови повинися, душе моя, яко от Того терпение мое, ибо Той Бог мой и Спас мой, Заступник мой: не подвижуся во век (Пс. 72; 30,61).
5. О Бозе спасение мое и слава моя. Бог помощи моея и упование мое на Бога. Уповайте на Него весь сонм людей. Излияйте пред Ним сердца ваша, яко Бог Помощник наш есть. Не уповайте на неправду и на восхищение не желайте. Богатство Аще течет, не прилагайте сердца. Единою глагола Бог, двоя сия слышах: зане держава Божия, и Твоя, Господи, милость, яко Ты воздаси коемуждо по делом его.
6. Боже, Боже мой, к Тебе утреннюю: возжада Тебе душа моя, коль множицею Тебе плоть моя, в земли пусте и непроходне и безводне. Тако во святем явихся Тебе – видети силу Твою и славу Твою, яко лучше милость Твоя паче живот. Устне мои восхвалит Тя, тако благословлю Тя в животе моем. О имени Твоем воздежу руце мои. Прилпе душа моя по Тебе, мене же прият десница Твоя (Пс. 62).
7. Имже образом желает елень на источники водныя, сице желает душа моя к Тебе. Боже, возжада душа моя к Богу крепкому живому: когда прейду и явлюся лицу Божию? Молитва Богу живота моего, реку Богу: Заступник мой еси, почто мя забыл еси, и векую сетуя хожду, внегда оскорбляет враг? (Пс. 41.)
8. Господь просвещение мое и Спаситель мой, – кого убоюся? Господь Защититель живота моего, от кого устрашуся? Едино просих от Господа, то взыщу: еже жити ми в дому Господни вся дни живота моего, зрети ми красоту Господню, и посещати храм святый Его. Взыска Тебе лице мое, Лица Твоего, Господи, взыщу (Пс. 26)
9. Готово сердце мое, Боже, готово сердце мое. Воспою и пою в славе моей. Востани слава моя, востани псалтирю и гусли: востану рано. Исповемся Тебе в людех. Господи, пою Тебе во языцех, яко велия верху небес милость Твоя, и до облак истина Твоя. Вознесися на небеса, Боже, и по всей земли слава Твоя (Пс. 107).
10. Ты еси, Боже, держава моя, разжи утробы моя и сердце мое, яко милость Твоя пред очима моима есть. Посли свет Твой и истину Твою: та мя настависта, и введоста мя в гору святую Твою, и в селения Твоя и вниду к жертвеннику Божию, к Богу, веселящему юность мою. Исповемся Тебе в гуслех, Боже, Боже мой. Вскую прискорбна еси, душе моя, и Вскую смущаеши мя? Уповай на Бога, яко исповемся Ему, спасение лица моего и Бог мой (Пс. 25,42).
Второе Стихословие любезного к Богу беседования
1. Добудет, Господи, сердце мое всегда уязвлено и уранено Божественною Твоею любовию, да глаголю присно с Пророком сия рачительная словеса: «уязвлен есмь добротою Твоею, женише мой сладчайший, в след Тебе теку, в воню мира Твоего, егоже вожделе душа моя. Где пасеши, и где почиваеши в полудни? Где возсияваеши свет? Где просвещае-ши тьму? Где утешаеши любимыя? Где рачители Твоя упокояеши и исполняеши их Божественное желание?» (Песн. 1).
2. О превожделеннейший Господи господей! О пресладчайший в сладостях премирных! О прелюбезнейший в любезных, всяк ум, всяку мысль превосходящий! О любы, кто ж Тя достойне возлюбит? Кто достойне к Тебе всем сердцем прилепится? Кто Тя достойне до сердца своего приимет? О Божественнаго Твоего желания! О Божественныя славы присносущнаго Твоего осияния!
3. О Боже мой! Что ми есть на небеси? И что вящше от Тебе восхотех на земли? Точию еще жити ми в Божественном Твоем желании. Сие точию едино да будет ми сокровище и вечное богатство. Сие точию едино да будет ми пища, и питие, и присносущное наслаждение. Сие точию едино да будет ми слава и похвала, велелепие же и одеяние светло, да совлекшися плоти, не наг в день страшнаго Твоего суда обрящуся; но с Тобою, Господем моим и Богом, во веки вечныя пребуду, никогда же отлучаяся (Пс. 72).
