Святитель Кирилл Ту́ровский
Молитвы во вторник
Молитва во вторник по Утрени преподобнаго Кирила. 1
Крестителю Христов, покаяния проповедниче! Кающася не презри мене, но, совокупяся с небесными Силами, помолися Владыце за мя недостойнаго раба твоего (имя рек) дряхла и немощна2, в многыа беды впадающа, утружена бурными помыслы ума моего. Се бо предстою, имея на обличение мое черность дел моих: мноземи обложен бремены3 греховными, пореваемь страстьми житейскими и лежю в тимении4 дел моих, нечаянием одержим, отнуд не имея въсклонениа, крыя струпы душа моея студными вретищи греховными, заблудив праваго пути, ведущаго в жизнь, уклонився в стезя беззаконныя, отвсюду утесняем помыслы ума моего; възвратихся на страсть, егда унзе ми терн греховный, от совести своеа осужаюся и всеми человекы окаян бых, унынием сконцав вся дни живота моего, ослеплени имея сердечнии очи, окалях душевную ми ризу и всю плоть мою злобою осквервих; неподобному блуду чювьственныа двери отверзох; не встягновенно 5 от юности и доныне вся злая сътворих, и боюся посечениа, яко неплодная смоковница, егда приидет смертьная секира и предасть мя в истление огня негасимаго, егоже и сам сотана трепещет, от негоже несть изяти могущаго. Увы мве! Душе разумей и вижь долготерпение Божие, яко не волит смерти грешници. Горе мне! Что приобретох в минувшее время живота моего. Ибо несть, от начала миру и доныне, ни единого же грешника, егоже не преспех съгрешая: аз бо есмь вертеп всем злым делом, отнудь не имеа конца греховному обычаю; пригвожден есть ум земным вещем, да что сътворю, неведе, к кому ся приближу, да спасена ми будет душа, токмо к Тебе, Иоанне Предотече, яко свем Тя больша всех. Ибо Ты сподобися прияти за верх пречистыи Агньца Божия6, вземлющаго грехы всего мира, Его же моли за убогую и смиреную мою душю: да поне отъныне в единонадесятый час понесу яремь, благый и прииму наим от рукы Господня: даже непостигнеть вечерь, даже незайдеть солнце, даже не обыметь мене нощь страшная и трепетная и глубокая тма; да не остану внеуду дверий святого чертога, толкый без успеха, имея светильник угашен унынием и леностию, и тогда ократится7 суетная моя надежа. Егда же вся тварь пред страшным предстанеть судищем Христовым, идеже явятся когождо дела без испытания8, тогда Ангели предстоять со страхом, громи боятся, молния трепещет9, земля колеблется, огнь свирепый потечеть, потребляя беззаконники, от нихже първый есмь аз. Тогда праведници возрадуются, преподобнии веселятся, девственници величаются10, мученици венцаются, Апостоли в облацех восхыщаются, пророци прославляются, и вси святии почивають от трудов, имиже пострадаша Христа ради в веце сем. Чтоже сътворю окаянный аз, яко в глумлении сконцав вся дни живота моего и в поучениих сквернавых преидох лета моа. Смерти убо чаю, о гресех же николиже болев, вечную муку приобретох11 и царством небесным непопекохся. Не презри мене, проповедниче Христов, честный Предтече, последний пророче, первый мучениче12, постником13 наставниче и чистоте учителю14, присный друже, южик Христов. Тя молю и к тебе припадаю: не отрини мене от твоего заступлениа, по въстави мя убогаго, многыми падшася грехы. Обнови душю мою покаянием, еже есть второе крещение, яко обоему начяток15 ты еси: крещением омываеши прародительныя грехы и покаяниемь очищаеши душевную скверну. Очисти мя грешника: уста недостойна вопиют к тебе, и душа сквернава молится, сердце нечисто из глубины въздыхаеть. Простри пречистую твою десницу; исторгни мя от враг моих, да не, по разлучении, душу удержат ми лукавии беси, да не рекут: се день, егоже чаяхом. Ей Господи мой Исусе Христе! Молитвами святого Иоанна Крестителя Твоего, недажь мя бесом в радость, да непохвалятся, глаголюще: в руце наши пришел еси. Человеколюбце, Царю всесильне! Угаси прещениа их и низложи възнесенную гордыню их. Веде бо Господи множество грехов моих, яко убо числа не имут; но надеюся на пучину Твоих щедрот, возвращаюся, яко блудный сын, приими мя, яко единого от наемник Твоих. Молю Тя, яко Хананея, да и аз насыщуся, аки пес, крупиць, падающих от святыя трапезы Твоея, Господа нашего Исуса Христа. Вопию, яко прокаженный он: аще хощеши, можеши мя очистити. Не глаголю, яко разслабленый: Господи, человека не имам; Ты бо еси Сын человеческый16, мене ради плотию обложися и немощь естества нашего понесе, иже сына вдовича на погребение несома въскреси, четверодневнаго Лазаря из гроба възгласи, слепцем словом очи отверзе, и кровоточивую прикосновением риз очисти, иже и разбойника, в един час исповедавшася, приял еси и раю причястника сътворил еси. Ты ныне, Господи Боже мой, приими мое исповедание, подайже ми, любовь Си17, последний сий день угодно Тебе прейти18. Нест во мне части целы, ни места чиста: ибо впадох, яко в разбойнича рукы, в чресъестественныа грехы, иже, совлекше мя божественыа Твоеа заповеди, яко раны наложиша, сведение студных ми дел, и исполумертва оставиша мя, нечаяниемь одержима. Сам же, Господи мой Исусе Христе, яко Самарянин, возьми мя на свой скот и принеси мя в гостинницу, в Святую Ти Церковь, в ней же дасться исцеление болящим грехы. Ты, якоже гостинник и врачь, прилежи мне, възлий на мя Твою милость, и истреби нечистоту многих ми грехов и дай же исцеление души моей и телу, да и на мне явится Твоя милость. Приими молящагося за ны честнаго Предотечю Крестителя Твоего Иоанна и Пречистую Ти Матерь Владычицу нашю Богородицу. Спаси мя грешнаго раба Твоего (имя рек), кающася о гресех своих. Ты бо еси Бог кающихся и на Тя, Спасителя нашего, възложихом надежю, славяще пресвятое имя Твое, Отца, и Сына, и Святаго Духа, ныне и присно, и в векы веком. Аминь.
