Святитель Димитрий Ростовский. Творения.
Псалтирь Божией Матери

Кафисма 1

Псалом 1

Блажен муж, иже любит имя Твое, Приснодево Мати Марие: благодатию Твоею душа его утвердится, и яко древо, при исходищах вод насажденное, множайшия плоды правды изнесет. Благословенна Ты в женах ради смирения и веры сердца Твоего; всех бо жен побеждаеши красотою Твоею, превосходиши Ангелов и Архангелов святынею, милости и щедроты Твоя везде проповедуются; Бог дела рук Твоих благословил есть.

Псалом 2

Госпоже, чесо ради шаташася язы ́цы, стужающии ми? Бурею ужаса и страха посрами и низложи их; да покрыет нас десница Твоя: расточи тучи беззаконий наших, возьми бремя грехов наших. Приидите к Ней вси труждающиися и обремененнии и упокоит вас, приступите к Ней в напастех ваших, и осветит вас просвещение лица Ея; благословите Ю всем сердцем вашим: милости бо Ея полна земля.

Псалом 3

Госпоже, что умножишася видимыя и невидимыя врази, стужающии ми? Бурею праведнаго гнева Твоего да развееши их. Помилуй мя, Госпоже, и исцели немощи моя, согрей оледенелое сердце мое и не предаждь мене в руки душевных врагов моих; в день смерти моея предстани в помощь души моей, приведи мя ко пристанищу спасения. Слава Тебе, безпомощных Заступнице.

Песнь вместо славы

Тя, Матерь Божию, хвалим, Тя, Марию Приснодеву и Богородицу, исповедуем, Тя, от Превечнаго Отца избранную, вся земля величает; Тебе вси Ангели и Архангели, Тебе вси Начала смиренно служат; Тебе вси Власти и превышния Силы небесныя, и вся Господствия повинуются; Тебе вси Престоли, Тебе Херувими и Серафими радующеся предстоят, Тебе вси ангельския лики непрестанным гласом вопиют: Пресвятая Богородице Марие, Мати Приснодево! полны суть небеса и земля величества славы чрева Твоего; Тебе преславный апостольский лик своего Творца и Спасителя Матерь восхваляют; Тебе мучеников множество Богородицу величают; Тебе преславный исповедников лик Святыя Троицы храм нарицают; Тебе девственнии полцы своего девства образ проповедуют; Тебе вси святых души преславную Царицу небес нарицают; Тебе по всей вселенней святая Церковь всех верных христиан исповедует Матерь Божию и почитает истиннаго Царя Небеснаго Богоизбранную Отроковицу; Ты Ангелов Госпоже и всех святых слава; Ты райская отверстая дверь; Ты лествице Царствия Небеснаго; Ты Царя славы прекрасный чертоже; Ты неистленный ковчеже благодати; Ты бездна щедрот; Ты прибежище грешных; Ты, благословенная Мати Спасителя Христа; Ты, ради освобождения плененнаго человека, Бога восприяла еси во чрево от Духа Святаго и Невместимаго вместила еси; Тобою попран бысть адский враг и отверзошася верным двери Царствия Небеснаго; Ты одесную Бога стоиши; Ты Его умоляеши за нас, Приснодево Марие, Иже будет судити живых и мертвых; Тя убо желаем всегда быти нашу Заступницу к возлюбленному Сыну Твоему и Богу, Иже честною кровию нас искупил есть, да восприимем вечныя славы обетование. Спаси люди Твоя, о, Владычице, и благослови достояние Твое, яко да будем причастницы блаженнаго наследия Сына Твоего, и упаси нас, и возьми нас даже до века, на всяк день. О, Прещедрая! хвалити и блажити Тя желаем сердцем и устнами. Сподоби, Премилосердная Мати, ныне и всегда без греха сохранитися нам. Помилуй нас, Заступнице, помилуй нас, да будет милость Твоя с нами, яко уповаем на Тя, соблюди нас, Премилосердная, во веки веков.

Тебе подобает хвала, Тебе подобает слава, Тебе подобает пение ныне и присно, и во веки веков, аминь

Псалом 4

Егда призвах Тя, Госпоже, с верою и надеждою на Тя, услышала мя еси и от рыкающей поднебесной злобы, приуготовившейся снести мя, и от хищных рук, ищущих души моея, милостию Твоею защитила и избавила мя еси, понеже блага милость Твоя на всех, призывающих имя Твое святое. Благословенна Ты в женах, Госпоже, во веки и владычество Твое вознесеся во век века.

Псалом 5

Глаголы моя внуши, Госпоже, и не отврати от мене матернее лице Твое, обрати плач мой в радость и сетование мое в веселие, да падут пред ногами моими врази мои, многомощными молитвами Твоими гордыя главы их сокруши, да благословит Тя всяк язык и имя Твое исповесть всяка плоть. Благословенна еси, о, великаго Царя небеснаго Дщи: Ты еси венец всей святыни, Ты еси слава горнему и дольнему Иерусалиму; благословящии Тя избыточествуют в трудех своих, благословящии Тя будут благословенны, клянущии Тя проклянутся; да не умалится от дому рабов Твоих вина и елея изобилие. Благословляем Бога, создавшаго Тя, благословени родители Твои, рождшии Тя; благословенна еси, Госпоже, на небеси и на земли, хвальна и препрославленна во веки веков.

Псалом 6

Госпоже, да не яростию Своею обличит нас, грешных, правосудный Господь, ниже гневом Его накажемся; Ты, Заступнице наша, да попечешися о нас и ради святаго имени Твоего от врат адовых и от чрева мрачныя бездны Твоими молитвами избави нас, да поведаем во веки чудеса Твоя, понеже не мертвии, ниже сушии во аде восхвалят Тя, но мы, живии, благодатию Твоею благословим Тя.

Песнь вместо славы

Слава Тебе, Мати Божия, верных прибежище, избавление в лютых содержимых, душе моей Божественное утешение. Всеокаянную душу мою, Благодатная, уязвленную стрелянии злобнаго ратника, вручаю всесильному предстательству Твоему, юже соблюдай, и покрывай, и спасай от бесовских козней невредиму, да зову Ти: радуйся, Невесто Неневестная!

Псалом 7

Госпоже моя, на Тя уповах; от врагов избави душу мою, яко да во смирении моем благоугожду Тебе; светлость лица Твоего да облистает душу мою и воззрение Твое на мя милостивное да освятит совесть мою, и принесу Тобою молитвы и моления к Вышнему.

Псалом 8

Госпоже, Господь наш бысть Тобою Спаситель и брат наш; яко огнь в купине и роса на руно, на Тя сниде предвечное Божие Слово, Духу Святому нашедшу, осени Тя сила Вышняго; благословен зачатый в Тебе плод чрева Твоего, благословенно рождество Твое девственное, благословенна чистота плоти Твоея, благословенны щедроты сердца Твоего: слава Тебе, всех верных усердная Заступнице.

Песнь вместо славы

Радуйся, Прещедрая милости Мати, спаси благодатию Твоею всех, призывающих Тя во истине, в уединении сущим буди утешением, во искушениях- прибежищем: помощи Твоей вручаю душу и тело мое, управи, научи, что ми подобает творити, да спасуся.

По 1-й кафисме тропари, гл. 1

Просвети, Благая, омраченную душу мою, и нечувствие прожени, и научи мя творити волю Сына Твоего, яко да оставление многих моих грехов получу молитвами Твоими.

Подаждь ми, Дево, умиление, слез излияние обильное, источившая нам бездну щедрот, изсушающую зол наводнение и страстей токи, едина Пречистая

Приближается Судия, при дверех конец, бодрствуй, душе, и из глубины сердца возопий Матери Бога нашего: избави мя страшных мук, и в месте светлем всели Твоим, Владычице, предстательством

Молитва

Владычице Богородице, Человеколюбивая Госпоже моя, Ты веси помышления и дела моя и немощь моего естества. Тебе душу мою, юже оскверних грехми и непотребными помыслы, представляю. Ты бо, Владычице, веси гной моих язв, телесных и душевных, Ты же и исцеление оть них даруй, возливающи каплю Твоего человеколюбия и милости. Призри убо, Владычице моя Богородице, милосердым Твоим оком на окаянную мою душу, одержимую тягостию греховною и готову сущу огню предану быти от Праведнаго Судии. Но молитвами Твоими, Человеколюбице, благоприятна сотвори Своего Сына и всех Бога, хотящаго мя обличити пред Ангелы и человеки за мои худыя помышления и дела. Послушает бо Тебе, яко Благ и Человеколюбец, о душе моей окаянней молящуюся. О, прибежище верных, помилуй мя, валяющагося в бездне греховней, но приносящаго Ти воздыхание от сокрушеннаго сердца, да Твоего ради заступления сподоблюся прощения многих моих грехов. Тебе бо нам прибежище положил есть Сын Твой Бог. Ей, Господи, Господи, изволивый милосердия ради Твоего родитися от Чистыя Матере и Приснодевы Марии, спасения ради человеческаго, приими сию Ходатаицу о моем недостоинстве. Тоя ради помощи и заступления припадаю к Твоей безмерной благости и человеколюбию, да получу прощение грехов моих, ими же волею согреших пред Тобою, Господи. Яко Тебе подобает всякая слава, честь, со Отцем и Святым Духом, ныне, и присно, и во веки веков. Аминь.

Кафисма 2

Псалом 9

Исповемся Тебе, Госпоже, всем сердцем моим и повем в людех вся чудеса Твоя, хвалу и славу Твою; по Господе Бозе Тебе подобает слава и Тебе да вознесется сердечный глас хвалы; кающиися бо грешницы у Бога и в Боге обретают спасение Тобою; воздохнут они смиренне и Ты, сердобольная Мати, исцеляеши сокрушение сердец их, в мире и тишине по трудех странствия своего, при Твоем утешительном предстательстве, почиют они о Господе.

Псалом 10

На Госпожу Пречистую Деву Марию уповаю ради щедрот и милости Ея: очи Ея на нищих призирают и руце Ея к сиротам и вдовицам простерты; взыщите Ю от юности вашея и прославит вас пред лицем Бога ходатайство Ея к престолу Его, отымет множество наших грехов, милость и утешение небесное всегда Она нам приносит. О, Приснодево Преблагословенная, простри к нам крепкую десницу Твою, со благоговением ю лобызаем, и не отврати от нас лице Твое.

Песнь вместо славы

Пресвятая Дево, Мати Христа Бога нашего, смиренно молюся ти: души моея страсти лютыя исцели и прощение даруй моим многим прегрешениям, ихже безумне содеях аз. Душу и тело оскверних окаянный, увы мне, что сотворю в час он, внегда грознии Ангели душу мою разлучат от страстнаго моего телесе? Тогда Помощница ми буди и предстательница теплейшая, Тя бо имам твердую и необоримую стену, раб Твой.

Псалом 11

Спаси мя, Мати Премилостивая, источниче благостыни и бездна щедрот; коль красны суть путие Твоя и коль мирны стези Твоя! В Тебе сияет небесная доброта чистоты, свет правды, и светлости, и истины; паче солнечнаго света одеяна еси ризами позлащенными, преиспещренными, преукрашенными красотою чистейших Твоих добродетелей; дванадесять пресветлых небесных звезд составляют венец, иже на главе Твоей: слава Тебе, всех верных христиан усердная Заступнице.

Псалом 12

Доколе, Госпоже, забудеши мя и не избавиши мя в день скорби моея? доколе вознесется душевный враг мой на мя? Силою и властию Твоею сокруши его, буди мне, немощнейшему, Госпоже, столп крепости и оружие, сокрушающее врага, возвеличу Тя, Благодатную, сердцем и устами прославлю, яко непобедимую воеводу.

Псалом 13

Рече безумный, адский противник в сердце своем: пожену и постигну верных Христовых и убиет их рука моя. Востани, Госпоже, предвари его, запни ему и низложи вся злыя советы его. Твоему могуществу кто противу станет? Твоей власти кто воспротиворечит? Твою матернюю любовь к верным кто пресечет? Ад трепещет святейшаго имени Твоего, мертвыя востают от силы Твоея; от единаго мановения Твоего безчисленныя кровожадныя воинства погибают; о, Приснодево Богородице! невместимаго всемогущаго Бога во утробе Твоей вместила и носила еси.

Песнь вместо славы

Радуйся, пространнейший дворе и пресветлейшая палато, Марие, Мати Христа Бога нашего: спаси певцы Твоя, яко да в бурном океане жизни сея всегда к Тебе прибегаем.

Псалом 14

Госпоже, кто обитает в жилищи Божии, или кто вселится во святую горнюю Сионскую гору, идеже присещает свет лица Божия? Той боголюбец, иже по Бозе все упование свое на Тя едину возлагает; той боголюбец, иже во уме своем обносит всегда сладчайшее имя Твое; той боголюбец, иже воспевает чудеса и милости Твоя; той боголюбец, иже подражает смирению, кротости и целомудрию Твоему; той вселится в преблаженное жилище Божие, иже, о, Преблагословенная Приснодево Марие, величит душею Господа и радуется духом о едином Боге Спасе своем. Потечем, грешницы, потечем по стезям Матери Божией, держимся за стопы Ея крепко и не отступим молитвами от Нея, коленопреклоняяся пред святым изображением лица Ея, возводя ум на первообразное, дóндеже обрящем милости Ея во благовременну помощь к наследию небеснаго обетования.

Псалом 15

Сохрани мя, Госпоже, яко излияся на Тя неисчерпаемый ток Божией благодати, излей и на мя каплю ея; чрево бо Твое девственное, утроба Твоя чистейшая Всевышняго Бога, возлюбленнаго Сына, от Духа Святаго роди; благословени пречистии сосцы Твоя, ими же Спасителя Иисуса Христа питала еси. Исповедайте Ей хвалы, девы целомудренныя, аще токмо обрели есте благодать и милость Ея, дадите великолепие имени Ея и хвалите в век века зачатие и рождество Ея.

Псалом 16

Услыши, Госпоже, правду мою и отжени от мене скорбь мою. Исповемся Тебе во гласе радования и воскликновения, егда излиется на мя милость Твоя; уподобитеся Ей в боголюбии и вы, святии девы Божии, прославите Ю во гласе уст и сердца вашего; сице бо Ея благодать восприяша девы мученицы и прочии, плененнии любовию сладчайшаго Иисуса, восприяша от Него нетленные райские венцы. Слава Тебе, Владычице, любящим Тя девам неотемлемое сокровище.

Песнь вместо славы

Радуйся, Мати Марие, звездо присносияющая, от Нея же солнце правды, Христос Бог наш возсия, Его же светлостию слепии прозреша. Моли за нас, грешных рабов Твоих, и многомощными Твоими молитвами помози видети Тя, возвеличенную Госпожу Ангелов, и сподобитися с ними славити Тя в горнем Сионе во веки веков, аминь.

По 2-й кафисме тропари, гл. 2

Тебе, Богородице, с верою просим, бед многих и прегрешений да избавимся, ибо инаго, Пречистая, скораго не имамы утешения, разве Тебе благоутробныя, подающия всем спасение.

Едина Бога без истления рождшая, Тебе припадаем, Приснодево, со страхом и любовию взывающе: страстей и недугов лютых избави ны

Егда душа имать разлучитися от телесе, тогда предстани ми, Богорадованная, и врагов советы разруши, ищущих поглотити мя, яко да свободився Тобою князей тьмы, части избранных сподоблюся молитвами Твоими

Молитва

Пречистая Владычице Богородице! вем, яко аз сквернав и нечист, и недостоин есмь, и всякаго греха исполнен есмь. Сего ради, яко повинный, со многим стыдом и со слезами вопию Ти, Владычице моя Богородице: помилуй мя и помози ми, и утеши мя, недостойнаго раба Твоего (имя рек). Мати всякия утехи, Сына Твоего и Бога нашего молити не престай, яко грешная и окаянная моя душа сниде во глубину зол. Аз же, грешный и нечистый, помышляя о прежних и нынешних своих гресех, рех: несть злобы никоея, еяже аз, окаянный, не сотворих. Того ради ужасаюся и боюся Сына Твоего и Бога моего и праведнаго Его судища. Тем же с сокрушенным сердцем и со слезами вопию Ти: умилосердися. Владычице моя Богородице, помилуй мя, самовластным умом преступившаго оправдания и повеления Сына Твоего и Бога моего. Не остави мя погибнути в моих греховных сквернах и обычаях, но посли на мя милости Твоя богатыя. Ты бо еси милосердия и милости Мати, не презри мя гибнущаго, но обрати мя и исторгни мя из тины греховныя, якоже древле Сын Твой исторг блудницу, блуднаго сына и мытаря. Даруй ми источник слез и омый скверну грехов моих. Не отрини мене, не гнушайся мене, сквернаго, но водами щедрот Твоих угаси изгоревшую напастьми душу мою, избави мя пламени бесовскаго обдержания и от лаяния их исхити мя, да вижду Тя отгоняющую от мене во время отшествия моего темноличных бесов, предавши мя благим и светлоличным ликом святых Ангелов. Ты бо еси, Богородице, грешником спасение, отчаянным заступление и обращение, печальным утехо. Тебе бо Сын Твой, Бог наш, дарова Ходатаицу нам, призывающим Тя от всего сердца. Спаси мя, Пресвятая Богородице, недостойнаго раба, ради милости Сына Твоего и Бога нашего, аминь.

Кафисма 3

Псалом 17

Возлюблю Тя, Госпоже и Царице небесе и земли, и во языцех преславное имя Твое прославлю; исповедайтеся Ей сокрушеннии сердцем и укрепит вы противу всех врагов ваших; свет нам, Госпоже, благодать чрева Твоего и от Тебе питаемся млеком духовныя сладости Твоея, и паки алчем и жаждем ея. Вернии, взыщите и прославите Владычицу, яко Она есть скорая помощница и ваша к Богу предстательница; буди, буди прибежищем нашим, Преблагословенная Мати Христа Бога нашего, понеже Ты еси верным дивное утверждение; слава Тебе, всех верных усердная Заступнице.

Песнь вместо славы

Пресвятая Владычице моя Богородице, прошу и молю Тя усердно: избави мя от внезапныя и лютыя смерти, наипаче же в час кончины моея милостива предстани ми и руки бесовския исхити, суда, прения и страшнаго истязания, и мытарств горких, и князя лютаго, и вечнаго осуждения всесильною Твоею помощию свободи мя.

Псалом 18

Небеса поведают славу Божию, поведают и Твою славу, Приснодево Марие; мастями благодатнаго благовония Твоего вси концы земли облагоухани суть; воздыхайте к Ней, обуреваемыя беззакониями; грешницы, ищите Ея помощи и приведет вас к тихому пристанищу Божия милосердия; песньми псаломскими толцыте утробы щедрот Ея и одождит вам благодать милости Своея; прославите Ю праведнии пред престолом Божиим; хвалите Ю небеса небес и святейшее имя Ея да ублажает вся земля.

Псалом 19

Услыши нас, Госпоже, в печали и на молитвы наши обрати матернее лице Твое; не отвержи нас в страшный час смерти, но предстани душе нашей, внегда разлучатися ей от тела; посли Ангела мирна в сретение ея, им же от злых духов безопасно да соблюдется, покажи ей милостива и благоуветлива правосуднаго Судию веков, Иже предстательством Твоим прощение ей подаст и удостоит вечнаго покоя с избранными Божиими.