4. Господи! Все желание и воздыхание мое да будет в Тебе. Все желание мое и рачение мое в Тебе едином да будет, Спасителю мой! Все изволение мое и помышление мое в Тебе да углубится, и вся кости моя да рекут: Господи, Господи! Кто подобен Тебе, кто соравнится силе, благодати и премудрости Твоей? Вся бо премудре, и праведне, и благоутробне о нас устроил еси.
5. Разжи утробы моя и сердце мое яко милость Твоя пред очима моима есть. Разжи утробы моя и сердце мое, Боже живота моего. Разжи и умягчи душу мою, яко да вся истает и излиется пред Тобою, Господи, да весь буду в Тебе, Ты же во мне, Благодетелю мой! Да сице с Тобою – Богом моим – соединен быв, никогда от Тебе и Божественныя Твоея любве устранюся.
6. Где бо моей души имать быти непременное опочивание? Где уму пристанище? Где сердцу непреложная тишина и покой? Аще не в Тебе, Господи, – Аще не Ты Сам душу мою упокоиши, и присносущное утешение даруеши?! Вся бо мира сего радость – плач есть, всякое утешение его – скорбь и печаль, -всяко наслаждение земное – горесть и тяжесть души, – всяка любовь плотская -ложь есть и лицемерие, несть свойственна и известна души моей ни едина мира сего сладость; но Ты Един да будеши ми радость и веселие, и вечное присносущное наслаждение.
7. Да не любодействую в сердце моем от Тебе – Господа – моего с тварию; но да всем сердцем моим прилеплюся Тебе, всю тварь сотворшему, да ничтоже предпочитаю паче Тебе, – ничтоже возлюблю, кроме Тебе – Господа моего, – источника жизни. Да не возлюблю славы мира сего, и богатства исчезновеннаго, ни красоты телесныя, ни наслаждения плотскаго временнаго; но Ты Един да будеши моя слава и похвала, богатство и сокровище, пища и питие, и присносущное утешение.
8. Како Тебе не имам любити – Господа моего, Иже мя всего создал еси? О, Боже мой, како не имам к Тебе прилеплятися, Иже мя сотворил еси? Како не имам к Тебе присоединитися, Иже мя всего содержиши, живиши, питаеши, насыщаеши, печешися и промышляеши, вся благая и спасенная о мне дееши, и манием своим, якоже веси, устрояеши мне вся к полезному? Како не распалетмися окаянное сердце? Како не разжетмися мрачная душа? Како вся внутренняя моя не распаляется в Божественному Твоему желанию и любви?
9. Како же убо трава сый присоединен буду Божественному Ти огню, о Боже мой? Како тление временное соединюся Тебе всегда присносущному? Како мрачен сый прилеплюся к Тебе – невечернему свету? Како смертен присоединен буду безсмертному? Присоедини мя Ты Сам, Господи, якоже веси, благодетелю мой! Просвети, научи мя воли Твоея святыя, распали, разжи душу мою Божественною Твоею любовию, да ничтоже ино возлюблю, токмо Тебе – Единаго Источника жизни и безсмертия.
10. О, Боже мой! Возсияй мне свет Твоего разума, просвети мрачную ми душу, распали и разжи сердце мое и утробы моя, яко огнь, к Божественной Твоей любви, о Создателю мой да выну славлю, величаю и воспеваю Твое пресвятое имя и неизреченное человеколюбие. Яко Ты нас присно милуеши, ущедряеши и защищавши уповающих и надеющихся на Тя. Яко Тебе подобает всякая слава, честь и поклонение, со безначальным Ти Отцем, и Пресвятым и благим и животворящим Твоим Духом, ныне и присно, и во веки веков, аминь.
Третье Стихословие рачительного к Богу вопияния
1. Почто Тебе, Господа моего, всем сердцем моим не люблю? Почто все желание мое и хотение мое Тебе не отдам? Почто всею душою моею и всем помышлением моим во Твою пресвятую любовь не углублен есмь? Ты бо мя всего сотворил еси и вся туне ми даровал еси. Весь есмь от Тебе, весь есмь Твой, весь да буду в Тебе! Почто отязуюся и с зельным усердием к Тебе не припаду? Ты бо от небытия в бытие привел мя еси и непрестанно печешися о душе моей, о Боже мой! Ты мя питаеши, живиши мя, защищаеши, сохраняеши, покрываеши душу мою, даруеши ми крепость, здравие, окормляеши, вразумляеши, просвещаеши, пособствуеши и наставляеши мя на всякая дела благая, вся благая и спасенная о мне дееши, о, Боже мой!
