Святитель Кирилл Ту́ровский
Молитвы в пятницу

h6C Молитва в пяток по Заутрени преподобнаго Кирила священноинока.

Како свое падение ныне разумею¹? Како ли ся явлю лицу Твоему, Владыко Христе всех Господи? Чтож принесу Ти, ихъже требуеши? Что Ти въздам, полонь сый всякыя нечистоты и безакониа? Кым ли образом вечныа мукы избавлюся? Яко от рожениа моего и доныне вся злая съдеях и ни поне² в един день истиннаго покаяния показах. Аще бо час каюся, то время безаконьствую, аки пес възращаюся на своя блевотыни. И вся благая временьная въсприим, к страстем нечестиа уклонихся от Тебе; поработихся скверным похотем, приложихся неразумне скоте. Несть убо никтоже на земли прогневаяй Тя, якоже аз; несмь достоин възрети на высоту небесную от множества безаконий моих. Аще и простру безаконнии мои руце, мню убо, яко въздух осквернится. Кым ли словом помолюся злоглаголивым языком? А его же не имею, то како въздам Ти Владыко мой? Ни слез, ни терпениа не имам, кротости же и умилениа³ не стяжах: чистоту же и правду от детьства погубих, побежен быв сластолюбиемь злокозненаго врага; впадох в плотьскыа греховныя похоти: погубих образ первыа доброты и весь ум свой в земная уклоних. Увы мне, Господи Боже мой, Творче небу и земли, богатый милостию, благый щедротами! Отъидох далече из Твоего божественнаго дому⁴ и волею поработихся похотному бесу, и, оставив ангельское брашно, весь безаконных ядей исполнихся⁵, изолих паче свиными рожци временных сластей питатися. Разумех бридость ⁶ греховнаго вкуса: ибо в час токмо насладит, а в векы мучению предасть; мысленым же гладом люте изнемогаю и доселе не възвратихся, яко древле блудный сын; ни стяжах мытоимьча⁷ покаяния, ни разслабленаго стенаниа, ни блудници слез, ни хананеяныни молитвы ⁸, ни сотьнича добраго смирения, ни кровоточивыя веры⁹, ни разбойнича исповедания: но яко Каин помыслих потаити душа моея убийство, забыв испытающаго тайныя сердца. Но Аще аз умолчю¹⁰ таковая, имамы клеветника диявола не могущаго молчати. Того ради не жду обличающаго мя, но яко Ламех исповедаю на мя злая моя. Се бо время живота моего съкращается; скверны же душя моеа умножишася. Се бо вся прежь закона и в законе чрес естество съгрешившая уведах и дела их нечистая въсприим, нечаянием люте потоплен быв, и приях мщение злобы, якоже при Нои блуд творящеи народи. Оставив бо, яко ковчег, доброе исповедание ¹¹ и съградих, яко столп, высокомысленыа глаголы, клеветуж со лжами боговещанными утвердих словесы, имиже прогневах моего Творца. Размешен бых умом, не вем, что глаголю, отверг страх Божий, яко содомлянин безаконновах; ни въсхотех верою избежати якоже Лот похотнаго запаления и пребых и доселе любострастием одержим и боюся гееньскаго огня, в немъже ми жжену быти; ни оставих обычнаго греха, да бых пришел на землю упокоения, юже Авраям наследовав, друг Божий наречеся. Но приидох окаянный в мрак темен невъздержаниа, да тем осудихся, и всякия добродетели чюжд бых, ни единаго нрава праведных не въсприях: ни Исакова послушаниа, ниже Ияковля благовериа, ни Осифова въздержаниа, ни Моисеовы кротости, ни Иовова терпениа¹², ни Финеесовы ревности, иже беззаконие пронзе, ни Халевовы крепости, иже о вере не изнеможе, ни Исуса Наввина