Святитель Кирилл II
Поучение
Духовное убо семя в вашых душах уже первое и второе всеял есмь многажды. и ныне мольбами святых простираю неключимый свои язык к вашеи любви. огнь сердечныи подгнещает уста моя проповедати учения. а не проповедавше суд зол приати. вы же вернии. прилежно молю вы. приклоните сердец ваших уши. да услышите. что учение се глаголеть. да не без пользы отъидете. бывше в церкви. глаголет Кирил архиепископ1. аще кто в беде пособие от кого приим. или книгам от кого научился будет. подобает в сердцы си таковых удержати и во уме. и до дни исходя имя его в мольбах своих поминати. аще ли забудет кто от кого что приим добро. или небрежением. или зависти деля. ни начнет о них молитися Богу. то и своя ему молитва не приятна есть. и не может таковый свят быти. да не мози никто сея заповеди преступити. иже в беде пособие от кого приим. или изручение от поган. или искуп долга люта. или от кого ся научив божественным книгам. не мози никто в забытии положити добро сотворшаго. мнози бо не творяще воли Божиа погыбоша зле. а иже сотворили заповеди Его. тии на небеси и на земли прославлени суть. и со ангели ликуют во свете радости. но слышим. что Павел апостол рече. пиша к Тимофею. благости и разума навык и во святительскую облечеся подобу. буди ведыи. от кого еси навык. рекше. в незабытной памятн имей всегда добро сотворшаго. да твоя добродетели незабвены будут пред Богом. всяк бо забыв добро сотворшаго сам погыбнет. а добродетель его не воспомянется пред Богом. и яко сам забы и́. тако забвен будет. сам бо Господь рекл есть. милуяй помилован будеши. прощая прощен будеши. не осужаяй не осудишися. егоже мерою мерите. отмерится вам. ащели кто не помнит. от кого что добро приим. или злословит добро сотворшаго. таковыи подобен псу голодну. зимою измерзшю. иже согреем и накормлен лает на добро сотворшаго. и укусити хощет. того ради. братия и сестры. не забываем добро сотворших. да спасемся. ащели кто озлобляет добро сотворшаго. таковый горше неверных осудится люте.