Псалом 20

Госпоже, силою Твоею возвеселится сердце наше и сладостию имени Твоего утешится душа наша; от престола Царя славы посли нам премудрость, еюже во всякой истине просветимся, от плотских страстей сподоби благодатию Твоею воздержатися, яко да свет благодати Твоея в сердцах наших возсияет. Коль сладки любящим словеса Твоя, Дево Пресвятая, и коль благовонны капли благодати Твоея; славу и честь воспеваем Тебе и о преславном имени Твоем славимся и мы во веки; слава Тебе, верных скорая Заступнице.

Песнь вместо славы

Радуйся, Марие Приснодево, преукрашенный раю, паче солнца светлейшая, паче звезд блистающая, паче всех аромат благовоннейшая, паче всякаго сельнаго цвета краснейшая, Юже Бог по смирению Ея избра в возлюбленную невесту Себе. О, Владычице! не отвратися от мене, недостойнаго грешника, но от гнусной скверны сотвори чиста, беззаконнаго – праведна, лениваго – усердна, яко да Тебе, Госпоже, работати и Тя хвалити возмогу во веки веков, аминь.

Псалом 21

Боже, Боже мой, да призрит на мя щедротами Своими Преблагословенная Приснодева Мария. Небесным Ея благословением спасение вечное обретох. Сего ради и взываю к Тебе, Госпоже моя, во дни и в нощи, да внидет пред Тя молитва моя и Ты, Владычице, приклони ухо Твое к молению моему. Мене искаша душевнии врази мои везде, но крепкою десницею Твоею защищен есмь и под сению милости Твоея обретох пресладкий покой; слава Тебе, недремлющая моя Хранительнице.

Псалом 22

Господь пасет мя и Ты, Богородице Приснодево, умоляеши Его, да обратит Он божественное лице Свое на мя. Слава Его благоутробию! слава Твоему матернему предстательству! Да будут благословени очи Твои, ихже милостивно обращаеши на кающихся грешников; благословенно да будет сияние лица Твоего, благословенна да будет благодать святаго образа Твоего, благословенна буди скорая милость рук Твоих; благословен да будет Питавыйся девственным млеком Твоим; да благословят Тя апостоли и пророцы Божии, мученицы, исповедницы, и девственнии лицы да поют Тя.

Псалом 23

Господня есть земля и исполнение ея; Ты же, Владычице, соцарствуеши с Ним на небеси и Ангел хранитель нам еси Ты и на земли. Лучше есть угаснути солнцу, неже нам лишитися Твоего за нас к Богу ходатайства. Славою и красотою облеклася еси, всякой драгоценности предражайшее есть одеяние риз Твоих, сияние солнца на главе Твоей и светлость луны под ногами Твоими; звездами украшен престол Твой и ненасытимо взирают на Тя вси праведнии дуси. О, пресветлая звездо утренняя, помяни нас, Госпоже, во благоволении Твоем и сотвори нас достойны быти, еже славити святое имя Твое; слава Тебе, всех верных скорая помощнице и заступнице.

Песнь вместо славы

Радуйся, отчаянных надеждо благонадежная и помощь безпомощных скорая; аще что просиши у возлюбленнаго Сына Твоего, скоро приемлеши; аще чего от Него хощеши, бывает Тебе: прошу и молю Тя, всемилостивая Госпоже, спаси мя, и спасуся, и Тя благословлю во вся веки веков, аминь.

По 3-й кафисме тропари, гл. 3

Стену нерушиму, твердое основание, пристанище небурное, стяжавше Тя, Всепетая, в пучине страстей обуреваемии в благоотишное заступление Твое прибегаем: ниспосли нам мир и велию милость.

Престол всезлатый Царя и рай процветший показалася еси, Пречистая: Бога бо во чреве Твоем носивши, благовонствуеши нас божественными благодатьми, отонудуже вси Божию воистинну Матерь Тя проповедуем присно, подающую нам велию милость

Утешение скорбящих, очищение согрешающих Ты еси, Мати Дево Владычице; человеков бо спасение рождши, столп крепости верным соделалася еси, темже зовем: Христа Бога моли, даровати нам велию милость

М о л и т в а

В Твое заступление и крепкую помощь ныне прибегох, Пречистая Госпоже Богородице! Весь есмь сквернен: не сохраних заповедей Сына Твоего и Бога моего, да яко ни на небо очима воззрети не смею, ибо тело злобою уязвих; ни руце воздети на высоту: полне бо еста лихоимства; ни устна отверсти на молитву: яко злогласованием слепистася. Воздыхания во мне несть от нечувствия; сердце отягчих величанием; душу омрачих немилосердием; тело ослабих леностию; нозе преткнух о камень сластолюбия; уши отверзох на слышание маловременныя похвалы; лице мое безстудием повлекох; смрад дел моих обоняста ноздре мои, и весь бых, яко древо неплодно или яко храм пуст, емуже на разореиие вси поучаются. Тать же души моея, диавол, крыется в гнезде сердца моего, видит бо мя неограждена и тщится малое имение веры моея восхитити и, аки пленника греховными узами связав, к своему хотению мя нудит. Что убо содею – не вем: самовластен Богом сотворен бых, обаче волею поработихся похотному бесу и умножишася греси мои паче песка морскаго. Како могу умолити Творца моего и Господа, или како надеюся помилован быти? волею вдався на осквернение плоти и по вся часы приближаюся к греховным сластем; плоть убо моя осквернися блудом, язык срамословием распростреся; внутренняя же моя исполних смрадных помысл и отнюдь весь мой разум попустих в сопротивная Божию закону. И того ради тужу, и скорблю, и печалуюся, по вся часы припадаю к щедротам Твоим, Госпоже Богородице! Не прогневайся на мя, грешнаго, да не всуе жизнь моя сократится; но призри, Владычице, на мя унылаго, умоли Рождшагося от Тебе, да не предан буду в жребий грешных. Ты бо еси Божия Мати и аз, раб Твой, всегда на Тя надеюся; за мене, своего раба, умоли Сына Твоего и Бога моего, Емуже слава с Отцем и Святым Духом ныне, и присно, и во веки веков. Аминь.

Кафисма 4

Псалом 24

К Тебе, Госпоже, воздвигох душу мою, яко да на страшнем суде Божием Твоими молитвами не постыжуся, ниже да посмеются о мне врази мои и поднебесной злобы лукавнующии полки да не преткнут стопы моя, ниже да не превзыдут мене сети смертныя; с кротостию притецы к душе моей, путеводительница буди ко отечеству небесному и к блаженному собору избранных Божиих сопричти мя.

Псалом 25

Суди мя, Госпоже, яко аз незлобою моею ходих, уповая на Тя не изнемогу. Воспламени сердце мое огнем любви Твоея и поясом чистоты Твоея востягни утробу мою, милость и щедроты Твоя пред очима моима суть; наслаждуся во гласе хвалы Твоея, Госпоже; возлюбих святолепное лице Твое, покланяюся ему и почитаю святое владычество Твое. Исповедайтеся имени Ея, яко свято есть, и Поведите в век чудеса Ея.

Псалом 26

Госпоже, небесное сияние лица Твоего да будет просвещение мое и светлость благодати Твоея да возблистает во уме моем; вознеси главу мою на враги моя, яко аз преславное имя Твое воспою, и не отврати лица Твоего от мене; красоту и доброту Твою возжела душа моя и Тя во дни и в нощи ищет сердце мое, Царице небесная, не отстави благодати и милости Твоея от мене и прославлю во языцех славу Твою, еюже прослави Тя Отец, Сын и Святый Дух.

Песнь вместо славы

Преукрашенная и во веки благословенная всеми Приснодево Богородице Марие, невместимаго Бога храме, Духа Святаго приятелище, двере Небеснаго Царствия, всея вселенныя Мати, приклони ухо Твое к недостойному моему молению и буди мне, грешному, милостивая попечительница и во всем помощница.

Псалом 27

К Тебе, Госпоже, воззову и услыши мя, и во гласе хвалы Твоея возвеселиши мя. Помилуй мя в день тесноты моея и светом истины Твоея озари мя; сам Господь во утешение наше Тя дал есть и Ты крепость моя и хвала о Господе; почерпну убо воду благодати Твоея с веселием и испию от источника милости, и не вжажду во веки.

Псалом 28

Принесите Госпоже нашей, сынове Божии, принесите Госпоже нашей славу и хвалу. Даждь силу рабом Твоим, Мати пресвятая, и благословение славящим и хвалящим Тя. Услыши сердечное воздыхание взирающих к Тебе и не презри молитвы призывающих Тя; да будет рука Твоя распростерта и готова к вспоможению нам и ухо Твое слышащее горестный и утомленный глас наш, Ты бо еси едина наша Матерь сердобольная.

Псалом 29

Вознесу Тя, Госпоже, яко Ты еси прекрасное жилище Святаго Бога; вознесу Тя, Госпоже, яко восприяла еси мя в милость Твою и от душевнаго врага, противника моего, избавила мя еси: не отвратися и до конца множества ради грехов моих, оживотвори дух мой и окаменелое сердце мое умягчи в покаяние, яко да и аз принесу Тебе жертву славы и хвалы. Радуйтеся, небеса, и веселися, земля, понеже утешает Мати Мария верных рабов Своих и нищих духом милует и благоволит о них.

Песнь вместо славы

Радуйся, небес радосте! Радуйся и земли истинное веселие, Марие, Мати Христа Бога нашего! Ты умы любящих Тя любезно просвещаеши и верныя Твоя певцы со тщанием приводиши к сладости райских обителей; к Тебе, к Тебе, Госпоже, обращаю лице мое, на Тя взирают очи сердца моего, на Тя уповает душа моя; помилуй мя, Владычице, приведи к отечеству любви вечныя.

Псалом 30

На Тя, Госпоже, уповах, и не постыжуся во век: благодатию Твоею приими мя и воззрением матерним утеши мя; Ты еси крепость моя, и прибежище мое, и утешение мое, и покров мой, и надеждо моя непостыдная; в руце Твоего матерняго заступления вручаю убогую мою душу, весь живот мой, последний день, конечную минуту дыхания моего и ужасное прехождение воздушных мытарств.

Псалом 31

Блажени, ихже сердца любят Тя, преблагословенная Приснодево; Воплощимбося из Тебе грехи их милостивно очистятся и беззакония их покрыются, от плода бо святыя и пречистыя утробы Твоея излияся на всех кающихся грешников благоутробие Божие; и Ты, Владычице, прямая еси стезя к Царству Небесному, блудящих в мрачной нощи греховной просвещаеши и уклоняющихся в законопреступныя дебри милосердно на путь истинный наставляеши: слава Тебе, всех верующих скорая помощнице и заступнице.

Песнь вместо славы

Радуйся, Приснодево Богородице Марие, нетленный ковчеже, от потопа греховнаго весь род человеческий спасший. Радуйся, всех к Тебе притекающих надежное и безопасное прибежище. О, всеблагодатная, всепрекрасная, всесладчайшая, всеблагословенная, помяни нас, грешных, у престола владычества Господня, Ему же Ты во славе предстоиши и нас призираеши, аминь.

По 4-й кафисме тропари, гл. 4

В мори мя плавающа, на пути шествующа, в нощи спяща соблюди, бдящу просвети ум мой, Госпоже, и настави творити волю Господню: яко да обрящу в день судный в житии содеянных ми разрешение, прибегая в кров Твой, Благословенная.

Не вниди со мною в суд Христе, аз бо вем моя осуждающыя мя грехи, и Тебе взываю: молитвами Рождшия Тя помилуй мене смиреннаго и недостойнаго, яко разбойника и блудницу, мытаря и блуднаго, Человеколюбче, не бо праведных пришел еси спасти, но паче грешныя

Даров Твоих честных наслаждающеся, не умолчим пети, Богородице, милости Твоя всегда раби Твои, зовуще и глаголюще: Пресвятая Дево, всех нас изми от козней вражиих и нужд и всякаго прещения: Ты бо еси наше заступление

Молитва

Владычице, преблагословенная Защитнице рода человеческаго, прибежище и спасение притекающих к Тебе! вем, воистину вем, яко зело согреших и прогневах, премилостивая Госпоже, рожденнаго по плоти от Тебе Сына Божия; но имам многие образы прежде мене прогневавших Его благоутробие: мытари, блудницы и прочие грешники, имже дадеся прощение грехов покаяния их ради и исповедания. Тыя убо образы помилованных очесам грешныя моея души представляя и на толикое Божие милосердие, оных приемшее, взирая, дерзнух и аз, грешный, прибегнути с покаянием к Твоему благоутробному, сильному и непрестанному ходатайству. О, Всемилостивая Владычице! да подаси ми руку помощи и испросиши у Сына Твоего и Бога матерними и святейшими Твоими молитвами тяжким моим грехом прощение. Верую и исповедую, яко Той, Его же родила еси, Сын Твой, есть воистину Христос, Сын Бога живаго, Судия живых и мертвых, воздаяй комуждо по делом его; верую же паки и исповедую Тебе быти истинную Богородицу, милосердия источник, утешение плачущих, взыскание погибших, сильную и непрестанную к Нему ходатаицу, зело любящую род христианский, и споручницу покаяния. Воистину бо несть человеком иныя помощи и покрова, разве Тебе, о Госпоже премилостивая! и никтоже, уповая на Тя, постыдеся когда и, Тобою умоляя Того, никтоже оставлен бысть. Того ради молю Твою неисчетную благость; отверзи двери милосердия Твоего мне, заблуждающему и падшему в тимения глубины; не возгнушайся мене сквернаго, не презри грешнаго моления моего, не остави мене, окаяннаго, егоже во погибель злобный враг похити; но умоли всемощными и святейшими Твоими молитвами, о, милосердая! рожденнаго от Тебе милосердаго Бога, да простит великия моя грехи и избавит мя от пагубы моея, яко да и аз со всеми получившими прощение воспою и прославлю безмерное милосердие Божие и Твое непостыдное о мне заступление в жизни сей и в некончаемом веце. Аминь.

Кафисма 5

Псалом 32

Радуйтеся, праведнии, о Господе, радуйтеся и о Приснодеве Марии, воспойте Ему песнь нову, добре пойте и Владычице со восклицанием; пийте от небесныя сладости Ея, услаждает бо Она сердца и уста премудрых; да возвеселится убо душа наша о Ней, Она, яко сладчайшая манна, препитает нас в пустыне мира сего, и избавит от смерти души наша.

Псалом 33

Благословлю Госпожу Марию во всякое время, выну хвала Ея не оскудеет во устнах моих; возвеличите Ю со мною вси, насыщенные медом и млеком утешения Ея, в бедах и скорбех призовите Ю, и в нуждах ваших обрящете помощь и покой; сладостне приимите святый образ жития Ея и поревнуйте любви и смирению Ея, понеже кротка и смиренна Дева Пресвятая: Несозданное Слово Духом Святым плоть от Нея восприя.

Песнь вместо славы

Радуйся, Приснодево Пресвятая Марие, честнейшая Херувимов, славнейшая Серафимов, превысочайшая всех Святых! Соблюди, молю, сердце мое от греховных преткновений, яже девственным очесем Твоим неугодна суть, отвлецы ум мой от прихотей земных и к небесней любви обрати, яко да душа моя поучится правде Твоей, и сердце преисполнится весь день хвалы Твоея.

Псалом 34

Суди, Госпоже, обидящыя мя и противу их востани и охрани невинность мою. Душа моя о Тебе веселится и Твоими молитвами возрадуюся: милости Твоея полны суть небеса и земля. Быша простерты ми всюду адския сети, но Ты, Владычице, благостынею Твоею защитила мя от них; слава Тебе, помощнице моей; вся кости моя рекут: Госпоже, Госпоже Марие, кто по Бозе подобен Тебе!

Псалом 35

Глаголет пребеззаконный на имя Твое хулу, о, Святейшая Всецарице, и дивная чудеса мнит быти измышлены; глаголы скверных уст его беззаконие и лесть, но мы веруем и исповедуем, что Ты с плотию преставилася еси к небеси и предстоиши престолу Божию; чудеса Твоя и милости Твоя суть бездна многа и вси чтущии Тя под кровом крилу Твоею надежно укрыются. О, Мати Божия, предстательством Твоим приклони святейшее лице возлюбленнаго Сына Твоего и Спасителя нашего к нам, сотвори Его молитвами Своими к нам, грешным, милостива: пробави милость Твою ведущим Тя; благодать Твоя излияся по всей земли, власть и сила в мышце Твоей, крепость и утверждение в деснице Твоей; благословенна хвала Твоя на небеси, благословенно великолепие Твое и на земли.

Песнь вместо славы

Радуйся, раю словесный и Богопросвещенный, чистая Дево Богородице, всяк, притекаяй любовию к Тебе, всяких скорбей и печалей свобождается; темже молим Тя: всех, в вере преставльшихся рабов Твоих, благочестно Тя Богородицу исповедавших, всякаго злострадания и вечнаго осуждения избави и чаемый рай присносущнаго наслаждения Тобою улучити сподоби, едина Пречистая.

Псалом 36

Не ревнуй лукавнующим, ниже завиди беззаконие творящим, о, истинный чтителю святыни Матери Божией! Творящии бо беззаконие, яко злак, скоро отпадут; уповай на всемощную Царицу Небесную и твори благостыню, и упасешися в богатстве Ея; лучше есть малое со благодатию Ея, нежели сокровища многа и камения многоценна; уповай на Господа, уповай и на возлюбленную Матерь Его, и исполнятся вся благая прошения сердца твоего.

Песнь вместо славы

Радуйся, пресветлейшая и прекротчайшая небесная Голубице, красотою благолепия Твоего просвети внутреннюю тьму мою; вонми, Госпоже, вонми воздыханию моему сердечному, от исполнения благодати Твоея ниспусти росу, оживляющую унылый дух мой.

По 5-й кафисме тропари, гл. 5

Многообразно, Дево, Христа преогорчих, помышлениями и словом и делы, и боюся страшнаго Его судища, но, предваривши, избави мя лютых Твоим молением, Богородительнице.

Мене, много согрешившаго, Владыко, помилуй и спаси Рождшия Тя мольбами, да Твое многое прославляю и безмерное милосердие

Славою божественною блистающая едина, яко Матерь Тя прославльшаго, славу вышнюю улучити ми, Дево, умоли единаго Препрославленнаго

Молитва

О, Пресвятая Дево Богородице, Преблагословенная Мати Бога Спаса моего, скорбящим радосте, ненадежным надеждо, и безпомощным помощь! Ты веси вся струпы моя греховныя, от них же аз желая очиститися, с скорбным сердцем прибегаю к Тебе и молюся Ти со слезами: призри на немощи моя и не даждь ми во гресех погибнути. Ты веси наготу души моея, помози ми одеятися ризою возлюбленнаго Сына Твоего. Ты веси, яко нищь есмь аз, потщися отверсти ми сокровищницу благодатных даров, да сохраню данные мною при святом крещении обеты; ты веси враги моя плотския и безплотныя, избави мя от них. Ты веси, Преблагая Заступнице наша, время исхода души моея из окаяннаго телесе моего, наипаче милостивно предстани ми тогда, да во святом присутствии Твоем будет исход души моея тихий и отрадный и да не ополчатся на ню духи злобы поднебеснии, но, покрываема неприступным для них Твоим покровом, да возвратится без зла к своему началу и источнику.