разума, им же обетованную землю наследова, ни Иаилины премудрыя доблести, иже Сисару древом пригвозди, ни Самуилова богоприятнаго възношения; но пребых окаянный, яко Дафан и Авирон, ко учительству чрес естество желая ¹³, и окрадох Божиа, яко нечестивый Ахар, егоже камениемь побиша, и сквернен Богови предстою, якоже Анний и Амбрий и не вем дни, ни часа, когда зинет земля и жива пожреть мя, или по писаному одождить на мя Господь огнь жюпель. Аще ли не въсприиму ныне достоиных ми наказаний, ожидающу Богу моего покаяния; страшнее ми убо есть, еже впасти тамо в руце живому Богу, от Негоже несть изяти могущаго. Ох мне от моих грехов! Коя ложесна изнесоша мя? Почто ли родихся на свет сий? Добрее ми было, Аще бых родився и час не пребыл и умер. Ныне же что первое въсплачю? о муках ли бесконечных, или еже от Бога отлучение? Аще бо восхощу почестѴ17; злая моя дела, всякаго человека разумеюся грешнее. О мне постонут мукы вся и тля и червие, ожидающе моего телеси, огнь и гроза объяти ми душю. Ковник¹⁴ дияволь о мне хвалится. Да что сътворю, не веде, и к кому прибегну, избавления прося, токмо к Тебе Творче мой! Веде бо Твое длъготерпение и безлобие и человеколюбие. Кто исповесть яже от века чюдеса Твоя и слышаны сътворить похвалы милости Твоея: яко не радуешися о смерти грешничи, но о обращении живота его веселишися. И того ради покаяния образы исперва на всех показа¹⁵: Иезекию от смерти к животу възврати, Манасию оть уз избави, Иону из чрева китова исторж и Ниневитяны спасе; Петра верховника апостолом показа¹⁶. И что боле покаяния, на неже благоволит Дух Твой? Ибо вся правда человеческая, яко платище из паучины, удобь раздираемо и ни во чтоже вменится. Кто бо похвалится пред Тобою право имети сердце, или уповает быти чист от грехов? Фарисей, праведен сый, похвалився, осуждень бысть. Аз же окаянный объях множеством злых грехов, что сътворю, неведе, или в кою пропасть себя ввергу? Не имам бо силы слезныя, ни¹⁷ сладкаго покаяния, егоже ради¹⁸ Давыда освяти и пророка показа, мытаря оправда, блудницу очисти и блуднаго сына потщався срете и божественныя трапезы причастника сътвори. Того ради и аз бью ся в перси и въпию из глубины сердца: Владыко Господи Исусе Христе! легеон бесовьскый древле умоли Тя, да не в бездну послеши его, и, получивь Твою милость, в стадо свиное устремися: и аз молю Тя, Сыне Божий, да не послеши мя в дебри огненыя за множество зол моих; недостойна бо сътворих себе небеснаго Твоего царствиа, но едину от обителей дому Отца Твоего подайждь ми. Ибо не праведных ради на землю сшел еси, якоже рече неложный Боже: не приидох звати праведных, но грешных на покаяние, ибо не требуют здравии врача, но болящии. Приими мя Господи, кающагося о сътвореных ми неподобных делех; не презри мене в сквернемь припутии, в греховней удолии, в мысленыя разбойникы впадшася и всякыа добродетели от них съвлечена и страстьми люте уязвена и неисцельно боляща душевным похотением преминена иереом ума моего¹⁹. Но Ты Сам, Исусе спасеное имя, безначальнаго Отца безлетный Сыне, имъже всяческая совершена быша, видимая же и невидимая, Пресвятый Царю, Едине безсмертный и человеколюбче, нас ради грешных от Отческых недр²⁰ пришед²¹, раны же и распятие