Молитва во вторник по часех святаго Кирила.
Боже естеством, Отче милостию, родителю и творче всей твари, надежа всех конець земли! Нищь и убог аз есмь: призываю чюдное и святое имя Твое и прошю милости от Тебе, Отче, Сыне, и Святый Душе! Ты еси Бог19 безгрешен, животу и смерти имеа власть: избави мя от всякыя стрелы, летящия в день, и от сряща, беса полуденнаго20. Зане сташа и усмотриша мя и нападоша на мя без милости; помыслиша отринути мя от спасения моего; подстрекаша мя вся дни жаломь нечистоты, дóндеже ощутих смертоносный яд в окаянней ми души. Дение21 мои, яко сень, преидоша от множества беззаконий моих, уклонихся от пути праведнаго; лишен бых от плода духовнаго деланиа; ниву сердца моего тернием порастих; леностным сном без памяти въздремахся; совлечен бых одежа духовныя; врази мои съвещаша на мя совет зол. И в скорби моей, призвах Тебе, яко раб, бояся господина своего; от утра помолихся, яко наимник, чяя мъзды своея. Услыши мя, Господи Боже мой, в день печали моея, и приими глас молитвы моеа, егда помолюся к Тебе: се бо с страхом предстою Ти и, по молении, исповедание приношю Ти. Не может бо ми престати душа, требующи питатися Твоими словесы, яко сладка гортани моему словеса Твоя, паче меда устом моим. Но не омерзи моего въздыханиа: понеже нечист и сквернен дерзаю призывати Святое имя Твое, егоже вся тварь трепещет, 22 земли ни на чем же держится, море песком оградися, путь рекам простреся, вода на воздусе висит, небо, яко лук, преклонися, солнце, не престая горит, и луна с страхом сиает, звезды хытростию текуть, и никтоже от жен роженых безгрешен, вся же правда человеча, яко тина, злосмрадна. Но надеяся на человеколюбие Твое спасения прошю: Боже, очисти мя грешнаго, отреби гнилость душа моеа, рассыпли бремя греховное и избави мя части лукаваго и причястника сътвори Твоего царствиа: Христе, истинный Боже нашь, молитвами Пречистыя Ти Матере, Владычица нашея Богородица и Святаго Пророка и Предотечя, Крестителя Иоанна, и всех святых Твоих; яко благословен еси с Отцем и с Святым Духом, ныне и присно и в веки веком. Аминь.
Молитва во вторник по Вечерни, святаго Кирила, преподобнаго священноинока.