О, любоблагоутробная Мати, яви мне, странну, сиру и убогу, яко Ты еси воистинну ми Мати милосердия и щедрот и не престани покрывати мя и неусыпно ходатайствовати о мне, дóндеже приведеши в небесные чертоги Божественнаго Сына Твоего, Ему же со безначальным Его Отцем и Пресвятым Духом да будет честь, слава и поклонение во веки веков. Аминь

Кафисма 6

Псалом 37

Госпоже, да не яростию и правосудием Своим обличит нас Господь в беззакониях наших. Ты, всемилостивая Предстательнице, исходатайствуй у Него прощение нам, безответным в онех. Ты бо еси непостыдная надеждо наша и упование неложное; несть мира в костех наших от лица грех наших, но Преблагословенным плодом чрева Твоего примирихомся с Богом, благодать Его и Твоя милости одесную нас.

Псалом 38

Рех, сохраню спасительныя пути возлюбленнаго Сына Твоего, Царице Небесная, и благодать Христова будет мне подана, но дух мой бодр, плоть же немощна; помилуй мя от небеси и от высоты славы Твоея, Помощнице моя, и внегда подвижатися ногам моим от пути праваго, не попусти и сохрани их, да не поползнутся и не преткнутся о камень злых страстей, и да не порадуются о мне душевнии врази мои! Услыши молитву мою, Госпоже, и не презри убогаго моления моего.

Псалом 39

Терпя потерпех благодать Твою, Госпоже, и сотворила еси мне по множеству милости Твоея: услышала еси молитвы моя и извела еси мя от рова грехолюбивых страстей и от ямы адскаго врага. Дивны и неизследимы суть Твоя щедроты; да возрадуются и возвеселятся о Тебе вси любящии Тя, ненавидящия же имя Твое снидут во ад; благословенна и препрославленна Ты, Владычице, во веки веков.

Песнь вместо славы

Радуйся, предражайший небесный Маргарите, егоже духовныя красоты и светлости никакая тьма греховная обступити возможе; аз же, грешник, знаю моя беззакония и, повергаяся смиренно пред стопы Твоя, молением молю, да не презриши мя, о, Надеждо моя преблагая, но великое окаянство мое воздвигни из глубины греховныя, да не погибну, яко неключимый раб в будущем веце.

Псалом 40

Блаженна и преблаженна Ты Богородице Марие, разумеваеши бо на нищих духом и убогих сердцем. Во исповедуемых пред Богом и пред Тобою немощех их действует Божия всемогущая сила и Твое матернее ходатайство. Слава Тебе Владычице, безпомощных помоще, нищих и убогих богатство неотемлемое.

Псалом 41

Имже образом желает елень на источники водныя, сице к святой любви Твоей, Царице небесная, прибегает жаждущая душа моя; Ты еси жизнь жизни моея и питательница бедныя плоти моея; Ты млеком питала еси Спасителя души моея, Сама же питалася еси нетленною пищею божественнаго учения Его. О, Свете, небесным светом осиянный! просвети, молю Тя, внутреннюю мою тьму, да ум мой и желание мое воскрылятся при свете Твоем к горнему Сиону.

Псалом 42

Суди мя, Госпоже, и разсуди прю мою с плотию моею, прю с миром прелестным, прю с диаволом-змием лукавым, с аспидом смертоносным, да избавит мя от сих триех ужасных врагов единая помощь Твоя; сокруши, Владычице, гордыя главы их, истощи силы их, и укрепи мя противустати им; десница Твоя в крепости, держиши бо ею Содержащаго вся. Да воскреснет Господь во мне благодатию Своею, за Твоя матерния молитвы, и расточатся врази моя.

Песнь вместо славы

Радуйся, яко дар прияла еси, яко Мати Божия, всех христиан недуги исцеляти, и от бед избавляти, и грехи отпущати, и от пленения спасати, и от всякия нужды; не презри и нас, Госпоже, веси бо, ихже требуем, – здравия телесем и душам спасения.

Псалом 43

Владычице! Отцы наши возвестиша нам и сами ныне ушима нашима слышим и очима видим, коль неизследовани суть щедроты Твоя, и коль предивны чудеса Твоя, и коль неисчетны милости Твоя: восток и запад, юг и север озарени суть ими; повсюду небесныя благостыни Ея уготованы хвалящим Ю, хвалящии бо святейшее имя Ея возвеличатся от Бога.

Псалом 44

Отрыгну сердце мое слово благо Госпоже Приснодеве Марии: яко из уст Ея сладкодышущих исходит небесная сладость, яко святейшим плодом чрева Ея грехи мои очищени суть, яко непорочным девством Ея блаженное безсмертие душе моей подадеся, яко рождеством Ея избавлен есмь от адскаго плена и в вечное небесное отечество возведен.

Псалом 45

Владычице! Ты еси прибежище наше во всяких нуждах наших, Ты крепость и сила, сокрушающая всех врагов моих; благостыни Твоея преисполнена земля, проходит даже до преисподних, от исполнения благодати Твоея бывшии во аде, веселящеся, свободишася от него чрез преславное девственное Твое рождество и человецы смертнии сообщницы соделашася безплотным Ангелом.

Песнь вместо славы

Радуйся, преблагословенная Приснодево Марие, Мати Христа Бога нашего; Ты превыше сил небесных возвеличена и одесную Бога в ризах позлащенных и преиспещренных стоиши; к Тебе вопию из плачевной юдоли мира сего: покрый мя кровом крилу Твоею, даждь мне благодать скончатися во благочестивой вере и по преселении из сея жизни сподоби узрети благословенный плод чрева Твоего – сладчайшаго Иисуса Христа, Спасителя моего.

По 6-й кафисме тропари, гл. 6

Изнемогает мой ныне ум, впад во глубины противных помышлений, и несть ми ослабления: услыши мя искушаема и даруй ми умирение, яко благая, да не буду снедь лукаваго, Марие благословенная.

Судию мира милостива сотвори ми, Дево; никтоже бо якоже Ты можеши ходатайствовати, Матерь сущи Владыки всех Бога. Того убо прилежно моли о мне, едина чистая

Видимо пред иконою Твоею предстоя, невидимо Тебе живущей на небеси мню предстояти, Мати живота, и со благоговением молюся врагов видимых и невидимых мя избави, Владычице

Молитва

Нескверная, неблазная, нетленная, пречистая, неневестная Богоневесто, Богородице Марие, Приснодево, Госпоже мира и надеждо моя! Призри на мя, грешнаго, в час сей и егоже из чистых кровей Твоих неискусомужно родила еси, Господа Иисуса Христа, милостива мне соделай матерними Твоими молитвами; Того зревшая осужденна и оружием печали в сердце уязвившися, уязви душу мою Божественною любовию; Того во узах и поруганиях горце оплакавшая, слезы сокрушения мне даруй; при вольном Того ведении на смерть душею тяжце поболевшая, болезней мя свободи, да Тя славлю, достойно славимую во вся веки. Аминь.

Кафисма 7

Псалом 46

Вси язы ́цы восплещите руками, и в воскликновении воспойте Приснодеве Марии преславней, яко Та есть врата вечныя жизни, дверь спасения и примирения с Богом, яко Та есть надежда кающихся, утешение плачущих, благоговение, мир и спасение душ всех верующих избранных Божиих; пойте убо Ей вси любящии имя Ея, пойте, яко Она есть Царица небесе и земли.

Псалом 47

Велика еси и хвальна зело, Госпоже, во граде Бога небеснаго и во всей церкви избранных Божиих; честнейша и славнейша еси ангельских и архангельских чинов, райскими цветами увенчанна. Воскликните Ей сладчайшими песньми Начала и Власти, усретайте Ю Силы и Господствия, Херувими, Престоли и Серафими возвеличите Ю, предстоит бо одесную возлюбленнаго Сына Своего. О, коль пресветлым лицем восприял Ю есть Ангелов и всех Святых Господь, и дал есть Ей превыше всех сил небесных вечно блаженное место!

Псалом 48

Услышите сия вси язы ́цы, внушите желающии внити в Царствие Небесное, молитеся усердно Приснодеве Марии, обносите всегда в сердце святейшее имя Ея и обрящете живот и радость безконечную, Та бо приносит молитвы наши к возлюбленному Сыну Своему и Богу и Сама выну у престола Его молится о всех нас; Она есть заступница, роду христианскому дарованная, Она есть единая истинная Матерь всех нас, и во всем помогающая. Слава Тебе, всемилостивейшая Мати Божия, от всех христианских родов почитаемая и поклоняемая.

Песнь вместо славы

Радуйся, чистейшая Святаго Духа приятелище и непорочное Слова Божия святилище; радуйся Пресвятая Мати и Приснодево Марие, яко радость Ангелов и человеков, сладчайшаго Иисуса Христа, от Духа Святаго родила еси плотию и младенца Его пеленами повила еси, в ложеснах носила еси, яко возлюбленнаго Сына млеком питала еси, обимая лобзала еси Того. Молю Тя, великая Владычице, исходатайствуй мне, грешному, у Сына Твоего и Бога прощение грехов, да не лишуся Царствия Небеснаго.

Псалом 49

Бог богов Марии глагола чрез Гавриила, возвещая: радуйся Благодатная, с Тобою Господь! Тобою, обрадованная, спасение миру возвещается и падший человек возставляется; красоту Твою и доброту Вышний возжела, украшен бо внутренний чертог Твой, Дщи Сионова, и сподобилася еси предуготовати Себе в сретение Бога Твоего, царствуеши бо с Ним преславно на небеси; помози и нам достигнути вечнаго обетования.

Псалом 50

Помилуй мя, Госпоже, яко Мати милостей зовешися и по множеству щедрот Твоих помози очиститися мне покаянием от беззаконий моих, излей благодать Твою на мя и благостыню Твою не отрини от мене, яко беззакония моя исповедаю Тебе и пред Тобою винна себе творю. О, Владычице! Благословенному плоду чрева Твоего мя примири и воздаждь души моей радость спасения ея.

Песнь вместо славы

Радуйся, яко все естество Ангельское похвальная приносит Тебе, истинней Божией Матери и заступнице всех, притекающих к Тебе, ведуще, яко несокрушимым покровом Твоим праведных возвеселяеши, грешных заступаеши, бедствующих избавляеши и молишися о всех верных.

Псалом 51

Что хвалишися во злобе, о, прелукавый змие, аспиде адский? подклониши гордую главу твою благословенней и кротцей Жене, Ея силою погрязнеши во глубине, яко мысленный Фараон, ногою Ея сокрушится власть твоя, десницею Ея расточится злоба твоя, святынею Ея весь яд твой обратится в ничто; и мы, верующии, радуемся о имени Ея и воспеваем вся преславная деяния Ея и величия Божия.

Псалом 52

Рече безумный врагь в сердце своем: человека изжену от едемскаго селения, взыду и буду дух лживый во устах змия, и женою изжену мужа ея; но якоже отстоит небо от земли, тако отстоят судьбы Божии от твоих, окаянный льстец, мыслей; не возносися о падении жены, Жена сокрушит твою главу, ты злоковарством твоим изрыл ей пагубную яму, но сам со всем темным воинством твоим впал еси в сеть смирения ея.

Псалом 53

Владычице, во имя Твое спаси мя и от беззаконий моих молитвами Твоими избави мя. Ты помогаеши мне и заступаеши душу мою, волею приношу Тебе жертву хвалы и исповемся имени Твоему, яко благо есть: предстательством Твоим к Богу, матернею любовию к христианскому роду от всякия печали Ты избавляеши мя.

Псалом 54

Услыши, Госпоже, молитву мою и не презри моления моего, в скорби есмь в помышлении моем, яко десница Божия за грехи мои отяготе на мне, тьма вечной смерти прииде на мя и ужас адов нападе на мя. Ты, Владычице, надежное утешение всем скорбящим, вонми унылой душе моей, утеши и избави ю, много бо может матерняя молитва Твоя ко благосердию Владыки.

Песнь вместо славы

Радуйся, прекраснейшая Приснодево Марие, яви моей душе кроткий зрак Твой и глас Твой пресладкий да услышат уши сердца моего, его слышанием оживотворится и востанет упадший дух мой. Помяни мя, Владычице, во Царствии возлюбленнаго Сына Твоего, Христа Бога моего, воспоминаю и помяну аз святейшее имя Твое во всяком роде и роде.

По 7-й кафисме тропари, гл. 7

Предстательница Ты еси христиан и от искушений Избавительница притекающих к Тебе, Марие. Сего ради вопию Ти: не презри раба Твоего, просяща Твоея помощи.

Доколе, о душе, всуе иждиваеши время, доколе попеченми житейскими оплетаешися? Возверзи печаль свою на Господа, и стенящи возопий: Владыко человеколюбче, молитвами Богородицы спаси мя

Нигдеже уповаем спасение обрести, точию от Тебе, Пречистая, по Бозе скорую помощь получити. Темже Тя присно величаем

Молитва

Всемилостивая Госпоже Дево Богородице! вонми смиренному молению моему и сокрушенно ныне предстоящаго пречистому образу Твоему услыши глас. Вем бо, о, Содетеля моего Мати! яко Ты предстательство христиан непостыдное и ходатайство ко Творцу непреложное. Вем и сие, яко беззакония моя превзыдоша главу мою и яко бремя тяжкое отяготеша на мне, и уже несмь достоин видети высоту небесную, ниже воззрети ко престолу славы Сына Твоего и Бога нашего, но достоин мук и вечнаго осуждения. Сего ради к Тебе припадаю, Тя прошу умиленно, к Тебе со слезами взываю: сотвори к Нему матернее свое моление, да не отвержет нас грешных от лица Своего, но, яко милостив, да простит нам согрешения наша, вольная и невольная, на путь спасения наставляя нас и свыше силою укрепляя к творению заповедей Своих святых. Да сохранит нас от соблазнов мира, от вожделений греховных, от козней диавольских и от нападения видимых врагов. Да благословит дела рук наших: подавая всякому граду и стране обилие благ земных и храня здравие, да сотворит нам дни благи и безмятежны, да оградит миром Церковь Свою святую и разстоящая да соединит той, яко благий Господь, долготерпеливый и многомилостивый, от всея твари, со Отцем и Святым Духом славимый во веки веков. Аминь.

Кафисма 8

Псалом 55

Помилуй мя, Госпоже, яко попраша мя адстии врази мои, весь день помышление их о мне на зло, противу их возстави ярость и гнев Твой, да разумевая разумею помощь мышцы Твоея, возвеличу милость Твою на мне и благоугожду пред Господем, благоугожду и пред Тобою во свете живых.

Псалом 56

Помилуй мя, Госпоже, помилуй мя, яко готово сердце мое взыскати Твою волю и под сению крил Твоих опочити; руце Твои составиша первую смирну благодати и персты Твои сотроша масти благовонныя, дыхания уст Твоих паче всякаго фимиама; вся еси, Мати Божия, сладость небесная и ненасытимое желание, к Тебе привержен есмь от чрева матере моея.

Псалом 57

Аще воистину правду глаголете, правдою и истиною блажите небесную Царицу. Аще что прилежит к славе и хвале Спасителя Христа, аще что благоугодно Ему от нас, то довлети будут песни и пения духовныя, возсылаемыя от нас возлюбленней Его Матери; Ею пророцы услаждахуся, Ею апостоли восхвалишася, Ею святители украсишася, Ею мученицы укрепишася? Ею иноцы наставлени Быша, Ею постницы ангелоподобное житие прохождаху, Ею девствующии лаврами чистоты облагахуся; дивен Бог во всех святых, но паче предивен в Пресвятейшей Царице цариц, в нескверней Невесте, Преблагословенней Приснодеве Марии.

Песнь вместо славы

К Тебе прибегаю, Пресвятая Богородице, многое множество сознаю моих прегрешений и молюся Ти: посети немощствующую мою душу и испроси у возлюбленнаго Сына Твоего и Бога нашего дати ми прощение, едина Пречистая и благословенная; все упование мое на Тя возлагаю, премилосердная Мати Божия, сохрани мя под кровом Твоим.

Псалом 58

Изми мя от врагов моих, Госпоже Богородице, востани в помощь мою, о, Царице милости; да исчезнет пред очами воли моея темный мрак греха и Ты, благодатная, просвети и озари внутреннее мое око; Ты, яко солнце, ризами позлащенными и преиспещренными одеяна, сардис и топазион в венце Твоем, слава и богатство в деснице Твоей, смирна, и ливан, и бальзам в руце Твоей, сапфир и измарагд на перстех Твоих.

Псалом 59

Боже, отринул еси нас грех ради наших, ущедрил же еси нас ради Приснодевы Марии Богородицы; ходатайствуй о нас, Мати Божия, яже Ангелом и человеком спасение родила еси; Ты печальным утешение изливаеши и прискорбным радость и веселие: услади и нас сладкотекущим гласом уст Твоих, сладкотекущую благодать Твою влияй в сердца наша; возгремите небеса от высоты и дадите Ей хвалу, прослави Ю земля со всеми живущими.

Псалом 60

Услыши, Госпоже, молитву мою, и на твердом камени закона Божия постави помышления моя, буди мне столп крепчайший, защищающий мя от безстуднаго лица адскаго врага; Ты едина прекраснейшая и яко красота облачная сияеши, яко заря багряновидная востаеши, яко луна полная светиши в нощи и яко солнце блистает пресвятейший зрак Твой; слава Тебе, царствующей на небеси, приими в Царствие Небесное и нас, земных.

Песнь вместо славы

Пренепорочная Приснодево, Дщи Авраамова и Давидова, приклони ухо Твое к убогой и смиренней молитве моей и не забуди людей Твоих, к Тебе вопием, помяни нас Пресвятая Дево, Тебе вручаем спасение душ наших, буди ходатаица наша пред святейшим лицем возлюбленнаго Сына Твоего, Господа нашего Иисуса Христа.

Псалом 61

Не Богу ли повинется душа моя? от Того бо спасение мое; не Тебе ли, Владычице, возлюбити долженствует сердце мое? чрез Тебе бо спасение мое, благословенный бо плод чрева Твоего есть Спаситель мой; чашу убо спасения прииму и имя Господне призову, призывая призову и Твое, Владычице, преславное имя, ибо Той Спас мой, Ты же Заступница моя.

Псалом 62

Боже, Боже мой, с возлюбленною Ти Материю славлю Тя, девственно бо Тя от Духа Святаго зачат и девственно Тя роди. О, Госпоже! преблагословенна еси, предстоиши бо престолу Святыя Троицы и о нас грешных молишися, и мы в крове крилу Твоею возрадуемся и благословим Тя в животе нашем, и о имени Твоем возслем к Богу молитвы наши.

Псалом 63

Услыши, Владычице, глас мой, внегда молитимися к Тебе, избави душу мою, егда изыти ей от телесе, от ужаса жестокаго адскаго врага. Коим дерзновением воззрю на праведнаго Судию и Бога моего? Ты, помощнице, стани одесную мене и испроси грехом моим прощение, и прежде, неже будут страшная сия испытания о мне, просвети очи души моея и прожени слепоту греховную; даждь мне на Тя надежду имети в жизни моей и во исходе моем.