претерпети изволил еси, непорочное Твое тело на кресте повешено нечестно презрев, многими щедротами и человеколюбием побежен быв во мертвых причтеся, да таковым, смотрением уловил еси мучителя диявола, разорил еси имущаго державу смерти и все воиньство демоньское явлением креста Твоего победил еси, в преисподняя вшед, адово царство разрушил еси²² и от сетования тленнаго на веселие приведе и плененыя грехом на прьвое блаженство възратил еси. Един бо Ты чисть еси и непорочен за грешникы пострадав: аз же сквернен душею и телом. Но очисти мя из ребр истекшею Святою Ти кровию, пригвозди страсе Твоемь плоть мою и животворящим умерщвлением Твоим умертви уды телеси моего на зло подвижающася, взыщи мене заблужшаго, якоже погибшаго овчати, его же на рамо взем к Отцу принеси и ангельскыя чины на радость призови. Все бо можеши, елико хощеши, твориши: якоже велико величество Твое, тако милость Твоя безчислена есть²³. Осияй ми ум многою злобою омеркший, да не до конца обыметь мя темный князь, жаданием плотскым к своему хотению работати нудит мя, да не малыя ради сладости века сего от святаго Твоего чертога изгнан буду и связан по руце и по нозе и негасиму огню предан буду; но обычною Ти милостию на моление мое призри и приими молитву раба Твоего. Не осуди мене с беззаконии моими, ни по грехом же моим въздаси мне: яко беззакониа моя аз знаю, и ныне каюся о гресех своих. Ты же съвеси немощь естества моего, Зиждителю мой, дай же ми крепость и силу, постави нозе мои на камени покаяниа²⁴, очисти душю мою от всякыя скверны; отжени нечистыа помыслы от страстнаго ми сердца; даруй устом моим тихоглаголание, очима моима источник слез и весь злобный терн от моего ума искорени; слух же ушию моею да огласится²⁵ божественными Ти заповедьми. Научи мя руце мои к Тебе простирати и всего мя учини своего угодника, дай, да и на мне удивится милость Твоя, и вси увидят человеколюбие Твое: яко милостив спаси мя грешника. Всесильне, безлобиве, долготерпеливе Спасе! Дело руку Своею не презри, созданиа Своего не остави²⁶, ни рци, Господи²⁷: не веде тебе, ни, Господи, не отвратися со гневом Твоим от мене, не посли мя, Господи, в огнь, егоже трепещет душа моя. Ей Владыко мой Господи, не забуди труда раба Твоего, к Тебе бо прибегох и очи душа моея возведох и руце прострох и колени приклоняю²⁸, языком молюся, глаголя: помилуй мя, Боже, по велицей милости Твоей, по многым щедротам Твоим очисти безакония моя, яко не мертвии въсхвалят Тя, ни седящии в аде исповедять Ти ся, но мы, суще недостойнии, благословим Тебе и молимся, просяще Твоея милости. Сам бо рече Господи мой: просяй приимет, яко грядущаго к Мне не иждену вон. Ты бо ни единому человеку погибнути волиши, но всех спасти глубиною судеб Твоих²⁹. Ты бо еси Бог мой Пресвятый и аз раб Твой грешный. Огради мя силою креста Твоего и спаси мя от всякаго зла молитвами Пречистыа Владычица нашеа Богородица и святых Ти страстей, еже за ны претерпел еси Отчим благоволением и Твоимь сыноявлением и человеколюбием и Святаго Духа смотрением. Яко Тя хвалят вся силы небесныя в Троице Единаго Бога и мы земнии милости просим и грехов отпуст. Тебе есть миловати и спасати душа наша всегда, ныне и присно и в векы веком. Аминь.