2. Како убо Тебе аз любити не имам, Господи мой? Како к Тебе не имам прилеплятися? Ты бо ми еси Бог Един, Источник жизни и податель всех благ, Творец мой и Господь. Вси удаляющиися от Тебе погибнут, вси не взыскующии Тебе не спасутся; потребил бо еси всякаго любодеющаго от Тебе. Вси богатии в плотских страстех, истинно не взыскующии Тебе обнищаша и взалкаша: взыскующии же Тебе не лишатся всякаго блага. Темже день и нощь к Тебе да утренюю, день и нощь да Тебе жажду, о Боже мой, и всем сердцем люблю Тя! Едино просих от Тебе – Господа моего – то взыщу, – еже жити ми в дому Твоем вся дни живота моего, еже зрети ми красоты Твоя и посещати церковь Святую Твою. Тебе рече сердце мое: Господа взыщу. Взыска Тебе лице мое. Лица Твоего, Господи, взыщу.
3. Како Тебе не имам любити – Господа моего? Ты бо мой еси живот, Ты еси мое спасение, Ты еси моя слава и похвала, Ты еси мое богатство и вечное сокровище, Ты еси мое радование и вечный покой. Лучше ли ми любити вещь суетную, вещь неизвестну, вещь превратну, вещь погибельну, ложну, – неже Тебе, истиннаго живота моего. Сего ради всю надежду мою, все упование мое, все желание мое в Тебе Едином да полагаю, Господи, все сердце мое, всю душу мою, вся помышления моя в Тебе Едином да углублена имам, вся внутренняя моя, членове и мозги Тебе единому да излию, да весь буду в Тебе, Ты же во мне; да увем и познаю Тебе воистину единаго истиннаго Бога и Господа, и егоже послал еси Иисуса Христа, и во свете Твоем узрю свет благодати Твоего Пресвятаго Духа.
4. Камо пойду от Тебе – Господа моего? И от лица Твоего камо бежу? – Аще взыду на небо; Ты тамо еси; Аще сниду во ад, тамо еси; Аще возму крыле мои рано и вселюся в последних моря, и там бо рука Твоя наставит мя, и удержит мя десница Твоя. Камо пойду и где обрящу инамо живот вечный, Аще не в Тебе – Создателе моем? Где инамо обрящу утешение и радость, пристанище и покой души моей, Аще не в Тебе, Господи Боже мой? Камо от Тебе пойду? Ты бо глаголы живота вечнаго имаши в Себе. Ты еси источник живота и податель всех благ. Возжада Тебе душа моя, возжада Тебе сердце мое, Боже живота моего! Да усладитмися Твое пресвятое имя – пресладкаго Господа моего ИИСУСА, да уранена будет им душа моя, да уязвлено будет мое сердце, да ничтоже имам любезнейше во всем житии моем, паче Твоего пресвятаго имене. Да будут сладчайша словеса Твоя гортани моему и устам моим – паче меда; и оправдания твоя да вожделенна ми будут, Господи, паче злата и камене честна многа, и сладша паче меда и сота!
5. Что убо душа моя возлюбит в веце сем? Что возжелает? О чесом восхощет утешитися, Аще не о Тебе Едином Господе Бозе моем? Аще бо возлюбит пищу и питие, – прельщается, временна бо и тленна суть. Аще возлюбит славу, красоту и почитание мира сего, – всуе мятется, преходит бо и погибает вскоре. Аще возлюбит злато и сребро, – не весть кому собирает, вся бо зде на земли останут, в прах и пепел пременятся. Несть нигде в сих известнаго утешения и покоя, душа бо, от свойственнаго свойства отторгшаяся, нигде имать мира и покоя, Аще не к Тебе, Господу своему паки обратится, отнюду же бытие свое имать; – Аще не Тебе всем сердцем своим возлюбит, – Аще благодати Пресвятаго Твоего Духа не будет причастна, – ничимже возможет известно утешитися и возвеселитися.