Песнь вместо славы

К Тебе прибегаю, преславная Богородице, Юже Матерь милости и Царицу щедрот вся православная церковь святых познает, не отрини мя, многогрешнаго, настави на путь истинный, покрый мя от сонма лукавнующих; Ты никогда никому, толкущему в двери милосердия Твоего, не возбранила еси: Твоя милости ищущим их Тобою, всемилостивая Мати, не отречени суть, рай утешения Твоего всем отверст есть.

По 8-й кафисме тропари, гл. 8

Богородице Приснодево, Ангелов славо и земнородных украшение, испроси Тебе поющим грехов всех прощение, буди милостива рабом Твоим, яко еси непостыдное прибежище человек и избавление отчаянных, Преблагословенная.

Низложи Сильный, якоже рекла еси Владычице, сильныя со престол – смерть и ад, и вознесе смиренныя – человеков естество воплотивыйся из Тебе Избавитель душ наших

Радуйся престоле огнезрачный всецаря Христа; радуйся едина Госпоже всея твари, Марие Богопрославленная

Молитва

Приими, о, Всеблагословенная и Всемощная Пречистая Госпоже, Владычице, Богородице Дево, сия молитвы, со слезами Тебе ныне приносимыя от нас, недостойных рабов Твоих, к цельбоносному образу Твоему с умилением притекающих, яко Тебе Самой ту сущей и слышащей моления наша, и подающей с верою просящим по коемуждо прошению исполнение. Скорбящим бо скорби облегчаеши, немощным здравие даруеши, разслабленных и недужных исцеляеши, от бесных бесы прогоняеши, обидимыя от обид избавляеши, и насилуемыя спасаеши, грешных кающихся прощаеши, прокаженных очищаеши, и малыя дети милуеши, от уз и темниц свобождаеши, и всякия многоразличныя страсти врачуеши Ты, Госпоже Владычице Богородице; вся бо суть возможна ходатайством Твоим к Сыну Твоему, Христу Богу нашему. О, Всепетая Мати, Пресвятая Богородице Дево Марие! не престай молитися о нас, недостойных рабех Твоих, славящих Тя и почитающих, и покланяющихся пречистому образу Твоему, и надежду имущих невозвратну и веру несумненну к Тебе. Приснодеве преславней и непорочней, ныне и присно и во веки веков. Аминь.

Кафисма 9

Псалом 64

Тебе подобает песнь, Боже, в вышнем Сионе и Тебе, Госпоже, хвала и воскликновение в горнем Иерусалиме: даде Тебе Господь хвалу и славу пред всеми людьми, слава Твоя выше славы чинов Ангельских и Архангельских, благодать и сладость вложи Бог во уста Твоя, одеждою славы облече пречистое тело Твое, венец цветонеувядаемый положи на главе Твоей и всеми добродетелями украси Тя в милости Своей, о, Преблагословенная Мати Божия.

Псалом 65

Воскликните Госпоже нашей, Приснодеве Марии, воскликните вся земля; воспойте пресладкую песнь преславному имени Ея, дадите славу хвале Ея; внидем в дом, Ея имени посвященный, с сердечным всесожжением и воздадим пред св. иконою Ея теплыя наши молитвы: Она призрит на нищету нашу и всякую горесть усладит; благословен Бог, благословивый нас благословенною Материю по плоти Сладчайшаго Иисуса Христа.

Псалом 66

Боже, ущедри ны и благослови ны и Ты, всемилостивейшая Госпоже, моли Его за нас, обрати многосуетную печаль нашу во святую радость, просвети, о, звездо утренняя, греховную темноту, утоли жажду миролюбиваго сердца, десница Твоя да воздвигнет мя падшаго и заступление Твое да освятит христианскую кончину мою; слава Тебе, непостыдная надеждо моя; Ты царствуеши на небесех: помяни мя, Владычице, во Царствии возлюбленнаго Сына Твоего, Святейшаго моего Спасителя.

Песнь вместо славы

Радуйся, небесная Царице, благоукрашенный доме непостижимаго Царя; радуйся, церковное незаходимое и лучезарное светило; радуйся, небесный свет благочестивых; радуйся, тихое пристанище обуреваемых; радуйся, плачущих и всех скорбящих райское утешение. Помилуй мя, окаяннаго грешника, и у Всемилостиваго Господа нашего Иисуса Христа испроси, да Его благодатию вся ветхая в душе моей мимоидет и во обновлении жизни ходити пред лицем Бога буду.

Псалом 67

Да воскреснет благодать Пресвятыя Богородицы в душах наших, в глубоком греховном сне погруженных, и расточатся врази наши, и все козни их исчезнут. О, всемилостивая Госпоже! низложи всю адскую злобу их, отврати волю мою от их лести, воскрили ю к святейшей воле возлюбленнаго Сына Твоего и Бога нашего, просвети усыпленную совесть мою, да не оскудеет хвала Твоя от устен моих, ниже любовь моя к Тебе внутрь мене; мир мног любящим Тя, Госпоже, души их не узрят вечной смерти во веки.

Песнь вместо славы

Мати Божия, молю Тя усердно, не остави мене без Твоея всесильныя помощи, наипаче во время искушения, егда аз, в суете мятущися, забываю о Боге и спасении своем. Царице Небесная, не остави мене Своим милостивым покровом и в жизни сей, и при кончине моей.

Псалом 68

Спаси мя, Владычице, яко внидоша воды греховных страстей моих до души моея, углебох в тимении глубины оных, плачущи рыдах во дни и в нощи, яко прогневах Господа Бога моего и несмь достоин воззрети на высоту небесную. К кому убо прибегну, окаянный аз, аще не к Тебе, Всемилостивая Заступнице? Спаси душу мою, яко Тобою истинное спасение всему миру даровася, егда, возвещающу Архангелу, сила Вышняго осени Тя и благоволение Отчее посети Тя.

Псалом 69

Госпоже, в помощь мою вонми, милостию Твоею просвети омраченный ум мой, да разумею благость Твою и предивная чудеса Твоя, являемыя к кающимся грешникам, запечатлею я в сердце моем; помилуй всех верующих, в них же нарицается святейшее имя возлюбленнаго Сына Твоего, Спасителя Христа, и преславное имя Твое. Помилуй и не попусти нам утеснятися вражиими искушениями, да не когда рекут о нас: благоже, благоже, но Ты едина, Владычице, да освятишися в нас, веси бо сущия Своя.

Песнь вместо славы

Радуйся, Мати Марие, милости источниче, мирови прибежище, красото небесная, Ангелов Царице и святых всех радосте; предстани мне во всех напастех, в скорбех, в теснотах и в немощех моих и испроси у Бога всем согрешением моим прощение, яко да не лишуся Царствия Небеснаго.

По 9-й кафисме тропари, гл. 1

Упование христиан известное, милости подательнице, источниче сострадания, ключу, отверзающий Божию благостыню, отверзи нам милосердия двери, всеблагая Владычице.

Утро таинственное явилася еси, Дево, из Тебе бо Солнце возсия Христос во мраке отчаяния седящим. Темже просвещшиися ублажаем Тя по долгу, яко вину человеческаго обновления

Рай на земли словесный Тя насадив Господь, насадитель рая перваго, посреде Тебе, Богоневесто, яко жизни древо процвете. егоже моли пищи райския сподобити нас

Молитва

Пресвятая Владычице моя Богородице, горце слышавшая биение млата, егда пригвождаху ко кресту Сына Твоего и Бога нашего, спаси мя, еже не слышати скрежета зубнаго во аде. Рыданием Твоим у креста Спасителя моего, вечнаго плача исхити мя. Тебе самой душу пройде оружие у креста, сотвори, да мимо идут мене будущия угрызения совести. Купино неопалимая, юже провиде Моисей, пламени геенскаго избави мя. Несть ми по Бозе иныя помощи и инаго заступления разве Тебе, Мати Божия, Царица небесе и земли. Верую Твоей всемощней благодатней силе и исповедую милосердие Твое к грешникам. Ибо кто, притекаяй к Тебе, без помощи от Тебе исходит? Сего ради и аз грешный, по вся дни прибегаю к Тебе во всех нуждах и печалех моих. Но несть ми во всякое время больше сея нужды, разве вечнаго жребия моего, егда буду аз в десных или шуиих, наследую рай или низвержен буду в преисподнюю. Услыши же, Владычице, сию молитву мою, да не постигнет мя вечное осуждение, да не пойду с судилища в противную страну от Тебе, Владычице, но потеку за Тобою вкупе с прочими, достойными вечнаго веселия на небе. О, Премилосердая Мати Божия, к Тебе припадаю, якоже зриши, с сокрушенными слезами и душею: спасающи, спаси душу мою. Умоли о мне Господа, да прииму хотя крупицы, падающия от трапезы святых в Царствии Небесном и тако геенскаго огня избавлюся и обрящу рай Тобою, Благословенная. Аминь.

Кафисма 10

Псалом 70

На Тя, Госпоже, уповах и не постыжуся во век: милостию Твоею изми мя. Ради грехов моих озлоблен есмь зело, врази мои превзыдоша главу мою, подражниша мя и поругашамися весь день; вонми, всемилостивая Госпоже, яко скорблю: простри десницу Твою и помози погибающему; не закосни, не закосни молитвами Твоими, в Тебе утвердихся оть утробы, от чрева матере моея Ты еси едина неложная моя покровительнице.

Псалом 71

Боже, праведный суд Твой возлюбленному Сыну Твоему, Царю царей, дал еси, во еже судити людем Твоим в правде; ниспосылаеши милости Твоя на нас и чрез небесную Царицу, возлюбленную Матерь Его, на руцех Ея зрим Сына Божия, спасение и вечный живот наш, небеса и земля исполнены славы Ея. О, препрославленная Владычице! Тобою услаждаются наши сердца; сотвори забыти нам грехолюбивыя страсти суетныя жизни сея, влецы нас узами благостыни Твоея и возбуди в душах наших жажду вечных благ, упой сладостию райскою сердца и мысли наша.

Песнь вместо славы

Владычице, не отрини раба Твоего, иже всю надежду свою по Бозе возлагает на Тя; не возгнушайся мною, невоздержным, и не презри бедствующаго и жесточайшеми болезнями мучимаго; но, яко сострадательная Матерь милосердаго Бога, помилуй раба Твоего, избави мя от осуждения в моей совести, утиши бурю злых помыслов, угаси пещь вожделений и пламень плоти укроти, и возжги во мне любовь к Сыну Твоему и Богу, и все чувства мои охраняй, не попущай давать входа в сердце мое ни единому безумному пожеланию. Умоли Господа, да подаст мне время покаяния, да не сразит мя безплодным секира смерти и да не буду ввержен во огнь. Возжги угасший светильник души моей, разсей мрак беззаконий моих и мглу похотей моих разгони Твоим ходатайством, ибо много может молитва Матери пред Сыном, удобопреклонным к примирению. Дай мне свет покаяния и приведи мя ко днем сердечнаго сокрушения.

Псалом 72

Коль благь Господь правым сердцем, любящим и почитающим Пречистую Матерь Его: Ея молитвами благоугождаем Ему, Ея заступлением отвращается от нас, грешных, гнев Божий, Ея помощию труды наши благословляются, Она за любящих и почитающих Ю предстанет ходатаицею на страшнем суде Божием, удаляющии же себе от Нея погибнут.

Псалом 73

Госпоже, не отрини нас до конца в день печали, да исправится молитва наша пред Тобою и гласы воздыхающих не презри; напряже лук свой противу нас душевный врагь, но Ты, всемощная Царице, воздвигни руце Твой на гордыню его в конец и прожени его на место вечнаго осуждения.

Песнь вместо славы

Радуйся, Преблагословенная Приснодево Марие, прибежище кающихся грешников, питательнице убогих, спасение немощных, утешение озлобленных, даждь мне благодать сию, да душа моя любовию внутреннею возлюбит Тя и язык мой днем и нощию возглаголет хвалы Твоея.

Псалом 74

Исповемся Тебе, Госпоже, всем сердцем моим и о хвале Твоей веселюся: пойте Ей живущии на земли и хвалу Ея в людех возвещайте, покланяйтеся Ей в небесной красоте Ея, славите Ю в неисповедимой доброте Ея, помяните во веки веков милости Ея, содержите во уме силы и чудеса Ея.

Псалом 75

Ведом бысть во Иудеи Богь и в новоблагодатном Израиле велие имя Его; преславно и усладительно паче меда и сота и имя Преблагословенныя Приснодевы Марии; щедроты Ея паче аромат; спасение и живот, мир и слава девственным Плодом Ея нам туне даруются: прославите Ю небеса и земля, дадите Ей вся тварь хвалу и милость Ея вознесите благодарно.

Псалом 76

Гласом моим к Госпоже Марии воззвах и внят ми милостию Своею, отят от сердца моего уныние и скорбь, кротостию Своею дух оживотвори, слабость воли моея премени в надежду благую и Своим смиренным голубиным воззрением вся внутренняя моя играти сотвори, помощию Своею изведе мя от беды смертныя и от руки врага и местника злаго избави. Благодарю Тя, Бога и Спасителя моего, и возлюбленную Матерь Твою, мою скорую помощницу.

Песнь вместо славы

Радуйся, ходатаице к Богу и человеком, Мати милости, неистощимо бо изливаеши на нас, грешных, дары благодати Твоея; Твоими молитвами, всемилостивая Владычице, Твоею помощию, Твоим предстательством к возлюбленному Сыну Твоему и Богу нашему язвы наши греховныя врачуются. Колико грешников, из самой бездны падения к Тебе со слезами воззвавших, Ты, помощнице, премилосердно исхитила еси и в радость вечно блаженную внити сподобила. Слава Тебе, Премилосердная Мати!

По 10-й кафисме тропари, гл. 2

К покрову Твоему, Богородице, притекаю, прося Твоего заступления, не отрини мене, Пречистая, но благоутробно приими зовущаго: Врача человеком рождшая, недугующую душу мою исцели.

Божественным светом тьму моего сердца далече, Благая, отжени, дающи ми токи слез на отмытие скверн моих, имиже опечалих Преблагаго Господа: в Тебе бо ми единей утешение

Житие мое, Владычице, многих искушений исполнено от многих зол моих, но Ты сих всех мя избави, и соделай непреткновенно, да верою славлю Твое божественное Имя

Молитва

О, Пресвятая Госпоже, Дево Богородице, высшая Херувимов и Серафимов и Святейшая всех Святых. К Тебе припадаю и усердно молюся, Преблагословенная рода нашего Заступница, в странствии сем земном, многоскорбном и многомятежном, не лиши мене Твоего заступления и покрова державнаго. Спаси и защити мя, Владычице, от разженных стрел лукаваго врага спасения нашего. Укрепи немощную волю мою в делании заповедей Христовых, умягчи окаменелое сердце мое любовию к Богу и ближним моим, даруй ми сокрушение сердечное и покаяние истинное, да, очищся от скверны греховныя, возмогу принести Творцу благоугодные Ему плоды добрых дел и сподобитися мирныя христианския кончины и ответа праваго на страшнем и нелицеприятнем суде Его. Ей, Госпоже всемилостивая, в час грозный смертный наипаче яви мне Твое многомощное заступление, ускори тогда на помощь мне, безпомощному, и державною рукою Твоею исхити мя из власти лютаго миродержца: воистину бо много может молитва Твоя пред лицем Господа и ничтоже невозможно ходатайству Твоему, аще токмо восхощеши. Темже, на святый образ Твой умиленно взирая и пред Ним, яко живей Ти с нами сущей, покланяяся с упованием благим, сам себе и весь живот мой Тебе по Бозе молитвенно предаю и Тя величаю с рождшимся от Тебе Спасителем нашим, Господом Иисусом Христом, Емуже со безначальным Его Отцем и Пресвятым Духом подобает всякая слава, честь и поклонение, ныне и присно, и во веки веков. Аминь.

Кафисма 11

Псалом 77

Внемлите, людие Божии, закону Бога живаго, приклоните ухо ваше во глаголы Спасителя Христа, не забудите милости и щедрот и возлюбленныя Его Матери, Преблагословенныя Приснодевы Марии, отверзите уста и сердца к славословию Ея, возвещайте от рода в род хвалы, силы и чудеса Ея, положите преславное имя Ея яко знамение или печать на сердцах ваших: якоже бо кокош, покрывает Она всех нас воскрилием риз Своих.

Песнь вместо славы

Радуйся, Пресвятая Богородице Приснодево Марие, от Тебе Царь царствующих и Господь господствующих плоть восприяти изволи, Ты ходатаица между Богом и человеки, небо и земля Твоим благословенным плодом примирены; исходатайствуй у человеколюбца Бога и моим согрешением прощение, яко да всем сердцем возлюблю и прославлю Сына Твоего, Господа нашего Иисуса Христа, и Тя, многомилостивую Матерь, ныне и во веки веков.

Псалом 78

Госпоже! вольныя моя грехи и дуси нечистыя приидоша во святый храм души моея и опустошиша его дерзностне; увы! плача плачу со Иеремиею и слезы мои на ланитех моих: како потемне злато веры моея? како изменися сребро любви к сладчайшему Иисусу? како разсыпашася стяжания святыни христианския? увы! согреших на небо и пред Тобою, Владычице, заступи за мя, грешнаго, пред Богом, присовокупи мя паки к лику избранных Его, одожди огорченному сердцу моему капли сладости небесныя благодати Твоея.

Псалом 79

Пасый Израиля древняго, облагодатствовавый новаго в возлюбленнем Твоем Сыне Спасителе Христе, премилосердный Отче небесный! сподоби нас, грешных, достойно ублажити пренепорочную Приснодеву Марию, яко родившую божественнаго нашего Избавителя и Спасителя рода человеческаго, яко во всю жизнь странствия сыновня на земли бывшую от Него неотлучною и всем Его страданиям и поношениям мужеетвенною сподвижницею. О, возлюбленная и святейшая Мати Божия, сподоби нас имети во устнах и в сердце пророческую Твою песнь сию: се бо от ныне ублажат Мя вси роди.

Псалом 80

Радуйтеся Госпоже помощнице нашей, воскликните Ей в веселии сердца вашего: не оставит тщетно смиренное моление ваше, исполнит во благих вся прошения ваша, токмо да подражаим смирению, послушанию и кротости Ея: любит бо Она богобоязливая сердца, благодать Ея всегда пребывает с таковыми: притецыте убо к Ней вси со обещаниями святыми и неизреченных благих Ея причаститеся. Слава Тебе, Владычице, неотемлемое сокровище душ наших!

Песнь вместо славы

Радуйся, Пресвятая, паче всех жен благословенная Богородице Марие, по Единородном Твоем истинное всех верных спасение; сотвори, Владычице, да никакою любовию мира сего пристрастно обдержуся, но, презрев вся соблазны и похоти плотския, в Триедином Боге и в матернем благопокровительстве Твоем истинный покой душе и телу моему имети всегда буду.

Псалом 81

Бог ста в сонме богов: от высочайшаго благоволения Его яко райский цвет, произыде Матерь Божия. Приидите и припадите к стопам Ея вси любящии и почитающии Ю: Она бо ест источник вечныя жизни, туне напаяет жаждущих, и пиющии от сего не вжаждутся во веки.

Псалом 82

Владычице, кто по Бозе подобен Тебе на небеси и на земли, яко честию и славою превосходит небожителей и земнородных? Якоже отстоят небеса от земли, сице превознеслася еси над всеми творениями. Прильпе душа моя по тебе, Царице небесная, сотвори мя выну мысленно взирати на славу и величество Твое, яко да насыщуся ненасытимою благодатию Твоею.