Молитва в пяток по часех преподобнаго Кирила священноинока.

Что Ти въздам, Господи Исусе Христе Сыне Божий, за вся, яже еси сътворил роду человеческому? И какову мзду принесу Твоей благости? Ни небо, ни земля не может Тебе достойно въздати даров. Яко Сам изволил еси приити на землю спасти грешникы³⁰: въплотибося нас ради, бесплотень сый, и волею обнищав богатый. Аз же отметник бых Твоих щедрот, паче всех прогневах Тя; но, нас ради страсть приим, исцели страсти сердца моего; изволивый осудитися и тернием венчан быти, душа моея терние искорени; связавыйся волею и раны приим, разреши узы зол моих, от ран мя вечных избави, поругание претерпев и на кресте пригвоздися, страсе Твоем плоть мою пригвозди; искушающаго³¹ мя врага крестом Своим низложи³²; на трости губою о́цта нужею вкусив, заглади рукописание страстнаго ³³ ми греха; в книгы мя животныа впиши; поколебавый от основания землю и камение рассадив, утверди мя на камени веры Твоея, неподвижима мя прочее сътвори; и солнце в тьму преложив, язву копием в ребра приим, тьму ума моего просвети и великую язву грехов моих уврачюй; кровь и воду на очищение своего създания источил еси, дай же слезы очима моима, да очищу скверны безаконий моих; разбойника оправдал еси едино възопивша: помяни мя Господи в царствии Своем: ей Господи! и мене такоже помяни, безпрестани въпиюща к Тебе и того мя части сподоби; приимый Петра плакавшася, и мое покаяние приими; в гробе плотию полежав, умерщвлена мя злыми делы оть гроба нечаяния въздвигни, да чистым сердцем прославляю креста Твоего силу: тем бо диявола победи и умершая от века с Собою въскреси. И за вся сия что Ти воздам окаянный аз, токмо поклонение и слез умиление³⁴? Яко да сия прием, Спасе мой, конец благ даруй ми и сподоби мя одесную Тебе стати в день судный и слышати Твой Святый глас, глаголющь: приидете благословеннии Отца моего, приимете уготованное вам царствие³⁵. Ты бо еси Бог наш и Тебе славу всылаем Отцу и Сыну и Святому Духу, ныне, присно, и в векы веком. Аминь.

Молитва в пяток по Вечерни преподобнаго Кирила священноинока.

Владыко Господи Вседержителю, Боже Отец наших веком Творче и концени³⁶ сведителю³⁷, исчитая лета и времена измеряя, живущим на земли животу же и смерти имея власть! Не остави мене Господи, отинудь растлети в беззакониих, ни гнева, противу делом достойна, не посли на мя, но услыши глас молитвы моея. Благоволив превести мя житейскую пучину мноземи волнами греховными погрязнути хотящаго, иже и сего дне долготу сподобил еси сконцати и к началу нощи приблизитися, ея же не чаю преити, бесовьскым объят мечтанием и тмою греховною покрываемь, в нюже спаси мя от всякаго совета вражия и всякыя скорби и напасти нужа и печали и скверных мыслей, яже беспрестани стужают окаянней ми души. Ты бо еси Бог мой и всякаго добра податель, иже и преже прошениа дая, изобилова рабом Своим благая, помяни смирение мое и отверзи устне мои на славословие Твое и приими вечернюю сию молитву и дайже невозбранно ми тещи к заповедем Твоим, не вотще трудитися маловериа моего ради. Ты бо рече: възови Мя и избавлю тя: избави мя, Господи, от всякыя козни диявола и управи живот мой. Се бо с страхом предстою Ти, на множество щедрот Твоих взираю выну и умилением душа припадаю: от неполезных мыслей уклони сердце мое и ум мой к Тебе впери; дайждь ми, Господи, отныне время покаяния, яко пришлец есмь аз, якоже и все отци мои: се бо яко трава заутра процветох и навечер отъпаду и исъхну . Исцели мя, Милостиве, зле уязвеннаго греховным жалом, преже даже не отъиду и к тому не буду; яко не мертвии въсхвалят Тя, в аде же кто исповесть Тя ся. Ей Владыко, Спасе душь нашихь, даровавый нам надежу въскресения верующим Тя, покой душу раб Своих, отец и братию нашю (имя рек) и всякаго племени Християньскаго роду, мужеска полу и женьска, и всех елико в Тя вероваша Исуса Христа, Сына Божиа. Ты бо рече: веруяй в Мя не умреть, но имать живот вечный, его же и мене причастника сътвори в земли кроткых, в селех Святых, в неразоримых храмех, в горнем Еросалиме, в немерчающем свете и нестареющемся блаженном оном веце, в бесконечней жизни, идеже несть болезнь, ни печали, ни въздыханиа, ни дъявола на зло подвизающа, ни греха тлю творящаго, но радость неисповедима и веселие неизреченное, и праведник множество, пророк чинове, апостол ликове, мученик полци, страстотерпець хоругви, святитель събори, преподобных толпы, пустынник совокупление и святых жен крепкодушие, и святых покоище, от века угодивших Тебе, Единому истинному Богу нашему, Отцу и Сыну и Святому Духу и ныне и присно, и во векы веком. Аминь.