6. Всуе мятется всяк человек живый, не любяй Тебе – Господа своего; всуе труждается всяк земнородный не прилепляйся к Тебе всем сердцем своим, и не взыскуяй Тебе день и нощь. Почто и живет человек? Почто и родился есть в мир? Аще вотще изнуряет дни своя; всуе бо и течение его есть, – Всуе нарицает имя Твое святое не любяй Тебе – Господа своего, Источника жизни и подателя всех благ. Уязви душу мою Божественною Твоею любовию, о Создателю мой! Урани сердце мое, Содетелю всея твари! Аще бо к Тебе не прилеплюся – Господу моему, – что убо творити буду? Аще к Тебе не присоединен буду, – что содею не ведя? Аще от пути Твоего праваго отвращуся, в последняя злая впаду; к Тебе бо присоединение – живот есть. от Тебе отчуждение – вечная смерть, и погибель и безконечная мука. Присоедини мя Ты Сам, Господи, имиже веси судьбами, яко человеколюбец и прещедрый Господь.
7. Почто предпочитаю суету и сласть тленную, – предпочитаю славу временную, красоту смрадную, богатство исчезновенное? Предпочитаю всякую злую вещь, паче Тебе -Господа моего, Благодетеля прещедраго? Кое мое безумие? Кая моя слепота? Увы мне грешному! Увы мне окаянному! Увы мне помраченному! Но обаче даруй ми сие, о Боже мой! Яко да ничтоже возлюблю в веце сем, кроме Тебя – Господа моего, да не возлюблю богатства, славы, сласти, красоты и тления; но Тебе точию, Единаго Создателя моего, всем сердцем моим, и всею душею моею возлюблю, и ничтоже предпочитаю, паче Твоея любве.
8. Что убо ино любити имам, Аще не Тебе – Господа моего и Создателя. Иже мя всего сотворил еси, и всего мя манием Своим содержиши, питаеши, живиши и вся к полезному устрояеши, якоже Сам веси, Господи? Или лучше ми любити вещь суетную, вещь превратную, нежели Тебе – Господа моего и Создателя? Или лучше ми любити тварь, неже Тебя Творца твари, – создание, неже Тебе Создателя? Аще бо Тебе – Господа моего всем сердцем не возлюблю, – что убо иное любити имам? К иному ли чесому прилеплюся? Или иною коею вещию порабощен буду?
9. Не лучше ли капле при источнике, розге при корени, уду при главе? Ей, всяко лучше, Сице и при Тебе – Господе Бозе моем – не лучше ли есть? Ты бо ми еси Господь Един, прибежище мое и утешение, – Ты ми еси едина надежда и упование. Иного пристанища и утешения не имам, иныя надежды и упования, разве Тебе Бога моего, не знаю. Ты еси мой заступник и покровитель; Ты еси моя слава, и держава, и присносущное радование.
10. Но убо молю Твое благоутробие, о Создателю мой, Господи! Прими мя в любовь Твою святую, просвети мою душу, уясни мой разум, о Благодетелю мой! Да уранитмися Твоею Божественною любовию душа, да уязвлено будет мое сердце, да свяжется ею крепце, и пленена будет вся в Твое Божественное желание и любовь. Да пронзет и проничет всю душу мою, во всех частях, да ни едина часть, да ни едина клеть души моея останется кроме ея, да отверзеши вся заклепы души моея, да просветиши вся моя чувства, да утвердиши и упокоиши я в душе моей, да весь буду в Тебе, Ты же во мне. Да Твое Пресвятое имя славлю, воспеваю и величаю, со безначальным Твоем Отцем, и с Пресвятым и благим и животворящим Твоим Духом, всегда, ныне и присно, и во веки веков, аминь.
Четвертое Стихословие желательного к Богу восклицания
1. Любовию Твоею Божественною да уязвлено будет сердце мое, о Боже мой! Да взыщу день и нощь Тебе – Господа моего; да всею душею моею к Тебе присоединен буду; да жегома и палима будет душа моя Божественным Твоим желанием; да присно сие имам души моей во утешение; да присно сие имам себе в тихое пристанище и непреложный покой. Все желание и рачение мое в Тебе Едином да будет, Господи! Да весь в Божественную любовь Твою углублен буду, и соединен бывши; никогда же от Тебе – Господа моего отлучаюся!