Псалом 83

Коль возлюбленна горняя селения Твоя, препрославленная Госпоже Марие, и коль любительна скиния вечнаго покоя Твоего! Обратися, обратися, горестная душе моя, всем твоим желанием к вечному оному твоему покою, вечная нерукотворенная храмина и тебе готова есть: Царица небесная ищет твоего спасения, предстоя престолу Божию, выну молится о нем и молитвы Ея паче ливана и кадила благовоннаго пред возлюбленнаго Сына Ея, Спасителя нашего, восходят. Слава Тебе, Владычице, в молитвах о нас грешных неусыпающей и в предстательствах непреложное наше упование!

Псалом 84

Благоволил еси, Господи, освятити утробу пренепорочныя Приснодевы Марии Твоим спасительным вочеловечением; сия бо есть прекраснейшая во дщерех Иерусалимовых и имя Ея во благословении. Преблагословенную Приснодеву Марию пойте святии Ангели и Архангели, славите Ю Силы и Господствия; вернии, взыщите мудрость Ея; убозии, богатитеся сокровищами щедрот Ея; желающии вечно спастися, призывайте Ю в помощь в простоте сердца вашего.

Песнь вместо славы

Радуйся, Царице небесная, Ты, яко багряновидная заря, сияеши, яко луна полна и светла, яко лучезарное солнце вся освещаеши; даждь мне, грешному, молюся Ти, благодарныя Тебе молитвы возсылати всегда и ничтоже ино желати, тоимо еже бы очи Твои матернии от мене не отвращени были, тии очи, иже ангельских очес чистейшии суть, о, святейшая Приснодево Марие!

По 11-й кафисме тропари, гл. 3

Чудо велие, како на руках Ты носила еси, Дево Мати, дланию Своею вся содержащаго, и от сосцу Твоею питала еси млеком Пищедателя, егоже прилежно моли Пресвятая, даровати нам велию милость.

Покаяния стезю сокрушенную проходити мя укрепи, всесильне Спасе, деянии же благими обогати убогую душу мою и от страстей тесноты в широту безстрастия возведи ю, молитвами Богородицы, едине человеколюбче

Пристанище спасительное Тя имамы, Богородице, в пучине житейстей обуреваемии. Ты убо спаси от всякия беды притекающих к Твоей благости

Молитва

О, Всепетая Госпоже, Владычице, Дево Богородице Марие! Ангельских чинов веселие и православных христиан непрестанное радование! Смиренно припадая пред Твоим неисповедимым величием, умильно молю Тя, грешный и недостойный раб Твой: приими от всея души возсылаемое Тебе от мене благодарственное сие хваление и своею любовию, яко любвеобильнейшая Мати, согрей хладное сердце мое, умоли своим теплым предстательством рождшагося от Тебе Господа Бога и Спаса нашего Иисуса Христа, да простит ми вся согрешения моя и препояшет мя силою Своею свыше ко исполнению Божественных заповедей Своих. Озари душу мою немерцающим Твоим светом, иже да будет мне, странствующему в сей земной жизни, путеводителем к горнему отечеству, Иерусалиму небесному. Да тако, по Бозе имея в Тебе единей твердую надежду и упование спасения моего, прославлю всесвятое и великолепое имя Отца, и Сына, и Святаго Духа всегда, ныне и в безконечные веки. Аминь.

Кафисма 12

Псалом 85

Приклони, Госпоже, ухо Твое и услыши мя; обрати матернее лице Твое и помилуй мя; сияние святыя красоты Твоея веселит душу мою, милости Твоя паче меда и сота, даяние благодати Твоея просвещает разум, источник благостыни Твоея напаяет жаждущих, Ангельский зрак лица Твоего отвлекает от греха; видети, знати Тя и покланятися Тебе есть корень блаженнаго безсмертия и прославляти силы Твоя есть путь спасения.

Псалом 86

Основание духовной жизни есть любити Иисуса Христа всем сердцем и всею душею и рождшей Его по плоти возлюбленней Его Матери, Пречистей Приснодеве Марии покланятися благоговейно и чтити Ю, яко препрославленную Царицу небесную, честнейшую Херувим и славнейшую Серафим. Преславная глаголашася о Тебе, о, священнейший храме и раю словесный; истинно уповающии на Тя обрящут вся сокровища небесныя, а не призывающии Тя в жизни сей, жизни вечноблаженныя лишатся. О, премилосердная Владычице, сотвори, да живем благодатию Святаго Духа и сладчайшее имя Твое выну да будет в сердцах наших.

Псалом 87

Гопоже Марие, Ты едина скорая помощница во спасение мое; во дни и в нощи взываю к Тебе: призри на скорбь внутреннюю мою и утеши небесным Твоим посещением унылый дух мой; умножишася бо беззакония в душе моей и несть мира в костех моих от лица грех моих, но молюся Ти, всемощная Владычице, помози мне к сопротивлению злей воле моей и утверди сердце мое на брань с плотскими похотьми.

Песнь вместо славы

Радуйся, Пренепорочная, Пресвятей Троице предстоящая; радуйся, благословенная в женах, душею и телом Пречистая Марие; молюся Ти, осияй светлостию лица Твоего внутренняя души моея, яко о Тебе возрадуется сердце мое, утешится дух мой, яко да прилежно работаю Тебе и всею душею и всем сердцем возлюблю Тя во веки веков.

Псалом 88

Милости Твоя, Госпоже, во веки воспою, мастию щедрот Твоих умягчи ожесточенное мое сердце и елеем милости Твоея уврачуй греховныя раны; молюся Ти, Владычице, явися мне веселым лицем при кончине моей, и небесный зрак Твой возвеселит исход души моея, избави мя от внезапныя смерти, да не порадуется о мне душевный враг мой.

Песнь вместо славы

Пресвятая и преблагая Владычице Богородице, прибежище мое, жизнь, заступление, оружие, похвало, надеждо, крепосте моя, даруй ми наслаждатися непостижимыми, неизреченными и неисповедимыми дарами Сына Твоего в пренебесной жизни. Ты бо вся можеши, елика хощеши, яко Матерь Вышняго, и сего ради имаши дерзновение к Нему. Да не лишен убо буду, Пречистая Владычице, исполнения упования моего, но да сподоблюся получити оное, Богоневесто, упование всех, несказанно рождшая Господа нашего Иисуса Христа, истиннаго Бога и Владыку. Сподоби мя в настоящем веце неосужденно причащатися пресвятаго и пречистаго Тела и Крови Сына и Бога Твоего, в будущем же сладчайшия вечери небесныя и веселия райскаго в обителях Святых, идеже всех веселящихся жилище. Сих благь сподобившеся, аз, раб недостойный, буду во веки веков прославляти всечестное и великолепое имя Сына и Бога Твоего, Иже всех, от глубины души кающихся, приемлет ради Твоего ходатайства и предстательства за всех грешников. Тобою бо, всепетая и Преблагая Владычице, спасается все человеческое естество.

Псалом 89

Владычице! прибежище была еси нам во всех нуждах наших, и ныне изливаеши с небес благодать Твою на вся благая прошения наша; аще Ты милости Твоя удержиши грех ради наших, обыдут нас вся злая; не имамы иныя предстательницы к Богу, токмо Тебе едину. Спаси нас, Владычице, спаси, уповаем бо на Тя и несумненно веруем, яко упование наше не постыдится никогда.

Псалом 90

Живый в помощи Матери Божией под крепким кровом Ея водворится; адский противник врагь не повредит его и стрела его летящая не коснется ему, яко многомощная Владычица избавит его от сети ловящаго и крилами Своими покрыет его. Возопийте к Ней вси в бедах ваших и зловредная рана не приближится душам и телесем вашим: явит бо вам всюду спасение Свое.

Песнь вместо славы

Радуйся, Пресвятая Богородице Марие: предстани безпомощным, помози малодушным, утеши плачущих, моли за люди, заступи за клир и всех православных христиан приими в Свое заступление, да веселятся и торжествуют вси о преславном имени Твоем.

По 12-й кафисме тропари, гл. 4

Матерь Бога нашего воспоим, яко Тою радость мирови даровася, Тою разрешение клятвы обрете человечество и избавляемся от всяких лютых.

Господи, рождшия Тя предстательством храни стадо Твое, еже кровию Твоею честною искупил еси, и от навет вражиих невредно соблюди, да славословим, щедре, Твое божественное снисхождение

Осквернившуюся страстьми душу мою, Пречистая Богородительнице, Твоими молитвами очисти: Ты бо еси спасительное очищение с верою молящимся Тебе

Молитва

О, Всемилостивая Владычице, Царице Небесная, Пресвятая Богородице! Вем вся грехи моя и нечестия сердца моего, и како дерзну к Тебе прибегати недостойный аз и прошения моя приносити; но вем и великия милости, и щедроты Твоя, яже на христианский род выну изливаещи: Ты бо еси грешников споручница и помощь. Ты веси, Пречистая Мати, Дево Богородице, скорбь сердца моего и печаль души моея. Молюся убо Тебе усердно: вся скорбная, яже, по благой и святой воле Господа нашего Иисуса Христа, наидоша на мя, имиже веси судьбами, устрой о мне во благое; аще ли же от врага души моея уязвления сия содеяшася, всесильною Твоею помощию сокруши его коварства и от нечестивых прилог его избави душу мою. Тебе бо вся возможна суть, преисполненней всякия милости и благостыни, яко Ты еси препрославленна во веки. Аминь.

Кафисма 13

Псалом 91

Благо есть исповедатися Господеви, благо ест воспевати славу и чудеса возлюбленныя Его Матери, Приснодевы Марии: возвещайте, возвещайте бодрым умом щедроты Ея и все милости Ея, совосклицайте в гуслех сердца вашего, яко возвеличишася над нами пречудныя дела Ея, и муж безумен не разумеет сих, взыскающии же Ю приемлются, яко райстии граждане, и обносящии во уме и сердце сладчайшее имя Ея напишутся в книге вечнаго живота, насаждени будут в дому Господни, во дворех Бога нашего процветут.

Псалом 92

Господь воцарися, в лепоту облечеся; облече и благословенную Матерь Свою преиспещренною одеждою всех прекрасных добродетелей, освященному бо Духом Святым дому Его подобает таковая святыня. Научи и нас, Владычице, всякую творити правду, облецы души наша в ризу спасения, да не вне чертога Христова пребудем, помози оскудевающим в чистой совести, преобрази ю и предустави ны в жребий небесныя истины.

Псалом 93

Бог отмщений Господь, ибо праведному суду Его подлежат нераскаянные грехи наша, но Ты, всемилостивая Владычице, к долготерпению Его преклоняеши и умоляеши; аще бо не Ты помогала нам предстательством Твоим к Нему, в мале вселилася бы во ад ожесточенная наша душа; блажен, иже разумеет сердцем матернее Твое ходатайство; не тщетна есть молитва, еюже молится к Тебе всякая кающаяся грешная душа, по множеству грехов в совести ея небесныя Твоя утешения ободрят ю и мрачный дух отчаяния исчезнет. Слава Тебе, Царице небесная, спасение грешников, ищущих спасения.

Песнь вместо славы

Радуйся, Пресвятая Приснодево Марие, пречистая и большая всех лик ангельских и архангельских, дева прежде рождества, дева в рождестве, дева по рождестве; молюся Ти, даждь мне благодать сию, да возлюблю душевную и телесную чистоту, да не лишуся благодати Святаго Духа.

Псалом 94

Приидите, возрадуемся Госпоже нашей Приснодеве Марии, предварим лице Ея во псалмех и песньми духовными восхвалим Ю; приидите, поклонимся и припадем к стопам Ея, исповедующе с благопризнательным плачем пред Нею грехи наша: Она у возлюбленнаго Сына Своего, Христа Бога нашего, испросит нам милости, Она предстанет пред судищем Божиим, заступит при кончине за души наша и удостоит предстательством Своим вечно блаженнаго покоя.

Псалом 95

Воспойте новыя благодарныя песни, воспойте Матери Божией вси концы земли, возвестите во языцех славу Ея и во всех людех чудеса Ея; слава небесная в святейшем лице Ея, кротость и смирение во очесех Ея: да веселятся небеса, внутрь имея в себе Царицу всемощную, да радуется земля, торжествующая о преславном имени Ея.

Псалом 96

Господь воцарися, радуются небеса и земля, радуется паче всех небожителей и земнородных возлюбленная Матерь Его, пречистая Приснодева Мария во всей державе владычествия Его; покланяйтеся Ей вси жители райстии, Ангели, Архангели и вся силы небесныя возвеличите великую вашу Царицу; патриарси и пророцы, соплетите Ей вечныя хвалы; апостоли, святители, мученицы, исповедницы, девственницы, воспойте Ей от песней Сионских; веселитеся вси праведнии о препрославленной Владычице, исповедайте всегда и всюду сердцем и устами память святыни Ея.

Песнь вместо славы

Звездо присносияющая Приснодево Марие, просвети, молюся Ти, греховную слепоту мою, вонми воздыханию души моея, во еже прилежно любити Тя, исполни сердце мое небесныя благодати, яко да и аз, аще и недостойный, но благостию и милостию возлюбленнаго Сына Твоего, моего же истиннаго Спасителя, доселе покрываемый, причащуся некиих малейших крупиц, падающих от трапезы вечнаго веселия.

Псалом 97

Воспойте Госпоже нашей песнь новую, яко дивная чудеса сотвори в роде христианском, откры милости Своя в концах земли, слышно бысть преславное имя Ея по всей вселенней; мы же паче всех веруем и исповедуем, яко Она была, есть и будет на всегда премилосердая наша Матерь, бездна милости и щедрот, лествица к небеси, мысленный ковчег, имже от вечнаго огненнаго потопа безопасно спасемся.

Псалом 98

Господь воцарися, сопрославися с Ним и возлюбленная Его Матерь, яко честнейшая Херувимов и славнейшая Серафимов стоит одесную Бога; велия в Сионе слава Ея и в горнем Иерусалиме великолепие Ея, велия хвала Ея и на земли, и Церковь верующих исповедуется преславному имени Ея в век и во век века.

Псалом 99

Воскликните Матери Божией вси вернии и благочестивии людие, молитеся Ей со благоговением и радуйтеся пред Нею с веселием духа, приступите к Ней с благопокоренным сердцем и в сердечнем умилении преклоните колена пред святым изображением лица Ея, небесною благодатию осияваемаго; будем чисти сердцем и явит нам Себе в мире и тишине; от кого же Царица небесная за ожесточенное нераскаяние отвратит лице Свое, несть ему надежды ко спасению. О, премилосердная Владычице, помяни нас во благоволении Твоем, и адская неприязнь исчезнет.

Псалом 100

Милость и суд воспою Тебе, Царице небесней, воспою милость, еяже аще смиренно от Тебе ищу, не погибаю, а спасаюся, воспою суд, по немуже за беззакония моя лишаюся матерняго Твоего благоволения ко мне, но восхвалю, восхвалю с песнию преславное имя Твое, Владычице, и обрящу истинный покой души моей; восперихся ко благостыни и щедротам Твоим и не лишуся от упования и надежды моея на Тя; утверди слабую душу мою в вере, надежде и любви к возлюбленному Твоему Сыну, Спасителю и Богу моему, да явит Тобою согрешением моим прощение.

Песнь вместо славы

Радуйся, уединения любительнице и вечнаго покоя всем верующим желательнице, кротчайшая Дево среди дев Иерусалимских, благоуханный цвете, тихая и незлобивая Голубице, Мати чадолюбивая! Расточи, молюся Ти, суетныя моя помышления и дух разсеянный собери, яко к Тебе воздыхаю и покланяюся Тебе всегда, аминь.

По 13-й кафизме тропари, гл. 5

Неисчетную благодать милосердия Твоего и божественную державу силы Твоея ведый, Владычице, взываю Ти прилежно: от всякия лютыя скорби исхити Твоего раба, и исполни радости сердце мое, Богорадованная.

Врагом противоополчися борющым нас: люте бо находят на достояние Твое, Всецарице, погуби тех наглости, да разумеют крепость Твою: божественным Твоим манием вся потреби

Христиан неложное спасение, грешников нерушимое предстательство, крепкая помощнице наша, покрый мя крилы державнаго Твоего покрова, и душе моей исходящей предстани.

Молитва

О, Пресвятая Госпоже, Владычице моя Богородице, Небесная Царице! спаси и избави мя, грешнаго раба Твоего, от напрасныя клеветы, от всякия беды и напасти и внезапныя смерти. Помилуй мя в дневных часех, и во утренних и вечерних, и во всякое время сохрани мя; стояща, седяща соблюди, и на всяком пути ходяща, и в нощных часех спяща снабди, покрый и заступи. Защити мя, Владычице Богородице, от всех враг моих, видимых и невидимых, и от всякаго злаго обстояния. На всяком месте и на всякое время буди ми, Мати Преблагая, необоримая стена и крепкое заступление всегда, ныне, и присно, и во веки веков. Аминь.

Кафисма 14

Псалом 101

Госпоже, услыши молитву мою и вопль мой сердечный к Тебе да приидет, да не отвратиши пресвятое лице Твое от мене, ниже возгнушаешися за нечистоту мою; не остави мя погибнути от злых на мя советов душевных врагов моих, и не попусти им с лютым поношением посмеятися надо мною; уповающии на Тя не убоятся томящих озлоблений их и восхваляющии Тя молитвами Твоими избавятся от всех вражиих наветов: носиши бо на руках Твоих Победителя ада и смерти.

Псалом 102

Благослови душе моя возлюбленную Матерь Господа нашего Иисуса Христа и вся внутренняя моя имя святое Ея; не забудем благотворений Ея, ниже милостей и щедрот Ея, благодатию Ея грехи заглаждаются и болезни врачуются. Благословите Ю вся силы небес, благословите Ю вси небожители и земнороднии.

Песнь вместо славы

Радуйся, благороднейшая Родительнице единороднаго Сына Божия, Приснодево Марие, Яже всем милости недро отверзаеши, яко от святыни Твоея приемлем вси благодать. Приими, Всеблагословенная, молитвы наша, от устен оскверненных пред Тобою проливаемыя, и моли за нас возлюбленнаго Твоего Сына, да Его святейшим благоволением по жизни сей сподобимся узрети Тя во Царствии Божии со Отцем, Сыном и Св. Духом во вся веки.

Псалом 103

Благослови, душе моя, Господа, возвеличившагося зело, зело благослови и Приснодеву Марию, в небесную велелепоту облекшуюся; яко призре Господь на смирение рабы Своея, и мы, христианстии роди, с умилением сердца да ублажаем Ю; паче меда и сота сладчайша душе нашей память Ея и благоусладительна беседа о велиих чудесех Ея; Она есть премилосердная Матерь, о нас, яко о чадех, веселящаяся, и мы, яко птенцы, распростертыми крилами помощи Ея всегда защищаемыя, посреде самыя сени смертныя не убоимся зла, с нами Владычица наша, с нами милость и помощь Ея.