Молитва в пяток по Вечерни³⁸.

От нощи, к Вам, утренюющи ныне, Святители и Пророци, Апостоли и Мученици Господни, мысль мою прегрешений избавите, смердящую душу мою страстьми Вашим заступлением исцелите, молю Вас, и сердце мое, колеблющеся от неприязни, утвердите и воздыханиа моя услышите Пророци Господни! Иоанне Пророче Предотече и Крестителю, в пути заповеди Христови направи мя ходити благодатно. Моисею, аяроне, Исаие, Иеремие, Илья, Енох и Елисей, яко столпи церковнии, укрепите мя волю Господню деяти. Захарие, Иосие, Давыде и Нафане, Науме, дайте ми просвещение и милость. Авдее и Софоние, Самоиле, Ионо, Аввáкуме, Данииле, Иоиле, Варуше, молитеся за мя к Богу. Михее, Малахие, Иезекие, Агее, Амосе, Ахие и вси святии Господни Пророци, моя мольбы приимите и победника мя страстем явите. Славнии Пророци, верным поборници и заступници, Святители блаженнии и Священномученици и Преподобнии Отцы, постници черноризци и пустынници: молитеся за мя, даровати ми прощение Вашими молитвами. Святии Христовы мученицы, излиявши кровь Христа ради и тело предавши ранам, со Ангелы ныне Ему предстоящи, молитеся за мя убогаго. И лик святых Мироносиць и святая жены Мученици и постници, преподобнии святыя Девы: молитеся к Богу за мя грешнаго. Вси святии Апостоли, Пророци, Мученици, Святители, Преподобнии и Праведнии молитеся Господеви и преже усопшим верным отпущение согрешением даровати, и избавити я будущаго онаго огня и червий и вечныя мукы, и пищи райскыя приати сподобите. Безначальный Господи, великий Царю и Творче веком и всему дыханию! Покажи Твоя многыя щедроты на нас, да не постыдимся на судищи Твоем. Ты бо еси рекл во истину призывающим имя Твое: призови Мя, и избавлю тя. Сам убо милостивый Един Праведный, не отлучи мене стояниа оного Твоих овець одесную Тебе. Яко Твоя держава и Твое есть царство Отца и Сына и Святаго Духа, и ныне и присно, и в векы веком. Аминь.

Примечания:

При издании молитв св. Кирилла, были использованы:

Три рукописи Соловецкой библиотеки

а) сборник под No 802, состоящий из статей разнаго содержания, написанных в XV и XVI в., в 4-ю долю, на 202 стр; здесь помещены 21 молитва св. Кирилла на л. 171–201: все молитвы названы именем Кирилла Туровскаго, или Кирилла преподобнаго, Кирилла священноинока;

б) Большой Требник дачи Новгор. Митроп. Макария под No 1085, написаный в 1505 г., в лист, на 712 листах: молитвы св. Кирилла, в числе 21, занимают здесь 684–712 стр;

в) Следованная Псалтырь, принадлежавшая св. Филиппу Митрополиту, написанная в XVI в. в 4 долю на 547 стр: здесь помещены четыре молитвы св. Кирилла: по одной молитве после каждаго молебнаго канона Святой Троице, св. Крестителю, св. Апостолам и всем Святым;

Две рукописи Волоколамскаго Монастыря

г) Сборник под No 109, состоящий из разных молитв и написанный в конце XV или начале XVI в., в 4 долю, на 258 стр: здесь, на стр. 46–138, находится 50 молитв, которыя названы именем Кирилла грешнаго, мниха недостойнаго, кроме 8 молитв, не означенных ни чьим именем;

д) Сборник под No 413, написанный в XVI в, в 4-ю долю, на 788 стр: здесь помещено 12 молитв с именем преподобнаго Кирилла или Кирилла священноинока, на стр. 648–686. За основание текста молитв мы принимаем список их в сборн. Солов. No 802, как более исправный сравнительно с другими списками и будем указывать на замечательныя разности, заключающияся как в этих списках, так и в печатном издании (см. статью «От издателя»). Молитвы же, не находящияся в этом списке, будут напечатаны по рукописи Волокол. No 109.