2. Да ничтоже мя отторгнет, да ничтоже мя отлучит от Божественныя Твоея любве, о Боже мой! Да ничтоже пресечет, ни огнь, ни меч, ни глад, ни гонение, ни глубина, ни высота, ни настоящая, ни будущая; точию едино сие да пребудет в душе моей выну! Ничтоже ино да возжелаю в веце сем, Господи; но день и нощь да взыщу Тебе – Господа моего. И, да обрет, вечное сокровище прииму, и богатство стяжу, и всех благ сподоблюся.
3. Все упование мое, всю надежду мою в Тебе да полагаю; все сокровище мое, все богатство в Тебе да имам; вся слава и наслаждение мое в Тебе Едином да будет, Господи! Сим единем не прельщуся, ниже вотще теку, но сие едино да пребудет со мною во веки веков! Да прииму благую часть, яже не отымется от мене во веки веков; день и нощь беспрестани да вопию к Тебе, о Боже мой! Да с Пророком всегда глаголю: От нощи утреннюет дух мой к Тебе Боже, зане свет повеления Твоя на земли; день и нощь да взыщу Тебе – Господа моего яко да обрящу Тебе – Источника жизни, и утолю жажду души моея!
4. С Пророком к Тебе всегда да глаголю, о Боже мой! Не дам сна очима моима, ни веждома моима дремаиня, дóндеже обрящу место Тебе Господеви моему, селение Богу Иаковлю; не дам опочивания, не дам покоя, дóндеже обрящу Тебе искомаго, и получу желаемаго; всяка бо слава и богатство мира сего суета есть; всякое земное наслаждение и похоть плотская прелесть есть. Сие точию едино не прелестно есть, еже Тебе Единаго – Господа моего возлюбити всем сердцем моим и всею душею моею; ничтоже предпочитати паче Твоея любве, сие бо точию едино имать ми пребыти в вечное утешение и радость.
5. Чтобы убо ино сердце мое возлюбит в веце сем? Что ино возжелает кроме Тебе -Господа моего, от всея умныя твари превожделеннаго и воспеваемаго? Пища и питие временно и тленно есть, богатство и имение исчезаемо и погибаемо, слава и честь преложна и переменна есть. Ничтоже постоянно и непревратно, точию Ты Един сам еси вечен и непременен. Сего ради Тебе точию Единаго наипаче да возжелает и всем сердцем да возлюбит моя душа; всюду бо пуст и наг обрящуся, Аще к Тебе всем сердцем моим не прилеплюся, – всюду болезнен, скорбен и печален буду. Приторгни Ты Сам, Господи, якоже веси, и уязви сердце мое Божественным Ти желанием. Присоедини душу мою и вся помышления моя к Божественной Твоей любви, Создателю мой – Господи!
6. Где убо душа моя пойдет? Где обратится? Где обрящет тихое пристанище? Где найдет непреложный покой? Аще не в Тебе Едином – Господе Бозе моем. Что ино возлюблю? Что ино возжелаю? Или к чесому иному прилеплюся? Аще не к Тебе Единому – Господу моему. Ты бо еси Бог мой, Господь и Создатель. Ты еси моя слава, держава и великолепие. Да не скитается семо и овамо моя душа, да не любодействует в вещех суетных мое сердце, да не связуется и пленится вещьми мимотекущими, да не порабощается и пленится вещьми суетными и превратными; но да Тебе точию Единаго Тихаго Пристанища всею крепостию своею придержится, и никогда же отлучается.
7. Исполни Божественныя Твоей любве душу мою, о Боже мой! Излей на мя пресвятую Твою милость, ороси воду Пресвятаго Твоего Духа, даждь ми воду пресвятыя Твоея благодати, даждь ми воду сию Господи, да ктому не возжажду, ни прихожду в тленныя сея сладости кладязи, к студенцу клятвенному Иаковлю; всяк бо пияй от воды сея – земных сластей возжаждется паки, а иже пиет от воды Твоея благодати, юже Ты Сам даеши, не возжаждется во веки, но будет в нем источник воды, текущий в живот вечный, яже есть Дух Святый. Да Божественныя Твоея благодатныя воды причастник быв, совершенне насыщуся, внегда явитмися слава Твоя!