Песнь вместо славы

Сподоби мя всегда, во все дни жизни моей, творить благоугодное человеколюбивому Богу и, доколе пребываю в сем многоболезненном житии, соблюдай мя, покрывай, сохраняй: буди со мною в плавании моем, сопутствуй мне, егда путешествую; храни мя, егда бодрствую; покрывай мя, егда сплю; и все пути мои направляй ко благу. Во время же исхода моего из тела, буди ми предстательницею, боголюбивая Владычице, и нестерпимую оную болезнь смягчи, труд облегчи, тоску мою утоли и бедную мою душу приведи к вечным обителям, да не встретит мя темная сила и да не увлечет во глубину ада. Даждь ми узреть Судию милосердаго, милостиво на мя взирающа; даждь избавитися, по Твоему ходатайству, Богоневестная Дево, от вечнаго пламени и наслаждатися веселием райским в Царстве Небеснем.

Псалом 104

Исповедайтеся в теплых молитвах Царице нашей Богородице и призывайте с сердечным чувствованием святое имя Ея, пойте Ей в песнех и пениих духовных, преславно поведающе в род и род древния и новыя силы и чудеса Ея; хвалите и превозносите Ю девы, дщери Сионския, понеже обручи вас прекрасному небесному жениху, Царю славы, покланяйтеся с благоговейным страхом святолепному лицу Ея, спасение бо душам вашим вечное держит на руках Своих и, иже достойно Ю почитает, восприимет от Господа праведную мзду.

Песнь вместо славы

Радуйся, неувядаемый райский Цвете: молюся Ти, да облагоухает мя ароматная воня Твоя, сердце мое Тя любит, чувства веселятся, весь ум мой воспаряет.

По 14-й кафисме тропари, гл. 6

Демонскими прилоги колеблему мне, Дево, на камени утверди мя божественных повелений Христовых, да не потопит мене, Чистая, прегрешений буря и помыслов злых треволнение.

Страстей нахождения в ров погибели низвлачат изнемогающую душу мою, но умилосердися надо мною, рождшая Спаса всемилостиваго, и избави раба Твоего будущаго прещения.

Воистинну паче ума Твоя, Чистая, дарования, ихже сподобляеши рабы Твоя, тепле Тя славящыя и Твоему образу с верою покланяющыяся, чтущыя же от души и благоговейно лобызающыя, к нимже сопричти и мене, аще и несмь достоин Твоея милости

Молитва

Богорадованная Владычице, препрославленная Мати щедрот и человеколюбия, всемилостивая о всем мире Ходатаице, прилежно раби твои, к Твоему Божественному предстательству прибегающе и пречудному образу Твоему со умилением припадающе, молимся: молитву теплую Сыну Твоему и Богу нашему сотвори, о, Всепетая Царице и Владычице, да всяких болезней и печалей нас Тебе ради избавит и от грехов всяких свободит, Царствия Своего Небеснаго наследники ны покажет; велие бо и неизреченное, яко Мати, имаши дерзновение к Нему и вся можеши, елика восхощеши, едина во веки Благая и Благословенная. Аминь.

Кафисма 15

Псалом 105

Исповедайтеся Владычице Богородице, яко блага есть в щедротах Своих; кто возглаголет силы Ея, слышаны сотворит вся хвалы Ея? Благопоспеши, о, премилосердная Мати, обуреваемым нам в океане суетнаго мира сего спасением Твоим: всем сердцем молим Тя и всею душею величаем Тя, услыши гласы воздыхающих к Тебе, помози безпомощным, утеши плачущих, возвесели скорбящих, Ты бо еси живоносный милостей источник для всех, с верою и молитвами к Тебе прибегающих; слава Тебе, непостыдная надеждо наша.

Песнь вместо славы

Пресвятая Владычице моя, Богородице, милосердия сущи источник, покрове, упование и прибежище христиан, Тебе, всесильней предстательнице и споручнице покаяния и спасения моего, аз, грешный раб Твой, вручаю душу и тело мое, вход и исход мой, веру и жительство мое, кончину и число дней моих, глаголы и помышления моя, дела и начинания моя. Ты же, милостивая Мати Божия, мною руководствуй, покрывай, соблюдай и спасай мя от всех бесовских козней невредима, да немолчно, до последняго издыхания моего взываю Ти: Радуйся, Невесто Неневестная.

Псалом 106

Исповедайтеся Господеви, яко благ; исповедайтеся и возлюбленней Его Матери, яко велия милость Ея на нас; наставляет бо нас на путь истинныя мудрости, показует мирныя стези небесной истины, научает страху Господню и из любящаго Ю сердца изгоняет любовь к миру, яже есть вражда на Бога; блажени мы, аще молитвы наши к Ней благоугодны Ей; кости наши утучнятся от тука благодати Ея, насытятся алчущия души и жаждущия напоятся, из чрева бо Ея проистече живый и вечный источник спасения нашего.

Песнь вместо славы

Радуйся, едемский цвете, испущающий неизреченное благоухание; радуйся, пренепорочная чистото, юже возлюби Дух Святый; радуйся, слава всех девствующих о Господе; помози, Владычице, молимся Ти, и нам сохранити душевную и телесную чистоту: блажени бо чистии сердцем, яко тии Бога узрят.

Псалом 107

Готово сердце мое, Госпоже, готово сердце мое хвалы Тебе пети; искати благодать Твою лучши есть паче злата и камене многоценна, милости Господни на тех, иже Тя во истине почитают; прославляющии Тя прославятся и далече будут от вечной погибели, призывающии Тя в напастех и искушениях охранятся простертием крил скорыя помощи Твоея.

Псалом 108

Госпоже, хвалы к Тебе моея да не премолчиши и сие изреченное Тебе псалмопение прияти да изволиши: призри на труд мой сей и сотвори его Тебе благоугодным, соблюди мя невредима под защищением десницы Твоея и утеши сокрушенную душу благостию и милостию возлюбленнаго Сына Твоего, истиннаго моего Спасителя, Господа и Бога.

Песнь вместо славы

О, преблагословенная Приснодево Марие, возлюбленная Дщерь Отца небеснаго, молюся Ти: буди мне, грешному, кормчая, дóндеже в бурном море века сего плаваю, а паче при кончине жизни моея, благополучно да достигну пристанища небеснаго Иерусалима, идеже Тя буду хвалити и блажити во вся веки веков, аминь.

По 15-й кафисме тропари, гл. 7

Всещедраго Бога о нас, Дево, умоли, избавитися душам нашым от всякаго вреда змиина.

Воздыхающа мя, Господи, приими яко милостив, и помилуй мя яко мытаря, Матере Твоея ходатайством

Ко множеству милости Твоея ныне прибегаю, разреши вериги, Богородице, согрешений моих

Молитва

О, Пресвятая Владычице Богородице, Небеснаго Царя Мати, наша же преблагая надеждо, предызбранная Богоотроковице, ненадеющимся надеяние, грешным спасение, сирым приятелище, нагим одеяние, скорбящим утешение и радость, обидимым покровительнице и всем сущим в бедах и напастех вспоможение и заступление. О, всемилостивая Госпоже Дево Богородице, зриши мою беду, и скорбь, и напасть; помози ми, бедному и немощному, скверному и унылому, печальному, скорбному и ненадежному, и отими от меня печаль сию, яко странну; обиду мою Ты веси, разреши ту, Всенепорочная, яко волиши и можеши; не даждь во отчаяние впасти, яко не имамы иныя помощи, разве Сына Твоего, Превечнаго Младенца, и Тебе, Божия Мати. О, Владычице мира, о, Царице всея твари, о, Голубице Пресвятая, на Твой пречудный образ с Превечным Младенцем взираю, со воздыханием и сокрушением сердца преклоняю колена и главу до земли, призри благосердым оком, Всепетая Богородице и услыши, Преблагая, и не отрини, но благоволи помиловати и не отвержи моего воздыхания, никтоже бо, притекаяй к Тебе, посрамлен от Тебе исходит, но просит благодати и приемлет дар на пользу прошения. Аминь.

Кафисма 16

Псалом 109

Рече Господь Госпоже нашей: стани, возлюбленная Мати Моя, одесную Мене, святыня и благостыня Твоя благоугодна Мне, темже царствуй со Мною во веки, венец безсмертия на главе святей Твоей да будет, егоже блистание и светлость не помрачится. О, Мати света, освети нас во мраке греховнем святынею Твоею и излей на нас мудрость и ум учения Христова.

Псалом 110

Исповемся Тебе, Госпоже, всем сердцем моим и прославлю Тя усты моими, память чудес Твоих сотворила еси во всяком роде и роде, и милости Твоя во истине и правоте; Отец небесный посла нам вечно мирный завет Свой чрез возлюбленнаго Сына Своего и Ты, Владычице, послужила еси великому святейшему оному таинству. Коль убо блажен жребий наш, коль восхитительна надежда наша на Тя! Славно и дивно имя Твое в нас: содержащии его в сердце не ужаснутся в час смерти.

Псалом 111

Блажен муж, благоговейно почитающий Приснодеву Марию; блаженно сердце его, иже пламенно любит Ю; блаженна душа его, яже не насытится хвалы Ея; молитвами Ея возсияет в душе его свет Божий и Дух Святый освятит разум его; в память вечную будет таковый, от слуха зла не убоится сердце его; утвердит Царица небесная на нем благодать Свою и заступление Ея пребудет с ним во век века.

Песнь вместо славы

Радуйся, небесный кивоте, покоище живаго Бога, неизреченное составление плоти Христовы, чаше Царя небеснаго, в нейже растворися от Духа Святаго вино неисчерпаемыя благодати; коим благодарением ублажим Тя, светоносная Владычице? радуемся и веселимся, яко преславныя судьбы Божии на Тебе совершишася.

Псалом 112

Хвалите, отроцы, Матерь Господню, хвалите, старцы, имя святое Ея; от восток солнца до запад хвально имя Ея, кроток и смирен образ Ея, на всяку плоть милости Ея и щедроты Ея даже до конец земли: слава Тебе, Владычице, христианская славо и похвало.

Псалом 113

Во исходе души моея от Египта мира сего предстани ей, небесная Утешительнице, озари ю святым Твоим лицем, и призраки бесов не устрашат ю; буди ей лествица к небеси и заступи ю, безответную, на страшнем судищи Христове.

Псалом 114

Возлюбих Матерь Господа Бога моего и свет благодати Ея освети мя, обыдоша мя болезни смертныя и беды адовы окружиша мя, но призвах имя Марии и утешися душа моя; память Твоя, Владычице, да будет посреде сердца моего и не повредит мя действо лукаваго; обратися, душе моя, на хвалу Ея и обрящеши блаженный покой в будущей жизни, егда приидет Праведный Судия воздати комуждо по делом его.

Песнь вместо славы

Радуйся, всемилостивейшая Мати, преблагословенная Приснодево Марие! воззри свыше на недостойнаго грешника и утоли страсти злыя моея воли, радуешися бо о обращении моем на путь правый; молю же Тя, да управляеши мя, да соблюдаеши, да покрываеши мя от всех вражиих наветов.

Псалом 115

Веровах, темже и возглаголах славу и хвалу Твою, Царице небесная; Ты еси чаша спасения и от благодатнаго растворения в ней, яко от тука небеснаго, насыщается душа моя; благословением чрева Твоего расторгни узы грехов моих и подаждь, Владычице, помощь и силу до последняго моего издыхания сохранити мне целым и нерушимым завет любви и мира с Богом.

Псалом 116

Хвалите Госпожу нашу Богородицу вси язы ́цы, возвеличите Ю вси людие, яко утвердися милость Ея на нас и покровом Ея приосеняемся всегда; почитающии Ю благоговейно не погибнут и молящиися Ей из глубины души не лишатся матерняго Ея заступления, нерадеющии же о святодостойном почитании Ея умрут во гресех своих.

Псалом 117

Исповедайтеся Господеви, яко благ, исповедайтеся и возлюбленней Матери Его, яко во век милость Ея на нас; щедроты Ея исторгнут от сердца грех и благодать Ея очистит оскверненную совесть; кающаяся душа приближается Ею ко Христу, удаляющаяся же нераскаянием не обрящет вечнаго мира с Богом. О, всемилостивая Госпоже исповедаемся Тебе всем сердцем нашим и вознесем Тя, яко Ты была еси нам во спасение и ныне слышиши нас, призывающих Тя.

Песнь вместо славы

Радуйся, Царице небесная, святое приятелище невместимаго Божества: Ты еси небесное украшение, Ты еси мысленное солнце, озаряющее землю; озари и очисти, молюся Ти, сердце мое грехолюбивое и, аще что Тебе неугодно в жизни моей, удали от мене, к небесному же обетованию воспламени любовь, во славу Божию и в радость Твою о спасении грешныя души моея.

По 16-й кафисме тропари, гл. 8

Приидите вернии, Матерь всех Содетеля гласы возвеличим, и поюще возопиим: яже радости вина, Дево всепетая, чтущих Тя спасай молитвами Твоими: имаши бо дерзновение миловати, подавати же недугом врачевание.

В неможение тяжкое впад, и люте болезньми слячен, нетерплю вара лютаго уныния моего, но ведый коегождо, Спасе, немощь, и яко отец наказуяй нравом Тебе согрешившыя, Ты мя возстави, да всегда взываю Тебе: велия дела Твоя, Господи, страшна же воистину чудеса, ибо верныя спасаеши молитвами Рождшия Тя

Душу мою, Дево, смиренную от младости осквернив мерзостными словесы и деянми себе окалях, и не вем, что сотворю или где прибегну? Но ниже ину надежду разве Тебе вем. Сего ради непотребный раб к Тебе прибегаю и молюся, исповедуя Ти: согреших, моли Твоего Сына и Бога, прегрешений оставление даровати ми, на Тя бо, всеблагая, упование возложих

Молитва

Царице моя Преблагая, надеждо моя Пресвятая, приятелище сирым и странным заступнице, бедствующим помоще и озлобляемым покрове! Зриши мою напасть, зриши мою скорбь, отвсюду искушением одержим есть, а заступающаго несть. Ты убо Сама, Владычице, помози ми, яко немощну; окорми мя, яко странна; настави, яко заблудша; уврачуй и спаси, яко безнадежна. Не имам бо иныя помощи, ни инаго предстательства, ни утешения, токмо Тебе, о, Боголюбивая Мати всех скорбящих и обремененных! Призри убо на мя, грешнаго и во озлоблении сущаго, и покрый мя пресвятым омофором Твоим, да избавлен буду от всех зол, мя обышедших, и восхвалю выну препетое имя Твое. Аминь.

Кафисма 17

Псалом 118

Блажени непорочнии, в путь ходящии в законе Господни, блажени и последствующии святым добродетелем Матери Божией; блажени подражающии смирению Ея; блажени причастницы благостыни Ея; блажени любители кротости сердца Ея; блажени, иже обетами святыми служат Ей; блажени, имеющии на Нее твердое упование и благую надежду; блажени, ихже восприимет в Свое предстательство Царица небесная. О, всемилостивая Владычице! да излиются на нас оныя благодатныя милости Твоя и насладимся оных, яко о всяком богатстве.

Воздаждь нам, рабом Твоим, Госпоже, сию Твою великую благодать, воеже с любовию творити святую волю возлюбленнаго Сына Твоего; не скрый от нас щедроты Твоя и уразумеем чудеса Твои на нас, возжела душа наша присно воспевати хвалу Твою, чрез Тебе бо спасение наше о Господе. Что воздадим Тебе о всех, яже воздала еси нам? Закон матерния воли Твоя, о, Святых Святейшая, положила и утвердила еси в сердцах наших; приклони души наша к вышней любви и отврати очи наши, еже не видети суеты; страх Божий да будет нам в сыновний страх и смиренное благоговение к Тебе да утешит нас во смирении нашем. О, всемилостивая Владычице! молимся лицу Твоему и преклоняем колена сердец наших пред Тобою, помилуй нас по милости Твоей.

Благодать сотворила еси во всяком роде и роде со всеми, во истине призывающими Тя, Госпоже, в помощь; воспоминаем и мы, грешнии, дивныя чудеса Твоя и утверждаемся во уповании небесныя надежды; обышедше обыдоша ны напасти, но крепкая десница Твоя изят нас от них; благо душе нашей, яко тяготою их смиряемся. О, всемилостивая Мати! даждь нам духовный разум, воеже покланятися благости живаго Бога и смирятися пред отеческим Его наказанием.

Песнь вместо славы

Радуйся, всеблагословенная Приснодево Марие, Ты еси свет во тме греховней и непостыдная надеждо всех, на Тя уповающих; смиренно молимся Тебе: утоли законопреступныя страсти сердца нашего и искушения плоти и мира отврати; поведают нам законопреступницы глумления свои, но Ты, Заступнице, даждь нам чувство плакати о гресех наших, да скончаемся христианскою кончиною и сподобимся Божию милость получити.

Псалом тойже

Исчезают душа и сердце наше, ищущия спасения от Тебе, Владычице; яви нам благодатный зрак Твой, оживи нас милостию Твоею, во век не забудем благостыни Твоея; яко аще бы не Ты предстояла, о нас умоляющи возлюбленнаго Сына Твоего и Бога нашего, погибли бы в многосуетной жизни нашей; Ты немерцающий светильник нам во тме греховней: паче всех учащих нас уразумеем закон Божий и от заповедей Спасителя нашего не уклонимся, аще Ты, Царице небесная, поможеши нам.

Дивны милости и щедроты Твоя, о, святейшая Мати Божия, дивны чудеса Твоя на нас, близ еси Ты всех верных и избранных Божиих и вси путие Твои истина, далече же спасение и помощь Твоя от нерадивших о благоговейном служении и поклонении Тебе, яко неправедно есть помышление их; да приидут же, смиренно молим Тя, щедроты Твоя на нас и живи о Господе будем. Коль сладка гортани нашей хвала Твоя, паче меда устом нашим всеблагословенное имя Твое! Восприими нас странствующих во благо и сохрани от адския неприязни.

Песнь вместо славы

Радуйся, Пресвятая Богородице Марие, под Твою матернюю милость и покров с верою и любовию прибегаем; днесь, и на всякий день и нощь, и в час смерти нашея Тебе душу и тело наше вручаем, всю надежду во всей жизни на Тя возлагаем, яко да Твоим заступлением и помощию вся наша дела исправятся и пременятся по святейшей воле возлюбленнаго Сына Твоего, Спасителя нашего.

Псалом тойже

Призри на нас, всемилостивая Госпоже, и помилуй нас, любящих святое имя Твое; всем сердцем нашим взываем и молимся Тебе, Владычице, направи стопы наша на путь спасения и да не обладает волею нашею всякое беззаконие. Услышите, небеса, и внуши, земле: якоже младенец без питательницы не может жити, тако без Госпожи нашей Приснодевы Марии не можем получити вечное спасение. Мир мног любящим, почитающим и покланяющимся Царице небесней, под защищением бо Ея пребывающии далече будут от вечной погибели.

Князи адстии, обышедше, обыдоша нас, повсюду сети злобы поднебесныя положени суть во уловление сердца нашего и души, но от призывания святаго имени Твоего, о, возлюбленная Мати Божия, яко дым исчезают козни врагов. Мир мног любящим имя Твое и несть им соблазна, жива будет душа наша и восхвалит Тя, премилосердную свою Владычицу; милости Твоя всегда помогут нам; седмерицею днем воспеваем Тебе хвалы Господни и не оставим Тя призывати, помощницу нашу, во всех днех жизни нашея, не заблудим бо чрез сие, яко овча погибшее, понеже путие Твои небесный свет и истина.

