Святитель Геннадий Новгородский
О еретиках Новгородских
Грамота Новгородскаго архиепископа Геннадия Суздальскому епископу Нифонту
Святейшему и боголюбивому и о Святом Дусе брату и сослужебнику Нифонту епископу Суздальскому и Торусскому. Что есми послал государю великому князю да митрополиту; грамоты да и подлинник о Новгородскях еретицех, а Прохору епископу Сарскому грамоту есми о той же ереси послал же, а тебя тогды на Москве не было. И о сем твоему боголюбию вспоминаю, чтобы еси посмотрел в владычню в Прохорову грамоту в первую, занеже тамо о их ересех пространно изъявлено; да усердно о том потщание имея, споборствуя по Христе Бозе и Пречистыя Его Богоматери, яко же должно есть твоему святительству въспоминая государю великому князю да и господину нашему Геронтею митрополиту, чтобы потщался тому делу исправление учинити, занеже ныне како продлилось то дело обыск ему не крепок чинитца. Ино познают: еретикам ослаба пришла, уже ныне наругаютца христьянству – вяжут кресты на вороны и на вороньи; многие видели ворон де и летает, а крест на нем вязан деревян, ворона де и летает, а кресгь на ней медян. Ино таково наругание: ворон и ворона садятся на стерве и на калу, а крестом по тому волочат! А зде се обретох икону у Спаса на Ильине улици Преображенье з деянием, ино в праздницех обрезание написано – стоит Василей Кисарийский... ... ... а наподписи написано: обрезание Господа нашего Исуса Христа. Да с Ояти привели ко мне попа да дияка, и они крестиянину дали крест телник древо плакун, ... ... ... и християнин де и с тех мест сохнути да немного болел да и умер. А дияк сказываеть на племенник Гриди Клочу еретику, что в подлинник написан. И ныне таково есть бесчинство чинитца над церковию Божиею и над кресты и над иконам и над христьянством. А того толке не управит князь великий, а того на крепко не обыщеть, ино будет последьняıa лесть горше первыя. И ты бы о том митрополиту явил, чтобы митрополит печаловался государю великому князю, чтобы поочистил церковь Божию от тое ереси. А тому бы есте не верили, что ся они зовут християне, то они покрывают свою ересь тем; занеже то яз известно отведал. И на них и твое бы боголюбие усердно попечение имел о церкви Божии и о православном християньстве. А милость Господа Бога вседержителя и Его Пречистыя Богоматере и нашего смирения молитва купно же и благословение да есть всегда с твоим святительством и боголюбием. Аминь1.