8. Возврати Господи пленение наше, яко потоки югом; растопи лед замерзшия души моея; повей югом Своего прещедраго человеколюбия; да истекут воды и реки Твоея благодати от окаяннаго ми сердца. Пронзи и уязви душу мою Божественным Твоим желанием, да прочее в сердце моем о вещех суетных не любодействую. Насыти душу мою Божественныя Твоея манны, да ктому не возвращуся ко Египетским мира сего тленным сластем, ниже да желаю многомятежных котлов и чеснока Египетскаго, ум помрачающаго; но да сия манна благодати Пресвятаго Твоего Духа будет ми во всякое благоугождение, и вечное веселие, и радость души моея. Где бо инамо имам искати радости? Ты еси моя истинная радость. Где имам инамо искати живота? Ты еси мой живот. Где инамо далече имам искати богатства? Ты еси мое богатство и вечное сокровище.
9. Даждь ми, Создателю мой, познати истинно Тебе Единаго истиннаго Господа Бога моего, и егоже в мир нас ради послал еси – Спасителя миру, Господа нашего Иисуса Христа, и причастником быти благодати Пресвятаго Твоего Духа, да сице знаю свое свойство к Тебе, якоже знати должен есмь, – да сице к Тебе присоединюся, якоже весь от Тебе есмь, моя бо плоть – не моя, но Твоя, Господи, моя душа – не моя, но Твоя, Спасителю мой, моя вся чувства: зрение, слышание, вкушение, обоняние – не моя, то Твоя, вся суть, Господи мой. Весь аз есмь, весь живот мой – не мой, но Твой, Господи, моя вся – не моя, но Твоя вся суть, Благодетелю мой! Туне все от Тебе имам, туне все от Тебе приях.
10. Прибежище, стена и заступление мое – Ты Един Сам да будеши, Господи! Пристанище же и утешение мое – Твоя Божественная любовь; Ты бо Един ми еси Господь, Ты же и сила, Ты ми еси Бог, Ты ми радование, Ты еси моя слава и велелепие. Ты еси моя похвала и упование, весь еси желание, весь еси сладость, о Боже мой! Пребывавши бо весь во веки вечныя, никогда же изменяяся. Ты Един – утешение мое и вечное наслаждение да будеши, Господи! Радость же и веселие Пресвятая Твоя Божественная любовь. Сего ничтоже лучше и честнейше, ни на земли, ни на небеси, да имам. Сие ми паче всех сокровищ да будет честнейшее, паче многоценных адамантов дражайшее. Паче сего ничтоже вящше да вожделею; паче сего ничтоже вящше да взыщу; но сим единем доволен буду в веце сем, паче же в грядущем.
Пятое Стихословие прежелательного к Богу благодарения о благодеяниях Его
1. Благодарю Тебе Господа моего, благодетеля прещедраго, яко сотворил мя еси по образу Своему и по подобию, и от небытия в бытие привел мя еси, славою и честию венчал еси. Не сотворил мя еси зверем, ни скотом, ни инем коим животным, но человеком, разумною тварию; безсмертием и самовластием душу мою почтил еси. Аще бо и разлучаемся временно плотию, но на лучшее преселение преходим, душею же безсмертне пребываем во веки, не на тысячу лет, не на две, или три тысячи, но во веки вечныя, конца неимущия. Аще бо кто благодарен и виновен бывает врачем за малое точию некое недуга врачевание, – колико аз паче, Господи, Иже мя всего цела, действенна, жива, здрава от небытия в бытие привел еси, и во веки безконечныя устроил мя еси!
2. Благодарю Тебе Господа моего, Благодетеля прещедраго, яко вся мене ради туне сотворил еси: мене ради – небо, земля, солнце, луна и все звездное небесное украшение; мене ради – зверие, скоти, птицы пернаты, всяко животно; мене ради – моря, реки, источники, озера, рыбы, киты превеликия; мене ради – леса, дубравы, пустыни различныя, древеса плодоносна; мене ради – зелия, корения, семена, овощия различна; мене ради – вся видимая и невидимая сотворена суть, о Боже мой!
3. Благодарю Тебе – Господа моего, Благодетеля прещедраго, яко вся о мне праведне и милосердие устроил еси, и непрестанно промышляеши о душе моей: защищавши мя, сохраняеши мя, покрываеши, заступавши душу мою, даруеши ми крепость, здравие, живиши мя, вразумлявши мя и просвещавши, пособствуеши и помогавши ми, руководствуеши, и наставлявши мя на всякая дела благая. Вся праведне, и милосердие, и благоутробне о мне устроил еси.