Песнь вместо славы

Радуйся, благодатная Приснодево Марие; кто Тя достойно может возблагодарити и восхвалити? исполнены небеса славы Твоея и исполнена земля милости Твоея, безсеменным бо пречистым рождеством Твоим от тли вечныя смерти души наша свободила и в рай безсмертия водворила еси.

По 17-й кафисме тропари, гл. 1

Веселится христиан множество, имя Твое, Богородице, на всяк день призывающих и любовию высоты Твоя величающих. Ты бо похвала и помощница и предстательница непостыдная еси всех верою чтущих Тя.

Срадуйтеся земнороднии Матери Господней, восхвалите Ю небесныя Силы, прославите царствующии на земли, приидите вси, радуйся рцем Богородице согласно, верою веселящеся

Новое небо, вместившее неизреченно сущее на небесех невместимое Слово, одушевленная палато Владыки твари, преславный и преименитый граде Спаса нашего: небеснаго отечества гражданина мя сотвори

Молитва

Пресвятая Госпоже, Владычице Богородице! К Тебе прибегаем, Чистая: Ты бо еси стена необоримая, предстательство и покров всем, прибегающим к Тебе с верою и упованием! Молим Тя, Преблагословенная, услыши молитву недостойных раб Твоих и предстани присно за усошпих рабов Твоих. Ты выну ходатайствуеши о православно-чтущих Тя, прибегающих к покрову Твоему и тепле молящихся Тебе в болезнех, скорбех и напастех; но Твое ходатайство, Твое заступление наипаче благопотребно нам по смерти нашей; Ты выну являеши скорую помощь Твою рабом Твоим и не престаеши всем молящимся Тебе являти Свое благосердие и изливати великия и богатыя милости Сына Твоего и Бога нашего на всех верующих: на Тя единую по Бозе имамы твердую надежду и упование: никтоже, Тебе моляся, отходит от Тебе без помощи, радости, и утешения, и услаждения. Молим Тя, о, Пресвятая Богородице, Владычице мира, надеждо ненадежных, буди убо днесь ходатаицею к Рождшемуся от Тебе за усопших рабов Твоих, умоли Сына Твоего и Бога нашего дати им прощение и оставление прегрешений. Моли, Богородице, много бо может моление матернее ко благосердию Владыки; от Тебе бо приемлет Господь всяко слово прошения, приими убо и Ты наши молитвы и моления, приносимыя Тебе, Пресвятая Дево, от всего сердца нашего и всея души нашея за души усопших рабов Твоих. Молим Тя, помози им. Владычице, матерним Твоим ко Господу дерзновением достигнути тихаго пристанища в небесном Иерусалиме; помози им, Заступнице усердная, непостыдно предстати на страшнем и втором пришествии Сына Твоего, идеже кийждо от своих дел или прославится, или постыдится; помози им, Благодатная, оправдатися пред лицем Седящаго на престоле славы, да не постыдятся пред Ангелы и всеми Святыми, пред всем миром, горним и дольним. О, Всепетая Мати, Владычице Богородице, молим Тя, заступи, спаси, сохрани и будущия изми муки усопших рабов Твоих, да не погибнут во век, но да спасутся Твоими молитвами и прейдут от смерти в живот. Мы же, грешнии и недостойнии раби Твои, не отступим от Тебе, не престанем во умилении взывати к Тебе: Пресвятая Госпоже, Царице и Владычице! моли Сына Твоего и Бога нашего об усопших рабех Твоих, да даст им Господь отпущение прегрешений; посли им, Благодатная, достигнути вожделеннаго отечества и узрети блага небесныя, ихже око не виде, ухо не слыша и на сердце человеку не взыдоша; моли о них, Богородице, да сподобятся, по Твоему предстательству, вкушати блага сии во Царствии Сына Твоего, Христа Бога нашего, Ты бо еси единая благословенная в женах многомощная Заступница, надежда, покров и прибежище всем, притекающим к Тебе,– Ты еси мост, преводяй сущих от земли на небо и райских дверей отверзение. Аминь.

Кафисма 18

Псалом 119

К Тебе, Госпоже, внегда скорбети ми, воззвах и услыша мя; молюся же Ти: избави душу мою от всякаго зла во всех днех жизни моея; стрелы искусителя изощренныя падают на главу мою и в опасности греха, увы мне, находится душа моя, но Ты, Владычице, силою Твоею сокруши главу адскаго змия, лютаго врага моего, да не порадуется он о падении моем, возрадуюся же аз и возвеселюся о едином Бозе Спасе моем, возвеличу и Тя, помощницу мою, в вечном хвалении.

Псалом 120

Воздвигох мысленныя очи мои горе, идеже Ты, Царица небесная, пребываеши и прииде в сердце мое велие утешение, яко Ты не воздремлеши, ниже уснеши, сохраняя мя от всех вражиих наветов, вхождение мое и исхождение мое всегда милостивно назираеши: слава Тебе, премилосердая Мати, пекущейся и ищущей вечнаго спасения грешней моей душе.

Псалом 121

Возвеселихся духом веры и надежды о Тебе, преславней Царице небесе и земли; под Твоим бо предстательством аще благочестно поживу, на вечное жилище в дом Господень прейду, во Иерусалим небесный, великий град, егоже слава Божия просвещает и светильник его Агнец. О, Владычице! молюся Ти со слезами, подкрепи мою веру во обетования небесныя, оживотвори надежду на милости возлюбленнаго Твоего Сына, Господа нашего Иисуса Христа, воспламени любовь, воеже творити мне благоугодно святейшую волю Его; слава Тебе, преблагая моя наставнице, на пути истины и спасения.

Псалом 122

К Тебе воздвигох очи мои, всещедрая Мати, Яже с возлюбленным Сыном Твоим царствуеши на небесех; се, яко очи рабыни в руку госпожи своея, тако очи наши к Тебе, Владычице, дóндеже получим от Тебе благовременную помощь; благословенно да будет заступление Твое, благословенна еси на небеси и на земли, в мори и во всех безднах благословенно девство и чистота Твоя, благословенна да будет святая душа Твоя и препрославленное тело Твое.

Псалом 123

Аще не Госпожа наша Приснодева Мария заступит о нас у Бога, постигнут нас грех ради наших многия беды; внегда востати адским врагам на ны, живых убо пожерли Быша нас, но Ты, премилостивая Заступнице, с нами и мы избавлени от них быхом; помощь наша во имя Господа и милостивое имя Твое, Владычице.

Песнь вместо славы

Радуйся, обрадованная от Бога Приснодево Марие! от призывания святейшаго имени Твоего бесы трепещут, от облистания славы Твоея власти темныя исчезают, Твоим рождеством врата райския отверзаются и избраннии Божии, с нимиже и вси грешницы, мытари и блудницы, покаявшиися Богу, входят в них невозбранно; молюся же Ти всеприлежно: посети и мою убогую душу, да во вся дни жизни моея верно послужу Тебе и избавиши мя от власти темныя.

Псалом 124

Надеющиися на Тя, Матерь Божию, не убоятся лица вражия; веселитеся и радуйтеся вси, любящии Богородицу, ибо поможет вам в день печали вашея; помяни щедроты Твоя, Госпоже, и охрани странствие наше на земли, обрати пресветлое лице Твое на нас и низложи врагов наших, ищущих погибели нашей, да в мире и тишине поживем, и во всяком благочестии и чистоте, прославляя Тя, Владычицу нашу и помощницу.

Псалом 125

Внегда обратиши пресветлое матернее лице Твое на нас, ведущих Тя и молящихся Тебе, сердца и души наша веселятся Божиею благодатию и Твоими милостями; преблагословенна еси Ты от божественныя силы Иисуса Христа паче всех жен на земли; не оскудеет хвала Твоя от уст наших, ниже вера и любовь к Тебе, Владычице, от сердец наших: благоговейно почитающии Тя благословятся от Бога и не лишатся всякаго блага.

Псалом 126

Аще бы не Госпожа Владычица наша Царица небесная предстательствовала о нас, грешных, к правосудному Богу, подвигли бы грехи наша праведный гнев Его к отмщению, и аще бы Она, яко мысленное солнце, не озаряла вся концы земли дивными знаменьми и преславными чудесами, тма неверия и мгла невежествия обяли бы человеков. О, премилосердная Владычице, веруем несомненно, молимся смиренно и покланяемся Тебе благонадежно, пред небом и землею исповедуя, яко Ты еси небесный немерцающий свет, во тме земных сует светящий, яко Ты еси всем кающимся грешником споручница во спасение, яко Ты еси возлюбленная Матерь Божия, преблагословенная в род и род; Господь с Тобою и Тобою с нами!

Псалом 127

Блажени вси, умиленно молящиися Тебе, Госпоже, блажени ведущии святую волю Твою и желающии творити Тебе угодная: труды сладких плодов своих снедят и узрят вечная благая горняго Иерусалима; блажени убо рождшии Тя, Владычицу, память их с похвалами пребудет в век века; блаженно чрево Твое, носившее по плоти Иисуса Христа, и сосца, яже Той сса. О, преблаженная и преблагословенная в женах! обрати матернее лице Твое на нас и умоленна буди о всех, призывающих Тя.

Псалом 128

Множицею брашася со мною от юности моея адстии врази мои, но Ты, Владычице, избавила мя еси от них; множицею брашася, но Ты, помощнице моя, душу мою не предала в вечно гибельную власть их, Ты сохранила еси вся внутренняя и внешняя моя. О, споручнице спасения моего, помози ми сотворити плоды, достойные покаяния, да благонадежно прииду к христианской кончине моей и сподоблюся узрети святейший плод чрева Твоего, премилосерднаго Спасителя моего и Искупителя.

Песнь вместо славы

Радуйся, преблагословенная Приснодево Марие, горлице пустыннолюбная, голубице чистейшая; яви зрак Твой и услышан сотвори глас Твой, яко глас Твой сладок, и образ Твой красен. О, Царице небесная! сот искапают устне Твои, мед и млеко под языком Твоим и благовоние риз Твоих, яко благоухание ливана. О, Невесто неневестная! о, святейшая Приснодево Марие! сердце наше привлекла еси во благодать Твою, в след Тебе течем, соделай же, Владычице, да исполнится оно неизреченными небесными воздыханиями о Христе Иисусе.

Псалом 129

Из глубины сердца моего воззвах к Тебе, Госпоже, услыши глас моления моего, яко у Господа Бога милость и многое у Тебе избавление; изми мя, Владычице, от руки врагов моих, посрами и расточи наветы и советы их на мя, помилуй мя в день лют и в час смерти не остави убогую душу мою, предстани ей со утешением вечнаго спасения.

Псалом 130

Госпоже, не вознесеся сердце мое о великих и дивных мира сего, преходит бо мир сей и образ его; но Ты, Владычице, святынею, славою и честию превознеслася еси над всеми, Тя убо едину возлюби душа моя; миро излиянное имя Твое и воня милостей Твоих паче всех аромат; Ты едина, во мраце греховнем проницающая предо мною, аки утро; добра, яко луна; избранна, яко солнце: полагаю убо Тя, Царицу небесную, аки печать на сердце моем и покланяюся святейшему величеству Твоему.

Псалом 131

Помяни, Госпоже, царствующаго пророка и великаго праотца Твоего Давида, емуже клятся Господь истиною и не отвержеся ея: Ты бо от него, яко от благословеннаго корня, процвела еси нам райская отрасль; Ты еси цвет польный и крин удольный, процветший нам небесное благоухание и веселие. О, животворный душевный раю! Тобою утешаемся на земле странствования нашего, веселимся богатством славы Твоея в нищете нашей, сотвори и помози, Владычице, да в жизни сей любоохотно питаяся слезным хлебом истиннаго о гресех раскаяния, насытимся некогда и хлебом животным, благословенным и святейшим плодом чрева Твоего во веки веков.

Псалом 132

Се коль добро и коль богоугодно верным нам благочестно почитати и ублажати Тя, небесную Царицу, яко сам Господь осеняет нас за сие благословением Своим и будущим вечным блаженством вознаградит. О, благоутробный Триединый Боже! коль многое множество милости Твоея изливаеши на нас, грешных, чрез предстательство к Тебе о нас преблагословенныя Приснодевы Марии. Да будет Тебе честь и слава, аминь.

Псалом 133

Се ныне благословите возлюбленную Матерь Божию вси уповающии на имя святое Ея, во дни и в нощи воздежите руки ваша в пренебесная святая, идеже предстоит Она в неизреченной славе святейшему лицу Божию, утешатся бо благодатию Ея преизобильно огорченныя сердца и души ваша; благословите Ю вси благословеннии раби Ея, благословите Ю вси Ангели и Архангели; и вси святии Божии, хвалите Ю небеса небес и вода, яже превыше небес, хвалите во веки веков чудеса Ея.

Песнь вместо славы

Радуйся, христианская чадолюбивейшая Мати Марие, бездна милостей и щедрот! Очисти, молюся Ти, сердце мое от греховных страстей, и аще что Тебе не благоугодно, имиже веси судьбами отврати от мене, к небесным обетованиям воспламени дух мой, и еже мудрствовати, и еже деяти о Господе помози.

По 18-й кафисме тропари, гл. 4

Поем Тя, Богоневесто, славяще Рождество Твое непостижимое, имже избавихомся прелести диаволи и всяческих бед, и верно вопием: помилуй стадо Твое, Дево всепетая. Побори, Всецарице, борющыя ны враги, якоже бо волцы алчут погубити наследие Твое и достояние Сына Твоего, к Немуже молитвами Твоими погуби язык дерзости, да познают силу Твою злии ратолюбцы, божественным Твоим манием низложи их. Превозшедшая чины Ангел, Всечистая, со Ангелы моли Ангелов Владыку свободитися нам страстей губительных и наследниками быти нетленныя жизни.

Молитва

К Тебе, Пречистей Божией Матери, аз, окаянный, припадая, молюся: веси, Царице, яко безпрестанно согрешаю и прогневляю Сына Твоего и Бога моего, и многажды аще каюся, лож пред Богом обретаюся, и каюся, трепеща, да не когда Господь поразит мя, и по часе паки таяжде творю. Ведущи сия, Владычице моя, Госпоже Богородице, молю: да помилуеши, да укрепиши и благая творити да подаси ми: веси бо, Владычице моя Богородице, яко отнюдь имам в ненависти злая моя дела и всею мыслию люблю закон Бога моего; но не вем, Госпоже Пречистая, откуду, яже ненавижду, та люблю, а благая преступаю. Не попущай, Пречистая, воли моей совершатися: не угодна бо есть; но да будет воля Сына Твоего и Бога моего, да мя спасет, и вразумит, и подаст благодать Святаго Духа, да бых аз отселе престал сквернодейства и прочее пожил бых в повелении Сына Твоего, Емуже подобает всякая слава, честь и держава, со безначальным Его Отцем, и Пресвятым, и благим и животворящим Его Духом, ныне и присно, и во веки веков. Аминь.

Кафисма 19

Псалом 134

Хвалите имя Господне, прославляйте и имя Приснодевы Марии, с молитвами и молениями прибегайте к Ея святейшему величеству, возставит Она в вас волю благую и не одолеют вас похоти греха; помышляющии всегда о Ней и радующиися с благодарением о милостях Ея обрящут небесную сладость и мир в душе и сердце. О, грешницы, воздохнем к Ней внутренними чувствиями и молитвами Ея даруется всем нам и жизнь благочестивая, и кончина блаженная.

Псалом 135

Исповедайтеся Господеви, яко благь и яко благость Свою разделяет ищущим ея чрез предстательство Царицы небесныя. О, Владычице! помяни нас во смирении нашем и защити от адскаго фараона и неприязненной силы его рукою Твоею крепкою и мышцею высокою. Поим Господеви, славно бо прославися; поим и воспоем благодарственная и Тебе, многомощная Владычице, яко избавльшиися и избавляемии Тобою от злых, державу бо непобедимую носиши на руках Твоих.

Псалом 136

На реках Вавилонских плакаху сетующии Евреи; мы же о грехах наших возрыдаим и смиренно возопиим к Богородице Приснодеве Марии, принесем Ей плач сердца и воздыхание духа, не обрящем бо прощения во грехах, ниже вечнаго спасения душам без благословеннаго плода чрева Ея; святыми и благоприятными к Нему о нас молитвами Ея достигнути небесныя безконечныя жизни чаем, и веруем, и исповедуем.

Песнь вместо славы

Радуйся, преукрашенная всеми добродетелями Приснодево Марие, источниче приснотекущий, неисчерпаемый кладезь живоносных вод, престоле огнезрачный, скиния небесная; молюся Ти со слезами, да милость Твоя утвердит слабое мое сердце и святыня Твоя освятит убогую мою душу, да не победят мя прелести греховныя, но да избавлюся Твоими молитвами от всех искушений злых.

Псалом 137

Исповемся Тебе, Госпоже, всем сердцем моим, яко Тобою обретох милости и щедроты Иисуса Христа; услыши словеса моя и воздыхания мои, в оньже аще день и час призову Тя; умножи духовную силу веры в слабой душе моей и в скорбех сердца буди животворным утешением ищущему Тя сердцу. О, благотворная Владычице, сотвори мя жити в мире под матерним покровом Твоим.

Псалом 138

Госпоже, искусила мя еси и познала мя еси; Ты познала еси падения и преступления моя, но умножишася на мне, грешнем, матерния милости Твоя и разширися на мя благостыня Твоя; аз взираю, яко блудный сын, на небо, но Твоим предстательством аз сокрушаюсь, но Твоим вдохновением аз упокоеваюся, но воззрением на святое изображение кроткаго лица Твоего аз спасаюс, но верою и надеждою на Спасителя моего, егоже ты держиши на руках Своих и показуеши мне, грешному, в утешение, аз уповаю получити блаженство во веки веков.

Псалом 139

Изми мя, Госпоже, от человека лукаваго, и от врага адскаго соблюди мя: напряже лук свой противу мене врагь и лестию своею уловляет душу мою; сокруши, Владычице, силы его лукавыя и запни пронырству его, обрати беззакония его на выю его и в пропасть, юже содела, да впадет вскоре; аз же возрадуюся о Тебе и возвеселюся о спасении Твоем.

Песнь вместо славы

Радуйся, Пресвятая Богородице, Херувимов честнейшая и Серафимов к Богу ближайшая; Твою славу, достоинство, светлость Твою, щедроты и вся милости Твоя, утешения и благословения кто достойно воспети может? Ты еси океан неисчерпаемых чудес.

Псалом 140

Госпоже, всесмиренно взываю к Тебе: услыши мя, вонми молению и прошению моему; да исправится молитва моя, яко кадило пред лицем Твоим, в вечер, утро и полудне, и на всякое время, да не помрачит злоба мира сего разум мой; сотвори мя, Владычице, всегда разумети благоугодное Тебе и утверди сердце мое во истинней любви к Тебе.

Псалом 141

Гласом моим к Госпоже воззвах и усердно к Ней помолихся, пролиях пред Нею слезы моя и сердечную болезнь Ей предложих, яко адский злый враг блюдет пяту мою и повсюду простирает противу мене сети своя; помози мне, Владычице, да не поткнутся стопы моя пред ним, но да сам сокрушится под ногами моими, трепещет бо имени и силы Твоея.