В Твое заступление и крепкую помощь ныне прибегох, Пречистая Госпоже, Богородице! Иного бо, развее Тебе, прибежища не имею, окаянный аз раб твой (имя рек). Весь есмь сквернен: несохраних заповеди Сына Твоего и Бога моего, да тем ни на небо очима возрети несмею: ибо тело злобою уязвих, ни руку въздети на высоту: полне бо еста лихоимьства; ни устну отверзсти на молитву: яко злогласованием слепистася23; въздыхания во мне несть от величания24; сердце отягчих многоядением; душю омрачих немилосердиемь, тело ослабих25 леностию; нозе преткнух о камень сластолюбиа; уши отверзох на слышание маловременныя похвалы; лице мое бестудием повлекох; смрад дел моих обоняста ноздре мои; и вес бых, яко древо неплодно, или яко храм пуст, емуже на разорение вси поучаются; тать же душа моея крыется в гнезде сердца моего, ждый подобна26 времени, видить бо мя неогражена молитвою и тщится малое имение веры моеа въсхитити. Не имам бо постнаго оружия и сего ради ратник диавол, аки пленника, греховными ужи связав, к своему хотению прочее нудить мя. Да что сътворю неведе: самовластен Богом сътворен бых, и волею поработихся похотному бесу; умножишася греси мои27 наипаче песка морскаго. Да како могу умолити Творца моего и Господа, или како надеюся помилован быти: волею вдався на осквернение плоти и по вся чясы приближаюся к греховным сластем; плоть убо моя осквернися чрез естество блудом, язык же срамословием распростреся; внутреняя же моа исполних смрадных помысл и отнудь весь мой разум попустих в сопротивная Божию закону. И того ради тужю и скорблю и печалуюся, по вся часы припадаю к щедротамь Твоим Госпоже Богородице! Не прогневайся на мя грешнаго, да не всуе жизнь моя скратится; но призри, Владычице, на мя унылаго, умоли рожшагося от Тебе! да не предан буду в жребий грешных. Ты бо еси Божия Мати, и аз раб Твой всегда на Тя надеюся: за мене, Своего раба, умоли Сына Твоего и Бога моего, Емуже слава с Отцем и с Святым Духом, ныне и присно, и в векы веком. Аминь.
Молитва во вторник по Вечерни.28
Благаго Царя благая Мати! Призри на раба Си милостивно и помощную ми руку простри, и страстнаго мя от страстей возведи. Рыдая со слезами, вопию Ти, человеколюбивая: вонми и спаси мя. Возвести очию не смею, яко весь есмь во гресех. Милостивая Госпоже, Мати сущи Богу, Живодавца родьшя мертвым, от мертвости мя злыя въстави: владееши бо всем избавлением. Мучительства мя злых свободи: щит ми подаждь твоея силы; стрела устрели мя вражья: да улучу оставление грехов злых. Прибегаю к благости твоей: лежаща мя, яко мертва окаянна, от страсти возведи. Благая словеса презрех Сына Твоего, иже мирови нисходи. Да не одолеет множество зол моих благых Твоих множество, Благая! Нощь объят мя глубокая страстей; но Ты освети светом Твоим; чужа мя сътвори от страсти, Дево, и приближи единому Твоему Сыну. Ни уповах инде, Препетая разве Тебе, упование державное. Обиде мя вода до душа моеа и запяхся скверными помышлении; леняся взираю своих зол. Радуюся и уповаю к Тебе Чистая: Тя бо заступницу имам и очищение. К Тебе прибегаю Мати Божиа! Нищь и убог есмь аз: сохрани мя множеством щедрот Си. Гордаго сътвори29 врага, хотящаго присно пожрети мя; просвети ми разумнии очи, со всем умом, пети Тебе согласно. Радуйся, зову Ти гласом Гаврииловым. Радость Твою обнови на мне: пою и воспою Тя помощницу Богородицю и стену неразрушиму, яко исходатаицю благоприятну Богу: молитвы приими и Тому донеси. Емуже лепо есть поклонение, Отцу, и Сыну, и Святому Духу и ныне и присно и в векы веком. Аминь.
Примечания:
При издании молитв св. Кирилла, были использованы:
Три рукописи Соловецкой библиотеки
а) сборник под No 802, состоящий из статей разнаго содержания, написанных в XV и XVI в., в 4-ю долю, на 202 стр; здесь помещены 21 молитва св. Кирилла на л. 171–201: все молитвы названы именем Кирилла Туровскаго, или Кирилла преподобнаго, Кирилла священноинока;
б) Большой Требник дачи Новгор. Митроп. Макария под No 1085, написаный в 1505 г., в лист, на 712 листах: молитвы св. Кирилла, в числе 21, занимают здесь 684–712 стр;
в) Следованная Псалтырь, принадлежавшая св. Филиппу Митрополиту, написанная в XVI в. в 4 долю на 547 стр: здесь помещены четыре молитвы св. Кирилла: по одной молитве после каждаго молебнаго канона Святой Троице, св. Крестителю, св. Апостолам и всем Святым;
Две рукописи Волоколамскаго Монастыря
г) Сборник под No 109, состоящий из разных молитв и написанный в конце XV или начале XVI в., в 4 долю, на 258 стр: здесь, на стр. 46–138, находится 50 молитв, которыя названы именем Кирилла грешнаго, мниха недостойнаго, кроме 8 молитв, не означенных ни чьим именем;
д) Сборник под No 413, написанный в XVI в, в 4-ю долю, на 788 стр: здесь помещено 12 молитв с именем преподобнаго Кирилла или Кирилла священноинока, на стр. 648–686. За основание текста молитв мы принимаем список их в сборн. Солов. No 802, как более исправный сравнительно с другими списками и будем указывать на замечательныя разности, заключающияся как в этих списках, так и в печатном издании (см. статью «От издателя»). Молитвы же, не находящияся в этом списке, будут напечатаны по рукописи Волокол. No 109.