4. Благодарю Тебе Господа моего, Благодетеля прещедраго, яко Ты Бог всесилен сый, мене ради, человек был еси, а мене соединиши Себе во едино. Не возгнушался еси взяти наша на Ся, яко да нам всего Себе отдаси. Мене ради – во яслех положен был еси; мене ради пеленами повит был еси, одеваяй небо облаки; мене ради – осмидневне обрезан был еси; мене ради бежал еси во Египет; мене ради – во Иордан крестился еси; мене ради – пречистую главу Свою Предтечи приклонил еси, да мене вознесеши горе; не требуя крещения, мене ради крестился еси, да мене очищение крещением подаси.
5. Благодарю Тебе Господа моего, Благодетеля прещедраго, яко мене ради – биен, безчестим, оплеван, заушен, связан, терновым венцем увязен был еси. Мене ради – кровь Свою пречистую излиял еси. Мене ради умер еси плотию, да оживши мя духом и жизнь вечную ми подаси. Мене ради – во гробе положен был еси. Мене ради – тридневно из гроба воскресл еси, да всем нам из гроба воскресение даруеши.
6. Благодарю Тебе – Господа моего, Благодетеля прещедраго, яко, Аще и тьмами тем пред Тобою согрешаю, – милостив приемлеши мя кающагося. Колико аз пред Тобою согрешаю? Ты же единаче мя не отметаеши. Колико пред Тобою преступаю? Ты же не отвращаеши мя. Колико падаю? Ты же возставляеши мя, долготерпиши, не абие смерти мя предаеши, даже до последняго издыхания, даже до последния кончины, когда обращуся к Тебе, когда к Тебе припаду, каяся: Ты же милостивые кающагося мя приемлеши.
7. Благодарю Тебе Господа моего, Благодетеля прещедраго, яко дал еси закон Твой пред очи мои, дал ми еси увидети волю Твою Святую, не отринул мя еси крещения, не оставил мя еси во иноверстве, или пагубной ереси погружену быти, причастника мя пречистым Твоим тайнам сотворил еси, кровию Своею искупил еси, наследника мя царствия небеснаго соделал еси!
8. Благодарю Тебе Господа моего, Благодетеля прещедраго, яко исторгнул мя еси от молвы и мятеж мира сего, и привел мя еси во ограду словесных овец Твоих, и избрал мя еси Себе в служение, – служителя мене соделал еси Себе, Аще и недостоин есмь. Обильно благодать Твою надо мною простерл еси, удобен путь ко спасению мене показал еси. – Вся мене открыл еси, вся пред очи мои предложил еси, ничтоже от мене утаено оставил еси.
9. Благодарю Тя Господа моего Благодетеля прещедраго, яко ни в чемже мя скудна оставил еси, но во всем изобилую: не терплю глада и мраза тленных ради вещей, не волнуюся не потопляюся в реках, не претерпеваю бед на пути ради житейских вещей, не смущают мя великия долги, не налегают мя царския зельныя дани, не изгоняют мя на работу нуждную, плавания нуждная морская не предлежат ми, ничтоже от сих претерпеваю, яко же прочий человецы терпят, и тьмами тем страждут, дани дающе многи, скорби и напасти терпяще. Аз же вне сего есмь, Твоею пресвятою благодатию, свобод, Аще бо и потруждуся в чем, и претерплю что мало; но и се не ради тленных, но ради пребывающих во веки. Тако, глаголю, удобен путь показал ми еси ко спасению, Господи, удобно царство небесное устроил еси, туне все нам даровал еси!
10. Благодарю Тя Господа моего Благодетеля прещедраго, яко малаго ради некоего благоугождения, жизнь вечную, царство небесное дати ми обещал еси. Сам сотворивый, Сам создавый мя, и вся ко благоугождению давый, жизнь вечную туне даруеши, не на время некое мало, не на время некое кратко, не на сто лет или на тысящу, или тысящи тысящей, но во веки вечныя, конца не имущия. Слава неисповедимому Твоему милосердию, Господи! Слава пречудному устроению Твоему, Пресвятый Царю! Слава неизреченней и непостижимей Твоей благостыни и премудрости, Человеколюбче Господи! Яко Тебе подобает всякая слава, честь и держава, со Отцем и с Пресвятым и благим и животворящим Твоим Духом, ныне и присно и во веки веков, аминь!