Псалом 142

Госпоже, услыши молитву мою, внуши моление мое, яко погна враг душу мою, силится препяти мя на пути к вечному спасению, отяготи сердце мое мраком своим и уны зело дух мой; не отврати, Владычице, лица Твоего от мене, да не впаду с нисходящими в адский ров, но посли свет Твой и благодать Твою, и исчезнет предо мною мрак его и соблюдется живот и разум мой.

Песнь вместо славы

Радуйся, Приснодево преславная, возлюбленная Мати Божия благодатная, паче меда и сота сладчайшая, паче солнца прекраснейшая, паче луны светлейшая, паче звезд блистательнейшая, паче кипариса и всех аромат благовоннейшая; сотвори, Всемилостивейшая, сотвори, да ради воспоминания пресвятаго имени Твоего вся суеты и утехи мира сего презрю и всем сердцем отрину, воскриляя всего себя к небесным.

По 19-й кафисме тропари, гл. 5

Увы мне, что сотворю окаянный, кое начало моего спасения сотворю, непотребно все проходя житие мое? Не отвержи мене, Благая, заблуждшаго и погибающа, и покаяния мне образы покажи, Мати Божия, яко да во хвалении славлю Тя всегда.

Виждь, Госпоже, мое сокрушение, и уврачуй озлобленнаго демонскими прилогами и плотскими лютыми страстьми, от нихже болезньми облагаем, скорби исполнен есмь, и многаго уныния, и тесноты помрачения. Но едина Бога рождшая, всякия вземшаго во плоти Своей язвы и недуги человеков, Того умоли дати мне мир и велию милость

Радуйся божественное Владыки пребывалище, славо Ангелов и человек упование и крепость в нуждах, твердое предстательство всех нас, утверждение и стено на Тя надеющихся, прибежище верных, благолюбивая Мати Бога человеколюбиваго: Того умоли даровати рабом Твоим мир и велию милость

Молитва

О, Всемилостивая Госпоже, Царице небесе и земли, Владычице Ангелов и человеков! Тебе, премилосердая Заступнице наша, Господь наш Иисус Христос, при распятии Своем, вручи ученику Своему Иоанну, глаголя ему: се Мати твоя, а чрез него и всем православным христианом нарек Материю их, да вси, с верою и любовию притекающии под державный покров Твой, спасаются и избавляются от веяких бед и напастей. Сего ради и аз, недостойный именоватися сыном Твоим, паче же раб окаянный и непотребный, безчисленными грехми осквернивший ум и сердце свое, унылый и ленивый на всякое дело благое, дерзаю прибегнути под кров Твой, Мати милосердия и благости, со умилением и сокрушением сердца прося и моля не отринути мя кающася. Зриши струпы и гноения окаянныя души моея, слышиши и вопль болезненнаго сердца моего. Посети мя матерними Твоими щедротами, ихже недостоин сотворихся – безумный и отступник заповедей Сына Твоего и Бога моего. Но якоже не презрела еси молитвы Феофила, отвергшагося Твоего Сына и Господа и Тебе, пренепорочныя Матери Его, испросивши ему прощение страшнаго греха сего: сице не презри и мене, Владычице, возлагающа на Тя все упование мое, не отвержи мене, яко раба неключимаго, второе распинающаго Сына Твоего грехми моими, не возгнушайся злосмрадием моим. Верую, усердная Заступнице, яко вся возможеши испросити у Сына Твоего, елика восхощеши. Аще Соломон царь, человек сый, изрек матери своей: проси у мене, мати моя, еже хощеши, и дам ти; киих благь не дарует Тебе, Владычице Благая, и каковаго прошения Твоего не исполнит Твой Сын, Царь небесе и земли, Всемогущий, Милосердый и Человеколюбивый? Емуже подобает всякая слава, честь и поклонение со безначальным Его Отцем и всесвятым, и благим, и животворящим Духом в безконечные веки. Аминь.

Кафисма 20

Псалом 143

Благословенна еси, Госпоже, яко научаеши нас, рабов Твоих, на брань противу мира, плоти и диавола: противу мира, еже бы отвращати очи от прелестей его, не привязывати сердце к суетам его; противу плоти, еже бы содержати себе в целомудрии и не касатися заповеданных вещей; противу диавола, еже бы разумевати искушения его и соблазны и действию их всевозможно противитися. О, всемощная Владычице! молим Тя и молити не престанем, блесни молнию силы Твоея и разжени их, посли стрелы скораго защищения Твоего и порази их, прослави от высоты святыя славы Твоея в сей брани крепкую десницу Твою, да, воспевая, воспоем мы, раби Твои, избавльшеся от злых, силу, славу и хвалу Твою; веси, Владычице, колико мы грехопоползновенны есмы и многопотребна нам помощь Твоя; воспламени в сердцах наших желания небесныя и исполни духом сладости райския.

Псалом 144

Вознесу Тя, возлюбленную Матерь Сына Божия, и на всяк день воспою Тебе хвалы; по всей земли людие прославляют дела и милости Твои и острови мнози величают чудеса Твоя, Ангели и Архангели проповедуют святыню души Твоея и вси святии провозвещают кротость и смирение Твое; очи наши уповают на Тя, Госпоже, пошли нам брашно и пищу во благо время, алчущую же душу напитай и насыти небесною сладостию и мы, раби Твои, благословим Тя, яко премилосердную Матерь, во веки веков.

Песнь вместо славы

Радуйся, Пресвятая Приснодево Марие, возлюбленная Мати Спасителя Христа Бога нашего, кристалловидный источниче, небесными сладостями исполненный, райский вертограде, преиспещренный всеми святыми добродетелями, мысленное небо, души и сердца увеселяющее! О, прекраснейшая и преблагословенная в женах! осени мя, грешнаго, лучами благостыни Твоея, да в тишине и мире пребуду в сей стране и в сени смертней и потом, Тебе помогающей, достигну отечества небеснаго.

Псалом 145

Хвали, душе моя, Госпожу Приснодеву Марию, непрестанно хвали, дóндеже обитаеши в теле сем; егда же изыдеши из темницы бренныя плоти, Она предстанет тебе, яко заступница, и в пути незнаемем будет надежная предводительница, полки лукавых бесов пред светом Ея исчезнут и проведешися без страха до врат вечнаго мира. Слава, хвала и честь Царице небесней, Яже Собою милостивно приведет нас в Царствие Небесное.

Псалом 146

Хвалите Госпожу Приснодеву Марию, яко благь есть псалом; услажденна и красна сицевая Ей хвала; сия бо есть помощница сокрушенных сердцем и умащает их благовонным миром благоволения о них; велики милости Ея, благодать и щедроты Ея не имут конца; предварите Ей в воскликновении, во исповедании псалмов пойте Ей, благоволит бо Царица небесная в прославляющих Ю и уповающих на милости Ея.

Псалом 147

Хвали, Церковь Божия, возлюбленную Матерь Спасителя Христа, прославляй Ю, новоблагодатный Сионе: сынове бо твои благословятся от Нея и распространятся от моря до моря, миром благим благоукрасятся и надежда их не постыдится, в род и род восхвалят Тя.

Песнь вместо славы

Преславная Богородице, Приснодево Марие, жизни нашея вожде, Божия благодати ходатаице, моря мира сего волнующагося благоотишное пристанище, испроси у возлюбленнаго Сына Твоего, Спасителя нашего, милость нам, грешным, да в вере, надежде и любви к Нему пребудем непоколебими и кончины христианския удостоимся.

Псалом 148

Хвалите Госпожу Марию от небес, хвалите Ю в вышних, идеже седит на престоле неприступныя славы, в ризах позлащенных одеяна и преукрашена; хвалите Ю вси человецы, и скоти, и птицы небесныя, и рыбы морския; хвалите Ю солнце и луна, хвалите Ю звезды и свет, хвалите Ю Херувими и Серафими, Престоли, Господствия и Власти, хвалите Ю вси Ангели и Архангели и вся чины воинств небесных; слава, хвала и честь Приснодеве Марии.

Псалом 149

Воспойте Госпоже нашей и Царице великой песнь новую; хвала Ея в сонме праведных, веселятся небеса о славе Ея, острови морстии и вся вселенная, вода и огнь, мраз и зной, молния и свет прославляют Ю. Возношение Ея в гортани праведных и хвалы Ея в ликах всех святых; граде Божий, Сионе небесный, торжествуй о Ней вечно в песнех хваления.

Псалом 150

Хвалите, правовернии, великую Госпожу, сильную Владычицу, небесную Царицу, премилосердную вашу Матерь, скорую помощницу, усердную заступницу, пречистую и преблагословенную Приснодеву Марию, хвалите высокия добродетели и великия чудеса Ея; хвалите Ю чины патриархов и пророков, хвалите Ю апостоли и святители, хвалите Ю мученицы и исповедницы, хвалите Ю девственницы и воздержницы, хвалите Ю пустынницы и монаси, хвалите Ю вси вернии всякаго сословия, хвалите Ю младенцы и все праведныя души небесных граждан; всякое дыхание да хвалит пресвятаго Господа, да хвалит и благодатную Приснодеву Марию, аминь.

Песнь вместо славы

Преблагословенна еси, Госпоже Марие, возлюбленная Мати Господа нашего Иисуса Христа, Иже, воплощся из Тебе, посети нас и сотвори вечное избавление нам, людем Своим, Иже Тя воздвиже от дому Давида, отрока Своего, Иже исполни Тобою клятву, еюже клятся ко отцем нашим, Аврааму и семени его даже до века, Иже низложи сильныя со престол и превознесе Тя, смиренную, на небеси и на земли; и Ты, благодатная Приснодево Марие, великая пророчица от нас именуешися, понеже предрекла еси, яко вси роди ублажат Тя, и ублажаем, и ублажати Тя не престанем. О, звездо утренняя, присносияющая на небеси и на земли, освещай нас лучами помощи Твоея во дни и в нощи, да не заблудим в конец во мраце греховныя суеты; Ты бо еси слава небесным и нам, земным, непостыдное упование; много бо может Твоя матерняя молитва на умоление о нас небеснаго Владыки, Емуже, яко Премилосердному Богу нашему, и Тебе, яко усердной Заступнице нашей, да будет от нас, грешных, честь и слава во вся веки веков. Аминь.

По 20-й кафисме тропари, гл. 8

Божественнаго света светильниче златозарный, Пренепорочная Госпоже, душу мою, омрачаемую мглою страстей, безстрастия светлостию озари, молюся, и окаянное сердце мое омый слезами покаяния: Тя бо имам надежду раб Твой.

Горесть тамошних мук и жестокость мучителей, тму несветимую и всегдашнюю, негреющий и леденящий тартар, ядоносный и неусыпающий червь, страшный скрежет зубов, пламень геенский и нестерпимое жжение, ужасный вопль и рыдание, разлучение от праведных и наследия их лишение помышляющи, содрогнися душе моя, и стенаньми и плачем Матерь Судии умоли, зовущи: Богородице, испроси ми прощение злых, к покрову Твоему с верою притекающему

Райскими добротами наслаждатися и в небесных чертогах обитати, Владычице, подаждь ми, Бога божественный чертоже, улучити же блаженный невестник сподоби и причащатися тамо славы Христовы и насыщатися сладчайших лучей и сияния неизреченныя красоты Его, яко да радуяся пою вечно со Ангелы Отца, и Сына, и Святаго Духа, Троицу нераздельную, из несущих премудре вся осуществовавшую, и Тебе присно славлю, Богопрославленная

Молитва

Пресвятая Владычице моя Богородице, святыми Твоими и всесильными мольбами отжени от мене, смиреннаго и окаяннаго раба Твоего: уныние, забвение, неразумие, нерадение и вся скверная, лукавая и хульная помышления от окаяннаго моего сердца и от помраченнаго ума моего; и погаси пламень страстей моих, яко нищь есмь и окаянен. И избави мя от многих и лютых воспоминаний и предприятий, и от всех действ злых свободи мя, яко благословенна еси от всех родов, и славится пречестное имя Твое во веки. Аминь.

Молитвы

1.

К кому возопию, Владычице, к кому прибегну в горести моей, аще не к Тебе, Царице небесная? Кто плач мой и воздыхание мое приимет, аще не Ты, пренепорочная, надеждо христиан и прибежище нам, грешным? Кто паче Тебе в несчастиях защитит? Услыши стенание мое и приклони ухо Твое к молению моему. Владычице, Мати Бога моего, не презри требующаго Твоея помощи и не отрини мене, грешнаго, вразуми и научи мя, Царице небесная, не отступи от мене раба Твоего, Владычице, за роптание мое; буди мне мать и покровительница! Вручаю себя милостивому покрову Твоему, аще токмо восхощеши устроити о мне; приведи мя, грешнаго, к тихой и безмятежной жизни, да плачуся о грехах моих. Увы мне! К кому прибегну, повинный аз, аще не к Тебе, упованию и прибежищу грешных, в надежде на неизреченную милость Твою и щедроты. Кое ли слово за преступление мое изрещи возмогу к величеству славы Твоея? О, Владычице, Царице небесная! Ты мне мати и надежда, Ты мне упование и прибежище, покров, заступление и помощь! Царице моя преблагая и скорая заступнице! покрый Своим ходатайством мое преступление, защити мене от враг видимых и невидимых, умягчи сердца злых человек, возстающих на мя. О, Мати Господа моего Творца! Ты корень девства и неувядаемый цвет чистоты. О, Богородительнице! Ты подаждь мне помощь, немощствующему плотскими страстями и болезнующему сердцем: едино бо Твое и с Тобою Твоего Сына и Бога нашего имею заступление; и Твоим пречудным заступлением да оправдан буду и избавлюся от всякия беды и напасти, – всесильными Твоими молитвами, всечистая, непорочная и преславная Божия Матерь Мария. Радуйся, благодатная; радуйся, обрадованная; радуйся, преблагословенная, Господь с Тобою!

2.

О, Пресвятая Дево, Мати Господа вышних Сил, небесе и земли Царице, града и земли нашея всемощная Заступнице! приими хвалебно благодарственное пение сие от нас, недостойных рабов Твоих, и вознеси молитвы наша к престолу Бога Сына Твоего, да милостив будет неправдам нашим и пробавит благодать Свою чтущим пречестное имя Твое и с верою и любовию покланяющимся чудотворному образу Твоему; несмы бо достойны от Него помиловани быти, аще не Ты умилостивиши Его о нас, Владычице, яко вся Тебе от Него возможна суть. Сего ради к Тебе прибегаем, яко к несомненней и скорой Заступнице нашей: услыши нас, молящихся Тебе, осени нас вседержавным покровом Твоим и испроси у Бога Сына Твоего: пастырям нашим ревность и бдение о душах; градоправителем мудрость и силу; судиям правду и нелицеприятие; наставником разум и смиренномудрие; супругам любовь и согласие; чадом послушание; обидимым терпение; обидящим страх Божий; скорбящим благодушие; радующимся воздержание и всем нам – дух разума и благочестия, дух милосердия и кротости, дух чистоты и правды. Ей, Госпоже Пресвятая! умилосердись на немощныя люди Твоя: разсеянныя собери, заблудшия на путь правый настави, старость поддержи, юныя уцеломудри, младенцы воспитай и призри на всех нас призрением милостивнаго Твоего заступления; воздвигни нас из глубины греховныя и просвети сердечныя очеса наши к зрению спасения; милостива буди нам зде и тамо, в стране земнаго пришельствия, и на страшном суде Сына Твоего; преставльшияся же в вере и покаянии от жития сего отцы и братию нашу в вечной жизни со Ангелы и со всеми святыми жити сотвори; Ты бо еси, Госпоже, слава небесных и упование земных, Ты по Бозе наша надежда и заступница всех, притекающих к Тебе с верою. К Тебе убо молимся и Тебе, яко всемогущей помощнице, сами себе, и друг друга, и весь живот наш предаем ныне, и присно, и во веки веков. Аминь.

3.

О, Пресвятая Дево, Мати Господа Вышняго, всемилостивая Заступнице и Покровительнице всех, к Тебе с верою прибегающих! Призри с высоты небесныя славы Своея на мя, припадающаго к подножию Твоему, услыши смиренную молитву мене, грешнаго и недостойнаго раба Твоего, и принеси ю пред возлюбленнаго Сына Своего. О, Преблагословенная Богородице! Ты, именуемая всех скоропослушница и скорбящих радосте, услыши и мене скорбнаго; Ты – утоление печали, утоли и моя душевныя болезни и печали; Ты – купино неопалимая, сохрани мир и всех нас от вредоносных огненных стрел вражиих; Ты – взыскание погибших, не попусти мене погибнути в бездне грехов моих; Ты целительница страждущих, исцели и мене, уязвленнаго от немощей душевных и телесных; Ты – нечаянная радосте, радостию спасения Твоего отемли от мене страх грядущаго мучения; Ты – споручница грешных, буди и мне, грешнику, благосердою споручницею покаяния и спасения моего. На Тебе по Бозе все мое упование возлагаю, буди ми выну неусыпная ходатаица и всесильная предстательница пред Сыном Твоим, Господом нашим Иисусом Христом, укрепи во мне веру в Него, утверди в любви Его, научи мене любити и славити и Тебе, Пресвятую Матерь Божию, Преблагословенную Марию: вседержавному покрову Твоему, Богородице, вручаю себе на вся веки. Аминь.

Молитва ко Пресвятей Богородице от человека, в путь шествовати хотящаго (Должна прочестися со всяким умилением и усердием)

О, Пресвятая Владычице моя, ДЕво Богородице, Одигитрие, покровительнице и упование спасения моего! Се в путь, мне предлежащий, ныне хощу отлучитися и на время сие вручаю Тебе, премилосердой Матери моей, душу и тело мое, вся умныя моя и вещественныя силы, всего себе вверяя в крепкое Твое смотрение и всесильную Твою помощь. О, благая спутнице и защитнице моя! Усердно молю Тя, да не ползок путь мой сей будет, руководствуй мя на нем, и направи его, Всесвятая Одигитрие, якоже Сама веси, ко славе Сына Твоего, Господа моего Иисуса Христа. Буди ми во всем Помощнице, наипаче же в сем дальнем и многотрудном путешествии соблюди мя под державным покровом Твоим от всяких находящих бед и скорбей, от врагь видимых и невидимых, и моли о мне, Госпоже моя, Сына Твоего Христа Бога нашего, да послет в помощь мне Ангела Своего мирна, верна наставника и хранителя, да якоже древле даровал есть рабу Своему Товии Рафаила, на всяком месте и во всякое время хранивша его в пути от всякаго зла: тако и мой путь благополучно управив и сохранив мя небесною силою, – здрава да возвратит мя, мирна и всецела к жилищу моему во славу имени Своего святаго, славяща и благословяща Его во вся дни живота моего и Тебе величающа ныне и присно, и во веки веков. Аминь.

Молитва, глаголемая предстоящими на божеств. литургии, после возгласа: Изрядно о Пресвятей.. (Из Киевскаго Молитвослова)

Богородице Дево, радуйся, благодатная Марие, Господь с Тобою: благословенна Ты в женах, и благословен плод чрева Твоего, яко Спаса родила еси душ наших.

Радуйся едина пречистая, Мати единаго Содетеля, Господа Бога и Спаса нашего Иисуса Христа: буди ми ходатаица в день страшнаго испытания, егда предстану нелицемерному Судии, яко да огненнаго прещения избавлюся молитвами Твоими, едина благословенная.