Святитель Дионисий Суздальский
Повинное послание к великому князю Димитрию Иоанновичу Донскому

Богом Вседержителем, нареченому из чрева Матере Своея, Единочадым Его Сыном, Господом нашим Исусом Христом, почтеному господскым и царскым саном, и Пресвятым и Благим и Животворящим Духом. Его зблюдаему и усиляему на предспение² господскых же и царскых разум³ и державы, благочестивому, христолюбивому, великому князю.⁴. Благодать Господа нашего Исуса Христа, любы Бога и Отца, причастие Святаго Духа да будеть с тобою, по благочестию. Аз же. Д""......⁵ епископ: ......⁶; се же по судбам Божиим, аще недостоин, твоего же рáди еже к Богу потщания велия, и еже к Нему веры теплыя, и до нас худых простретья любве, еже хотениа молитвы, рекше⁷ Спасу нашему Христу: «приемляй пророка во имя пророче, мзду⁸ пророчю приемлеть; приемляй праведника в имя праведниче, мьзду праведничю приемлеть» (Матф. 10, 41); еже «понеже створисте единому от менших сих братии Моей, и Мне створисте» (Матф. 25, 40)⁹. Се же есть твоеа благочестивыа душа и божественыя душа и божественыя разум¹⁰, еже в всех и от всех искати ползы своему спасению иже¹¹ и здравию; се же есть дар Божий, еже есть таков разум имети в сердци своем. Поисти(не) бо¹² и достойно, еже о сицевых пещися, по Спасову слову: «емуже дасться много, и много въстяжется от него" (Лук. 12, 48); сего ради требе и много смотрение твоему благочестию, да и многих управиши к Богови в своем царстве; понеже сын Божий наречеся по благодати и образ Божий носиши. Да и подасть ти, еже прият., да и зблюдеши¹³, в твоем бо есть разуме, поминаяй, еже честнаго прадеда ти Володимира равна апостолам, подщание (потщание) еже к Богу, еже от злых на благое уклонение, и како тмы тмами, и¹⁴ приведоша к Богови святым просвещением, из самех уст адовех исхитивши; такоже и благочестиваго и приснопамятнаго святаго деда твоего¹⁵, како славится о нем, еже о христоименитых людей попечение многое; такоже и христолюбиваго великаго князя, отца твоего¹⁶, кротость же и милость, и безлобие многое, и богобоязньство, и правда, якоже пророк¹⁷ рече о Давыде: «избрах Давыда, ...мужа кротка, по сердцю Моему» (Деян. 13, 22; сн. 1Цар. 13, 14; Псал. 77:70, 88:21, 131:1); се бо поистине раб Божий беяше в всем. Да оного поминая, еже от злобы на добро совращение, и потщание апостольскаго упрáвления, сего же еже о людех попечение много, святаго же ти отца еже добродетелное исправление: да семи всими потшався исправлении и приимше от Бога приношение твое въскоре, и безмятежно и долголетно поживеши в нынешнем царствии, и будущаго и неизреченнаго и бесконечнаго Царства съобещник с Богом будеши, иже¹⁸ есть выше ума и смысла человеча. О сем молимся Богови, аще и недостойне есмы. Молю же о сем твое державное царство, да и милостив будеши съгрешающим к тобе, исполняа Спасово слово, еже рече: "аще оставите человеком съгрешения их, и Отець вашь Небесный оставить вам съгрешения ваша» (Матф. 6, 14), да бы еси милость свою явил на съгрешившем к Богу и тобе, на имя рек¹⁹, рекшу Господу: «70 (крат) седмерицею пращайте их» (Матф. 18, 22) ²⁰, «оставляйте брату съгрешения его» (Мк. 11, 25; Лук. 17, 3; Ефес. 4, 32; Кол. 3, 13); да якоже в многих, такоже и о сем явится человеколюбие твое, да «будеши съврьшен, – Спасу рекшу, – якоже (Отец) ваш Небесный свершен есть» (Матф. 5, 48)²¹. Бог милостию Своею, и молитвами Святыа Богородица, съблюдеть тебе в царствии твоем. от всякого зла, и на противныя победы даруеть, в будущем веци жизнь вечную, благодатию и человеколюбием Единороднаго Сына Своего²² в векы. Аминь.